Read koho Jeremi 15 Bible Online

Jeremi 15 - koho bible

Jeremi 15

¹Gen Yàng Jehôwa đơs mơ añ lah: “Bulah Môise mơ Samuel ntào di đap Añ, mơya nùs Añ kung ò wèt mơ làng bol do. Bơtrơh tơlik tĕ bol khai ngài bơh di mat Añ, mơ lòi bol khai lòt!

²Dilah bol khai lùp mê lah: ‘Ntềng đah bol hi rơp lòt taih?’ gen đơs tĕ mơ bol khai lah: Yàng Jehôwa đơs be do: ‘Ală cau neh rcang lòi pluh plàng in, pal kong pluh plàng; Ală cau neh kong pềs tà in, pal kong pềs tà; Ală cau neh rcang lòi jơgloh rung in, pal kong jơgloh rung; Ală cau neh rcang lòi kong kup cèng pơrdô ngài, pal kong kup cèng pơrdô.’”

³Yàng Jehôwa đơs: “Añ rơp bơtào hơđang bol khai poan bơta rung rài: đào nàng tơnchơt, so nàng kap crè, sềm trồ mơ phan poan jơng hơđang ù nàng sa loan mơ tơnroh.

⁴Tài bơh Manase, kòn klau Ejekia, bơtau Juda, mơ bơh ală broă khai neh lơh tòm Jerusalem, Añ rơp lơh bol khai in gơlik bơta rngòt rngơt tòm ală lơgar dunnia dê.

⁵Ơ Jerusalem, ñcau rơp nđàc sơngit di mê taih? Ñcau rơp ñìm rac pơt wòl bơh mê taih? Ñcau rơp wèt wơl nàng lùp còp mê taih?”

⁶Yàng Jehôwa đơs lah: “Mê neh sang lòi Añ, Mê neh lòt ruc hơ ngkòi, Gen tàng Añ neh pò tê tòmdră mơ tơnroh mê. Añ neh làp dil bơta nđàc sơngit.

⁷Añ neh ai đồng nggum bol khai Di ală mpồng ƀòn dờng tòm lơgar do. Añ neh tă cèng bol khai mơ tơnroh làng bol Añ, bol khai neh ò pleh bơh gùng dà bol khai dê.

⁸Ală cau ùr bơnrau bol khai dê sơlo gơbơtơl oă, rlau mơ bràs dàlềng dê. Añ neh cèng cau tơnroh tus tòm gùl ngai, Nàng sò tơm di mè ală cau pơnu dê. Añ neh cèng bơta jê sồt mơ rngòt rngơt, dùh hơđang ală mè dô bă nisơna.

⁹Cau ùr neh tơnggơs poh nă kòn, neh lơbơn òsô. Tă nhơm lồi; Mattơngai khai neh ñơp tŭ trồ ngai; Khai kong dơñŏ tơnhial mơ ƀàssìl ƀàsso; Ai ală cau gam wơl bol khai dê, Añ rơp jào đào ală cau sò tơm bol khai in.” Yàng Jehôwa đơs behơ̆.

¹⁰Bòl glar añ in! Mè añ jê, mè neh tơnggơs añ Dô nă cau bơta tòmlah tòm pơndang tòm jơh lơgar! Añ neh ò ai cau in jồm, mơ kung ò càn mơ cau lơi; Bulah behơ̆, jơh tơl nă bol khai srat rma añ.

¹¹Yàng Jehôwa đơs: “Ngan Añ rơp dong tă mê, Tài bơh tơnggume broă niam. Ngan Añ rơp lơh cau sò tơm rac dan mơ mê Tòm tŭ rung rài chơt roh.

¹²Lòs mơ kòng rgơi lơh tơmpă, lòs bơh đah đang sơl?

¹³Añ rơp jào bơta pas sơm mơ phan màng bol mê dê, cau phà kơñau in mơ ò tơm jền. Tài bơh jơh ală tồi glài bol mê dê, Tòm làm jơh ù tiah bol mê dê.

¹⁴Añ rơp lơh bol mê in duh broă ală cau sò tơm bol mê dê, Tòm dô nơm lơgar mơ bol mê òhềt git, Tài bơh tòm bơta gơjrañ Añ jê be ồs neh hơng, Mơ rơp chu pơrguc sùm sùm.”

¹⁵Ơ Yàng Jehôwa! Kơnràñ git. Dan kah añ mơ còp añ, mơ cèng wơl bơta sal tê añ in hơđang ală kup kơryan añ. Tòm bơta kong ơt Kơnràñ dê bañ cèng añ ngài; Dan git lah añ bơh Kơnràñ mơ kong jê sồt bơrsèl tơnhial.

¹⁶Kơno ală jơnau Kơnràñ dê, gen añ sa loan rau; la bơta hòn chò nùs añ jê; Bơh añ geh sơnđan bơh sơnđan Kơnràñ! Ơ Jehôwa Yàng Tom Trồ Gơnap Gơnoar.

¹⁷Añ ò nggui tòm mpồl cau ñŏ kơnhơl, Kung ò lơh añ in hòn chò; Añ nggui is dô nă bơh tê kơnjơ̆ Kơnràñ ơn hơđang añ; bơh Kơnràñ neh tơmbềng añ mơ bơta gơjrañ.

¹⁸Ñchi bơh tài bơta jê sồt añ jê ò dơh? Bơta sồt rmàñ añ jê ò rgơi sơm, mơ gơ ò bài bòi? Kơnràñ gơwèt mơ añ kung be dô nơm croh dà ma blac, dô nơm hiòng soat dà ơ?

¹⁹Gen tàng, Yàng Jehôwa đơs be do: “Dilah mê rê wơl, gen Añ rơp cèng mê wơl mơ mê rơp ntào di đap Añ; Dilah mê sac bơta niam mơ sang bơta iơh, Gen mê rơp duh broă be bơr Añ jê. Bol khai rơp rê wơl mơ mê; Mơya mê bañ rê wơl mơ bol khai.

²⁰Añ rơp lơh mê in gơwèt mơ làng bol do gơlik gơs dô nơm dơrñang kòng kơ̆ cê, Bol khai rơp tòmlơh tòmdră mơ mê, Mơya bol khai rơp ò geh pha rlau mơ mê, Bơh Añ ơm bal mơ mê Nàng dong klàs mơ dong tă mê.” Yàng Jehôwa đơs behơ̆.

²¹“Añ rơp dong tă mê bơh tê cau iơh, mơ tơwài mê klàs bơh tê sơmbat kup cau rhung rhang.”