Read koho Jeremi 20 Bible Online

Jeremi 20 - koho bible

Jeremi 20

¹Tŭ hơ̆ Pasur cau gơnoar ơn phan duh khoai, kòn klau Imer la cau sền gàr hìu Yàng Jehôwa dê, neh kơno Jeremi đơs hwơr ală bơta do.

²Gen Pasur pù lơh cau gơnoar hwơr Jeremi, tơndò gơsàng jơng di tiah Mpồng Hơđang Benjamin, gơrê bal mơ hìu Yàng Jehôwa dê.

³Ngai tơnơ̆, tŭ Pasur hồ tơlik Jeremi bơh gơsàng, Jeremi đơs mơ khai lah: “Yàng Jehôwa ò sơnđan mê la Pasur, mơya sơnđan mê la Magor Missabip

⁴Bơh Yàng Jehôwa đơs be do: ‘Añ rơp phi mê lơh gơs bơta rngòt rngơt să tòm mê in mơ jơh ală cau bơyô mê dê sơl; bol khai rơp chơt bơh đào cau sò tơm bol khai dê, mat mê rơp sền gŏ. Añ rơp phi jơh làng bol Juda tòm tê bơtau Babilôn, khai rơp cèng bol khai tus tòm Babilôn gơs dĭ, mơ ngui đào tơnchơt bol khai.

⁵Añ kung phi jơh ală bơta pas sơm ƀòn dờng do, bal mơ ală cồng nha neh lơh gơlik gơs, jơh ală phan màng gơrê mơ ƀòn dờng; ngan Añ rơp phi ală phan màng ală bơtau Juda tòm tê ală cau sò tơm bol khai dê, bol khai rơp ai kung be phan phà kup mơ cèng hơ Babilôn.

⁶Ai mê, ơ Pasur, să tòm mê bal mơ ală cau ơm tòm hìu mê, rơp cèng lơh dĭ hơ Babilôn, mơ mê rơp chơt mơ tơp tềng hơ̆, bal mơ jơh ală cau bơyô mê dê, hơ̆ la ală cau mơ mê neh đơs hwơr ma blac bol khai in.’”

⁷Ơ Yàng Jehôwa, Kơnràñ neh bơto pơndòm añ, Mơ añ neh geh bơto pơndòm; Kơnràñ pràn rlau mơ añ mơ Kơnràñ neh geh pha. Jơh ngai añ gơlik bơta dơñŏ tơnhial, Cau lơi kung bơtat bơtròh añ.

⁸Kòp dơ̆ añ đơs gen pal ai jơnau hòi driau; añ pal driau lah: “Jàñ bơsak mơ phà tơnroh!” Bơh jơnau Yàng Jehôwa dê lơh añ in jơh ngai kong bơtat bơtròh mơ dơñŏ tơnhial.

⁹Dilah añ đơs: “Añ rơp ò đơs bơh Kơnràñ tai, hala ai sơnđan Kơnràñ mơ đơs tai,” gen tòm dơlam nùs añ kung be ồs sa hơng, gơkrơ̆ kơ̆ tòm ntìng añ, Mơ añ bòl glar bơh ơm mŏ mŏ, mơ añ ò jai kong tai.

¹⁰Bơh añ neh kơno ală jơnau đơs chều oă cau dê, Kìr rngòt kòp bă tiah! “Yă tĕ khai! Bol he yă tĕ khai!” Ală cau bơyô dềt mềr añ jê kơp kòñ añ gơtup pừ, bol khai đơs lah: “Digơlan khai rơp gơkòl pơrlồm, gen bol he rơp pha lin rlau mơ khai, Mơ sal tê di khai.”

¹¹Mơya Yàng Jehôwa ơm bal mơ añ kung be dô nă cau ling jak pal rngòt; Gen tàng ală cau kup kơryan añ rơp gơtup pừ, mơ bol khai rơp ò geh pha lin. Bơh bol khai rơp kong ƀàssìl dờng ngan Bol khai rơp ò geh cồng nha, Bơta sền òsơp bol khai dê sùm sùm Ò gơs tŭ lơi hŭi.

¹²Mơya, khoai Yàng Jehôwa Gơnap Gơnoar! Kơnràñ lòng cau song ring, Kơnràñ sền gŏ tòm nùs mơ tòm dơngoh, Dan lòi añ in sền gŏ Kơnràñ sal tê di bol khai, bơh añ neh yal broă añ Kơnràñ in.

¹³Đơs chò tĕ Yàng Jehôwa in, Jòng ro tĕ Yàng Jehôwa! Bơh Kơnràñ neh dong tă hwềng soàn cau rƀah siơ̆u siar Lik bơh tê ală cau iơh.

¹⁴Pal srat rma ngai neh deh añ! Kơp kòñ ngai mơ mè añ neh deh añ ò geh lơngai!

¹⁵Di pal srat rma cau neh cèng jơnau yal bèp añ in lah: “Dô nă kòn dềt neh deh mê in, hơ̆ la dô nă kòn klau!” Lơh bèp añ in bềng bơta hòn chò.

¹⁶Lòi cau hơ̆ in kung be ală ƀòn Mơ Yàng Jehôwa neh phà tơrlah ò nđàc sơngit! Lòi khai in kơno jơnau ñìm rac tòm àng drim, mơ tòm tŭ nggùl ngai kơno driau tòmlơh;

¹⁷Bơh khai neh ò tơnchơt añ bơh tŭ ơm tòm kơndul mè; Gen mè añ neh lơh gơs bơtô ƀồc añ in, mơ hìu kòn mè añ kư̆ dờng sùm

¹⁸Ñchi bơh tài añ neh lik bơh kơndul mè nàng kong bòl glar moat jrùng, Jơh rài kis añ ơm tòm bơta ƀàssìl taih?