Read koho Jeremi 18 Bible Online

Jeremi 18 - koho bible

Jeremi 18

¹Jơnau Yàng Jehôwa đơs mơ Jeremi be do:

²“Tus tĕ, mù tòm hìu cau chài lơh glah ne, tềng hơ̆ Añ rơp ai mê in kơno jơnau Añ.”

³Gen añ mù tus hơ hìu cau chài mòn glah ne, khai ơm mòn phan hơđang phan pơdar khai dê.

⁴Dô nơm gri neh mòn bơh ù kơnàng mơya gơ neh car tòm tê cau chài mòn, gen khai ai ù hơ̆ mòn gơs dô nơm gri ndai, jat nùs kòñ khai dê.

⁵Gen jơnau Yàng Jehôwa dê tus mơ añ lah:

⁶“Ơ hìu Israel, gơwèt mơ bol mê Añ ò rgơi lơh kung be cau chài mòn glah do lơh ò ơ? Ơ hìu Israel, ù kơnàng ơm tòm tê cau chài mòn mbe lơi, gen bol mê kung ơm tòm tê Añ behơ̆ sơl.

⁷Tòm dô tŭ, Añ đơs bơh dô nơm làng bol, dô nơm lơgar ne lah Añ rơp dus, lơh bơcah, tơnroh gơ;

⁸dilah lơgar mơ Añ đơs hơ̆ pơrlac sang bơta iơh gơ dê, gen Añ rơp tòmgơl nùs ò tơndùh bơta rung rài Añ lơh nền hơđang bol khai.

⁹Mơ kung gơs dô tŭ ndai Añ đơs bơh dô làng bol, dô lơgar lah Añ rơp bơt bơtào gơ, tam gơ;

¹⁰mơya dilah lơgar hơ̆ lơh bơta iơh di đap Añ mơ ò iat jơnau Añ, gen Añ rơp tòmgơl nùs bơh bơta lơngai mơ Añ lơh nền bol khai in.

¹¹Behơ̆ tàng tŭ do, yal tĕ mơ cau Juda mơ làng bol Jerusalem: ‘Yàng Jehôwa đơs be do: Do, Añ rcang bơta rung rài tòmdră mơ bol mê, mơ bơtào kai gơrmơ̆i tòmdră mơ bol mê. Tŭ do, jơh tơl nă bol mê pơrlac sang tĕ gùng iơh bol mê dê, mơ lơh niam wơl gùng dà mơ ală broă lơh bol mê dê!’

¹²Mơya bol khai đơs lah: ‘Hơ̆ la bơta ò kwơ! Bol hi kư̆ jat bơta rơndap bol hi dê; mơ kòp nă tòm bol hi rơp lơh jat bơta kră kơldang nùs iơh bol hi dê.’”

¹³Behơ̆ gen, Yàng Jehôwa đơs be do: “Lùp tĕ tòm ală lơgar Gơs cau lơi neh kơno bơta behơ̆ sơl? Cau ơruh dềt Israel neh lơh broă cù kìr rlau jơh.

¹⁴Gơs cau lơi neh gŏ piar hơđang Liban hòr bơh bồ mơnơm? Hala dà mrềt niam Hòr bơh hơđang mơnơm soat sơl ơ?

¹⁵Mơya làng bol Añ neh hŭi Añ; Chu kơlhô rùp ràk ma blac in La rùp ràk lơh bol khai gơtup pừ tòm gùng bol khai dê, Tòm gùng lòt bơh rài yau òr, Lòt tòm gùng òhềt rcang wàs Mơ ò di gùng dờng.

¹⁶Gen tàng lơgar bol khai gơlik ngềt ngơt, Lơh gơs bơta dơñŏ tơnhial sùm sùm; Kòp nă cau lòt gan gen mơp dơl Mơ rtơs bồ.

¹⁷Be càl bơh đah mattơngai lik khồm tus; Añ rơp lơh bol khai in nrah nring di đap cau sò tơm, Añ wèt ngkòi mơ bol khai, ò wèt mat Añ jê; Tòm ngai bơta rung rài bol khai dê.”

¹⁸Gen bol khai đơs lah: “Tus tĕ, bol he bơtào tĕ kai nàng tòmdră mơ Jeremi; bơh cau gơnoar ơn phan duh khoai ò siơ̆u bơta boh lam, cau jak chài ò siơ̆u bơta cri bơyai, cau gơnoar hwơr ò siơ̆u jơnau đơs hwơr. Bol he tus tĕ, ai jơnau đơs bol he tòmdră mơ khai, bañ ơn tồr iat jơnau khai dô êt lơi.”

¹⁹Ơ Yàng Jehôwa, dan ai tồr iat añ, mơ iat ală jơnau cau sò tơm añ jê đơs!

²⁰Bơta iơh rgơi tơm wơl bơta niam ơ? Bơh bol khai neh tò trồm lơh iơh bơta kis añ in. Dan kah wơl mbe añ neh ntào di đap Kơnràñ, Bơh bol khai mơ dan bơta lơngai, Bơta gơjrañ Kơnràñ dê wèt ngài bơh bol khai.

²¹Behơ̆ gen, dan Kơnràñ phi tĕ ală kòn bol khai dê tòm bơta jơgloh rung, Sơrbì bol khai tòm gơnoar pềs tà dê. Lòi bau ùr bol khai dê roh kòn mơ gơlik gơs ùr bơnrau, Lòi bau klau bol khai dê kong chơt pluh, Ai ală cau klau pơnu bol khai dê kong sreh mơ đào tòm tiah tòmlơh.

²²Lòi cau kơno jơnau nggà bơh hìu bol khai dê, Tŭ Kơnràñ sồr cau phà blah nisơna tus hơđang bol khai! Bơh bol khai neh tò trồm nàng kup añ, mơ neh pơt dă jơng añ in,

²³Ơ Yàng Jehôwa, Kơnràñ git jơh kai gơrmơ̆i bol khai dê nàng tơnchơt añ. Dan bañ toh bơta iơh bơsak bol khai dê, Bañ jùt tồi glài bol khai dê bơh di đap mat Kơnràñ; Lòi bol khai gơtup pừ di đap Kơnràñ; Dan lơh di bol khai tòm ngai gơhào gơjrañ Kơnràñ dê!