Read koho Jeremi 13 Bible Online

Jeremi 13 - koho bible

Jeremi 13

¹Yàng Jehôwa đơs mơ Añ be do: “Lòt tĕ blơi mê in dô nơm che but mơ bài che dơmài, kơt di but mê; mơya bañ tram gơtòm dà.”

²Behơ̆ añ lơh jat jơnau Yàng Jehôwa sồr, blơi che but, kơt di but añ.

³Jơnau Yàng Jehôwa sồr añ dơ̆ bàr tai be do:

⁴“Ai tĕ che but mê neh blơi neh kơt di but mê; tŭ do lòt tus tĕ hơ gah hiòng Ơphrat, mơ pồn gơtòm gồp pơnai lŭ tềng hơ̆.”

⁵Gen añ lòt mơ pồn gơ di gah hiòng Ơphrat, kung be Yàng Jehôwa neh sồr.

⁶Tơnơ̆ mơ hơ̆ jŏ ngai, Yàng Jehôwa đơs mơ añ lah: “Tŭ do, lòt tĕ hơ hiòng Ơphrat, tă tĕ che but mơ Añ neh sồr mê pồn tềng hơ̆.”

⁷Gen Añ lòt tus hơ hiòng Ơphrat: Tò mơ tă che but mơ añ neh pồn gơ. Mơya che but neh ồm jơh, gơ ò gam niam tai.

⁸Gen, jơnau Yàng Jehôwa dê đơs mơ añ lah:

⁹Yàng Jehôwa đơs be do: “Añ rơp lơh roh bơta pơnhừ să Juda dê, mơ bơta pơnhừ să dờng Jerusalem dê.

¹⁰Làng bol iơh do ò bài iat jơnau Añ, cơnđòa jat bơta kơldang nùs bol khai dê, jat ală yàng ndai duh broă mơ duh khoai bol gơ, gen rơp gơlik kung be che but do ò gam niam dô êt lơi.”

¹¹Yàng Jehôwa đơs: “Kung be dô nơm che but gơđềt di but cau, gen Añ lơh jơh hìu Israel mơ jơh hìu Juda gơđềt mơ Añ kung behơ̆, nàng bol khai lơh gơs dô làng bol Añ, dô sơnđan, dô bơta jòng ro, mơ dô bơta gơklŏ Añ in, mơya bol khai ò bài iat.

¹²Mê pal yal bol khai in jơnau do: Jehôwa Yàng Tom Trồ Israel dê neh đơs lah: ‘Kòp nơm yang pal tơmbềng tơrnòm.’ Mơ bol khai rơp đơs mơ mê lah: ‘Mê kơlôi bol hi ò git ală gri pal tơmbềng tơrnòm ò ơ?’

¹³Gen mê đơs tĕ mơ bol khai lah: ‘Yàng Jehôwa đơs be do: Ne, Añ rơp lơh jơh ală làng bol tòm lơgar do, ală cau bơtau nggui hơđang sơbàn Dabit, ală cau gơnoar ơn phan duh khoai, ală cau gơnoar hwơr, mơ jơh làng bol Jerusalem bơñul ñô.’

¹⁴Yàng Jehôwa đơs: ‘Añ rơp lơh cau do in tòmdră mơ cau ne, mè bèp mơ kòn sò tơm bal; Añ rơp ò sơnđàc, ò pơlai hala nđàc sơngit, tòm tŭ Añ tơnroh bol khai.’”

¹⁵Kơno tĕ mơ ơn tồr iat, bañ pơnhừ să, Bơh Yàng Jehôwa neh đơs.

¹⁶Ơn tĕ bơta gơklŏ Jehôwa Yàng Tom Trồ bol mê in, Lài mơ tŭ Kơnràñ òhềt sồr bơta klam jơngo tus, Lài mơ tŭ jơng bol mê òhềt gơtup hơđang ală mơnơm tŭ trồ mòr jơngo. Tŭ bol mê gơn bơta àng, Mơya Kơnràñ rơp tòmgơl gơ gơlik gơs mƀur bơta chơt, Gơlik gơs mƀur jơngo cik.

¹⁷Mơya dilah bol mê ò bài iat, Hwềng soàn añ rơp ñìm òm bơh bơta jòng să bol mê dê. Mat añ rơp ñìm rac sràt bơtang, mơ dà mat añ gơhòr sùm, Bơh mpồl belàt Yàng Jehôwa dê neh kong kup cèng gơs dĭ.

¹⁸Đơs tĕ mơ bơtau mơ mè bơtau dê lah: “Nggui tĕ tòm tiah liah; Bơh sơgơn bơtau hàng mơnĕ, neh gơdùh bơh bồ bol mê dê rau.”

¹⁹Ală ƀòn dờng Negep gen neh til wơl, ò gơs cau lơi pò bol gơ. Jơh Juda kong kup cèng pơrdô, Jơh tơl nă kong kup cèng pơrdô.

²⁰Pò tĕ mat ai hơđang mơ sền; ală cau tus bơh đah đang. Ntềng đah mpồl belàt neh jào ai in? Mpồl belàt niam mơnĕ ai dê?

²¹Ñchi ai rơp đơs tòm tŭ bol khai geh at bồ hơđang ai, la ală cau mơ ai neh bơto Lơh gơs cau dô bă bal mơ ai? Bơta jê sồt rơp ò sơmbat kup ai, Kung be cau ùr jê deh ơ?

²²Mơ dilah ai đơs is tòm nùs ai lah: “Ñchi bơh tài bơta do neh gơlik tus añ in taih?” Hơ̆ la bơh tồi glài dờng ngan ai dê, Gen tàng ồi mbơn ai kòl pò hơđang, Mơ ai kong jê sồt iơh rmơh ngan.

²³Cau Ethiôpi rgơi tòmgơl gơltau, Hala klìu sơmañ rgơi tòmgơl sơnràng gơ dê sơl? Dilah rgơi gen bol ai la cau neh mòng lơh iơh rau, Kung rgơi lơh niam sơl.

²⁴Behơ̆ gen Añ rơp rsìh bol ai be nsiap Kong càl tòm ƀlàng bràs khồm pơrdô thit.

²⁵Yàng Jehôwa đơs: “Hơ̆ la pơnah ai dê, Pơnah Añ was ai in, Yàng Jehôwa đơs behơ̆. Bơh ai neh hŭi Añ, Mơ dòn kơnòm di yàng blac pơrlồm.

²⁶Añ kung rơp yò ồi mbơn ai tus di mat ai, gen bơta ƀàssìl ai dê rơp sền gŏ.

²⁷Añ neh gŏ ală bơta cù kìr ai dê, Hơ̆ la bơta rềs àr bơrnàn, mơ jơnau hòi tòmjà dri tơlàr be ơseh, mơ bơta dri tơlàr ò git ƀàssìl ai dê, hơđang ală dòr di gah ală ƀlàng sre. Ơ Jerusalem, bòl glar ngan ai in! Ai ò bài lơh goh să ai tus di tŭ lơi taih?