Read koho Lebi 6 Bible Online

Lebi 6 - koho bible

Lebi 6

¹Yàng Jehôwa đơs mơ Môise lah;

²“Dilah cau lơi tìs glài mơ ò dòn song mơ Yàng Jehôwa bơh neh pơrlồm cau ơm rềp di khai bơh dô nơm phan lơi neh jào khai in hala lòi khai in sền gàr hala neh kơñau, hala dilah khai pơrlồm cau ơm rềp di khai,

³hala khai bàn phan mơna cau neh lơh roh mơ đơs blac bơh phan hơ̆, hala dilah khai srat să ma blac; dilah khai lơh tìs bơta lơi tòm ală bơta behơ̆,

⁴tòm tŭ khai neh lơh tìs mơ dòp git bơta tìs glài khai dê, gen khai pal tơm wơl phan lơi khai neh kơñau hala neh ai kơrlơm bơh di cau ndai, hala phan lơi mơ cau neh jào khai in, hala neh bàn phan cau neh roh,

⁵hala bơh phan lơi mơ khai neh srat să ma blac. Khai pal tơm wơl wil tơl, ai bơtơl tai dô pơnah pram bơta kas màng phan hơ̆ dê mơ ai jơh cau tòm phan hơ̆ in tòm ngai khai ơn phan ơn tơwài glài gơtup tìs khai dê.

⁶Mơ khai pal cèng tus hơ cau gơnoar ơn phan duh khoai, be la phan ơn tơwài glài khai dê nàng ơn Yàng Jehôwa in, dô nơm belàt dam ò sồt rmàñ bơh di mpồl belàt khai dê, mơ kas màng di pal.

⁷Cau gơnoar ơn phan duh khoai rơp lơh gơs bơta tơwài glài khai in di đap Yàng Jehôwa, mơ khai rơp geh toh glài bơh bơta lơi tòm ală bơta neh lơh khai in tìs glài.”

⁸Yàng Jehôwa đơs mơ Môise lah:

⁹“Ai tĕ Arôn mơ ală kòn klau khai in jơnau sồr do: Do la ală sơnoa rnoas bơh phan ơn chu pơrguc: Phan ơn chu pơrguc pal lòi gơ ơm hơđang cơnòng duh khoai mang àng, jơl tus àng drim, mơ ồs pal sa hơng sùm hơđang cơnòng duh khoai.

¹⁰Gen cau gơnoar ơn phan duh khoai rơp soh ồi ào mơ brài che dơmài khai dê, gơs ồi ào dơlam mơ brài che dơmài di să khai, mơ rơp chŏ bùh phan ơn chu pơrguc mơ ồs neh sa hơđang cơnòng duh khoai mơ ơn gơ di gah cơnòng duh khoai.

¹¹Lồc behơ̆ khai pal hồ ală ồi ào hơ̆ mơ soh ală ồi ào ndai, mơ cèng bùh hơ đah bơdìh sàl ơm di dô bă tiah neh ơn is sàng goh.

¹²Ồs hơđang cơnòng duh khoai pal lòi gơ sa hơng sùm; ò di lòi gơ chơt. Kòp àng drim cau gơnoar ơn phan duh khoai pal ơn bơtơl lòng mơ rơndap phan ơn chu pơrguc hơđang ồs mơ chu dơngi ală phan ơn bơta ring lơngai hơđang hơ̆.

¹³Ồs pal lòi gơ sa hơng sùm hơđang cơnòng duh khoai; mơ ò ai gơnoar gơ in chơt ò.

¹⁴Do la ală sơnoa rnoas bơh phan ơn mơ kòi mbo: Ală kòn klau Arôn pal cèng gơ tus di đap mat Yàng Jehôwa, di đap cơnòng duh khoai.

¹⁵Cau gơnoar ơn phan duh khoai pal ai dô sơmbat kơmbuh phe rhền mơ mơñà, bal mơ jơh kơlhô hơđang phan ơn mơ kòi mbo mơ chu pơnah lòi kah kirsơnre hơđang cơnòng duh khoai lơh gơs ƀô bơlhu niam nùs Yàng Jehôwa.

¹⁶Arôn mơ ală kòn klau khai dê rơp sa pơnah gam wơl bơh phan ơn hơ̆, mơya pal sa ò gơs kañ di dô bă tiah sàng goh, bol khai pal sa gơ di ƀlàng jơng gùng Sàl Tòm Mat dê.

¹⁷Ò di buh gơ bal mơ kañ; Añ neh ai bol khai in gơs pơnah tòm ală phan ơn chu tòm ồs ơn Añ in. Kung be phan ơn tơwài glài mơ phan ơn tơwài glài gơtup tìs, gơ la sàng goh rlau jơh.

¹⁸Kòp nă cau klau tòm kòn sau Arôn dê rgơi sa gơ. Hơ̆ la pơnah òs ai khai in bơh di ală phan ơn chu tòm ồs ơn Yàng Jehôwa in tòm ală rài tơnơ̆. Cau lơi ƀư di ală phan hơ̆ pal gơlik gơs sàng goh.”

¹⁹Yàng Jehôwa kung đơs mơ Môise lah:

²⁰“Do la phan ơn mơ Arôn bal mơ ală kòn klau khai dê rơp cèng tus Yàng Jehôwa in tòm ngai kòp nă bol khai geh bong mơñà: dô pơnah jơt epha kơmbuh phe rhền lơh gơs phan ơn mơ kòi mbo òs ơn, nggùl tòm àng drim mơ nggùl tòm trồ mho.

²¹Bơcă tĕ gơ bal mơ mơñà mơ buh hơđang dô nơm pơnơr buh; bơcă bal, koh rpot rpet mơ cèng ơn lơh gơs ƀô bơlhu niam nùs Yàng Jehôwa.

²²Kòn klau rơp geh bong mơñà nàng tơrbŏ gơnoar broă khai dê rơp rcang phan ơn hơ̆. Hơ̆ la pơnah ơn Yàng Jehôwa in mơ pal chu pơrguc jơh.

²³Kòp nơm phan ơn mơ kòi mbo cau gơnoar ơn phan duh khoai dê pal chu pơrguc jơh; ò di sa gơ.”

²⁴Yàng Jehôwa đơs mơ Môise lah:

²⁵“Đơs tĕ mơ Arôn mơ ală kòn klau khai dê: Do la ală sơnoa rnoas bơh phan ơn tơwài glài: Phan ơn tơwài glài pal hàl tơnchơt di đap Yàng Jehôwa di tiah phan ơn chu pơrguc kong hàl tơnchơt; gơ la phan ơn sàng goh rlau jơh.

²⁶Cau gơnoar ơn phan duh khoai ơn phan hơ̆ pal sa gơ; pal sa phan ơn do tòm dô bă tiah sàng goh, tòm ƀlàng jơng gùng Sàl Tòm Mat dê.

²⁷Phan lơi tòm tup mơ poac rơp gơlik gơs sàng goh, mơ dilah gơs dô êt mhàm lơi gơđềt di ồi ào gen mê pal rào goh gơtòm dô bă tiah sàng goh.

²⁸Glah mơ ù ngui nàng gơm poac pal jan bơcah; mơya dilah gơm tòm glah mơ kòng gen glah hơ̆ pal tho jùt goh mơ dà.

²⁹Cau klau lơi tòm hìu nhă cau gơnoar ơn phan duh khoai rgơi sa gơ, hơ̆ la phan sàng goh rlau jơh.

³⁰Mơya phan ơn tơwài glài lơi mơ mhàm gơ neh cèng mut tòm Sàl Tòm Mat nàng tơwài glài di Tiah Sàng Goh gen ò di sa; pal chu gơtòm ồs.