Read koho Lebi 8 Bible Online

Lebi 8 - koho bible

Lebi 8

¹Yàng Jehôwa đơs mơ Môise lah:

²“Cèng tĕ Arôn mơ ală kòn klau khai dê, ồi ào bol khai dê, mơñà bong, kơnrồ dam lơh gơs phan ơn tơwài glài, bàr nơm belàt dam mơ dô nơm bài ơn piang lă ò gơs kañ,

³mơ hòi pơjum jơh dô mpồl làng bol di tiah mut Sàl Tòm Mat dê.”

⁴Môise lơh jat be jơnau Yàng Jehôwa neh sồr khai, mơ mpồl Jơnum neh pơjum bal di mpồng mut Sàl Tòm Mat dê.

⁵Môise đơs mơ mpồl jơnum lah: “Do la jơnau Yàng Jehôwa neh sồr pal lơh gơs.”

⁶Gen Môise cèng Arôn mơ ală kòn klau khai dê tus hơđap mơ ai dà tơnum bol khai.

⁷Khai tơnsoh ào dơlam Arôn in, kơt che but khai in, tơnsoh khai in ào jrùh mơ ơn ephot di khai. Môise kung kơt ephot di Arôn mơ che kơt ntơh neh tàñ hàng mơnĕ ngan.

⁸Khai ơn ồi kơt ntơh di Arôn mơ ơn Urim mơ Thumim tòm ồi kơt ntơh.

⁹Gen khai kơt che kơt bồ di bồ Arôn mơ kơt dô pet màh di đap gơ, hơ̆ la sơgơn sàng goh jat be jơnau Yàng Jehôwa neh sồr Môise.

¹⁰Lồc behơ̆ Môise ai mơñà ơn is mơ bong Hìu Duh Khoai mơ kòp nơm phan tòm hơ̆, mơ ơn is sàng goh ală phan hơ̆.

¹¹Khai rsìh dô êt mơñà hơđang cơnòng duh khoai poh dơ̆, bong mơñà di cơnòng duh khoai mơ jơh ală phan bal mơ gơ mơ thùng dà mơ jơng gơ dê nàng ơn is sàng goh ală phan hơ̆.

¹²Khai tuh dô êt mơñà ơn is bong hơđang bồ Arôn nàng ơn is khai sàng goh.

¹³Gen khai cèng ală kòn klau Arôn dê tus hơđap, tơnsoh ală ào dơlam bol khai in, kơt che but gùt dar wĕ bol khai mơ kơt che kơt bồ hơđang bồ bol khai dê tòm toh jat be Yàng Jehôwa neh sồr Môise.

¹⁴Gen khai cèng tus kơnrồ dam phan ơn tơwài glài, gen Arôn mơ ală kòn klau khai dê ơn tê bol khai dê hơđang bồ gơ.

¹⁵Môise hàl tơnchơt kơnrồ dam mơ ai dô êt mhàm, ngui ràs tê ai mhàm ơn di ală ngke cơnòng duh khoai dê nàng lơh sàng goh cơnòng duh khoai in. Khai tuh mhàm gam wơl di cơnòng duh khoai. Behơ̆ khai ơn is gơ sàng goh nàng lơh bơta tơwài glài gơ in.

¹⁶Môise kung ai jơh dơngi gòm gùt dar ală pơnah tòm dơlam, blah poac lơho gùt dar klòm, bàr nơm leh mơ dơngi bal mơ gơ, mơ chu gơ hơđang cơnòng duh khoai.

¹⁷Mơya kơnrồ dam bal mơ gơltau, poac mơ è gơ dê gen khai chu jơh đah bơdìh sàl ơm jat be Yàng Jehôwa neh sồr Môise.

¹⁸Lồc behơ̆, khai cèng tus belàt dam phan ơn chu pơrguc dê, Arôn mơ ală kòn klau khai dê ơn tê hơđang bồ gơ.

¹⁹Gen Môise hàl tơnchơt belàt dam mơ rsìh mhàm hơđang ală đah cơnòng duh khoai dê.

²⁰Khai koh rpot rpet belàt dam mơ chu bồ, ală pet neh koh mơ dơngi.

²¹Khai ai dà rào ală pơnah tòm dơlam mơ jơng mơ chu jơh dô nơm belàt dam hơđang cơnòng duh khoai lơh gơs dô nơm phan ơn chu pơrguc gơs ƀô bơlhu niam nùs, dô nơm phan ơn chu tòm ồs ơn Yàng Jehôwa in jat be Yàng Jehôwa neh sồr Môise.

²²Lồc behơ̆, khai cèng tus belàt dam ne la belàt dam nàng ơn tòm bơta pồ bơtào, mơ Arôn mơ ală kòn klau khai dê ơn tê hơđang bồ gơ dê.

²³Môise hàl tơnchơt belàt dam, ai dô êt mhàm gơ dê mơ bong di plai tồr đah ma Arôn dê, di ràs tê me mpàng tê đah ma khai dê, mơ di ràs jơng me mpàng jơng đah ma khai dê.

²⁴Môise kung cèng ală kòn klau Arôn dê tus di đap mơ bong dô êt mơñà di plai tồr bol khai dê, di tê me mpàng tê đah ma bol khai dê mơ di jơng me mpàng jơng đah ma bol khai dê. Gen khai rsìh mhàm hơđang jơh ală đah cơnòng duh khoai dê.

²⁵Khai ai dơngi, dơngi tiang, mơ dơngi jơh ală pơnah tòm dơlam, poac lơho gòm gùt dar klòm, bàr nơm leh mơ dơngi gơ dê mơ bơnô đah ma.

²⁶Gen bơh tòm bài piang lă ò gơs kañ neh ơn di đap Yàng Jehôwa, dô nơm piang lă ò gơs kañ, mơ dô nơm piang lă lơh mơ mơñà, mơ dô nơm piang lă lơho; khai ơn ală phan hơ̆ hơđang ală dơngi mơ bơnô đah ma.

²⁷Khai ơn jơh ală phan hơ̆ tòm tê Arôn mơ ală kòn klau khai dê mơ tơyài gơ di đap Yàng Jehôwa lơh gơs dô nơm phan ơn tơyài.

²⁸Gen Môise ai ală phan hơ̆ bơh di tê bol khai mơ chu gơ di cơnòng duh khoai hơđang phan ơn chu pơrguc lơh gơs dô nơm phan ơn pồ bơtào gơs ƀô bơlhu, dô nơm phan ơn chu tòm ồs ơn Yàng Jehôwa in.

²⁹Khai kung ai ntơh belàt dam la pơnah gơrê mơ Môise tòm bơta pơjum pồ bơtào, mơ tơyơr di đap Yàng Jehôwa lơh gơs dô nơm phan ơn tơyài jat be jơnau Yàng Jehôwa neh sồr Môise.

³⁰Gen Môise ai dô êt mơñà ngui nàng bong mơ dô êt mhàm bơh di cơnòng duh khoai mơ rsìh gơ hơđang Arôn mơ ală ồi ào khai dê mơ hơđang ală kòn klau bal mơ ồi ào bol khai dê. Behơ̆ khai neh ơn is sàng goh Arôn mơ ồi ào khai dê mơ ală kòn klau bal mơ ală ồi ào bol khai dê.

³¹Gen Môise đơs mơ Arôn mơ ală kòn klau khai dê lah: “Gơm tĕ poac di tiah mut Sàl Tòm Mat dê mơ sa tềng hơ̆ bal mơ piang lă bơh tòm bài ală phan ơn bơta pơjum pồ bơtào dê, jat be añ neh sồr mơ đơs lah: ‘Arôn mơ ală kòn klau khai dê pal sa gơ.’

³²Gen chu tĕ jơh poac mơ piang lă gam wơl.

³³Bañ lik lòt bơh di tiah mut Sàl Tòm Mat dê tòm poh ngai, jơl tus di ală ngai bơta pơjum pồ bơtào bi dê neh geh tơl, bơh bơta pơjum pồ bơtào bi dê la tòm poh ngai.

³⁴Ală bơta neh lơh sir tòm ngai do la bơta mơ Yàng Jehôwa neh sồr nàng lơh gơs bơta tơwài glài bi in.

³⁵Bi pal ơm wơl ngai mơ mang di tiah mut Sàl Tòm Mat dê tòm poh ngai mơ lơh jat bơta Yàng Jehôwa neh sồr lơh nàng bi in ò chơt, bơh hơ̆ la jơnau sồr neh ai añ in.”

³⁶Behơ̆ Arôn mơ ală kòn klau khai dê lơh jat jơh ală jơnau mơ Yàng Jehôwa neh sồr Môise.