Read koho Jeremi 22 Bible Online

Jeremi 22 - koho bible

Jeremi 22

¹Yàng Jehôwa đơs be do: “Mù tĕ hơ gơlang bơtau Juda, mơ tềng hơ̆ mê yal tơlik jơnau do,

²mơ đơs lah: ‘Ơ bơtau Juda dê, nggui hơđang sơbàn Dabit, mê bal mơ dĭ gơna mê mơ làng bol mê mut tòm ală mpồng do, iat tĕ jơnau Yàng Jehôwa dê!’

³Yàng Jehôwa đơs be do: ‘Lơh tĕ bơta song ngan mơ song ring; dong cau kong kup bơklơn klàs bơh tê cau rồn bơklơn; bañ lơh tìs mơ bañ rồn bơklơn cau ơm tòp, cau kòn đòi hala cau ùr bơnrau, mơ bañ lơh gơtuh mhàm ò gơs glài tòm tiah do.

⁴Bơh dilah ngan bol mê dòn bơr mơ lơh jat bơta do, gen rơp gơs bơtau nggui hơđang sơbàn Dabit, cau hào rơndeh mơ ơseh, khai bal mơ dĭ gơna khai mơ làng bol khai rơp mut bơh ală mpồng do.

⁵Yàng Jehôwa đơs: Mơya dilah bol mê ò bài iat jơnau do, Añ srat să mơ să tòm Añ lah, hìu do rơp gơlik tiah lòi srau.’

⁶Do la jơnau Yàng Jehôwa đơs bơh gơlang bơtau Juda dê: ‘Añ sền mê kung be Galaat, Kung be bồ mơnơm Liban, Mơya Añ srat să lah Añ rơp lơh mê in gơlik gơs ƀlàng bràs, gơlik gơs dô nơm ƀòn dờng ò gơs cau ơm.

⁷Añ rơp rcang ală cau tơnroh tòmdră mơ mê mơ ală phan tòmlơh khai dê; Bol khai rơp kơl ală chi pơnggŏ niam bol mê dê, Mơ sơrbì gơtòm ồs.’

⁸Oă làng bol rơp lòt gan bơh ƀòn dờng do lùp bal mơ gơp lah: ‘Ñchi bơh tài Yàng Jehôwa lơh be do gơwèt mơ ƀòn dờng do taih?’

⁹Rơp gơs cau ho lah: ‘Hơ̆ la tài bơh bol khai neh sang bơta ho bal Jehôwa Yàng Tom Trồ bol khai dê, mơ duh khoai duh broă ală yàng ndai.’

¹⁰Bañ ñìm cau chơt in, bañ pơt wòl bơh khai. Chan ñìm cau lòt ngài in, bơh khai rơp ò rê wơl, ò gam gŏ wơl lơgar tòm khai.

¹¹Bơh Yàng Jehôwa đơs be do bơh Salum, kòn klau Jôsia, bơtau Juda dê, la cau pơrdòn sơbàn bèp khai la Jôsia, mơ neh lòt ngài bơh tiah do: ‘Khai rơp ò rê wơl tềng do tai;

¹²mơya khai rơp chơt tòm lơgar khai kong kup cèng, mơ khai ò gam gŏ wơl lơgar do tai.’

¹³Bòl glar cau lơi in bơt hìu jat bơta ò song ring, Bơtào ơdŭ tap hơđang bơh bơta ò song ngan; cau ngui cau gơp ƀòn he lơh broă gòi, Ò tơm jền tơngai;

¹⁴La cau đơs lah: ‘Añ rơp bơt dô nơm hìu dờng, Gơs ală ơdŭ ơnàng hơđang;’ Gơs ală mpồng dềt, Pơng dơrñang mơ mpàn chi pơnàng, Mơ pih dà pơrhê.

¹⁵Mê la bơtau Tài bơh gơs oă chi pơnàng ơ? Ò di bèp mê neh sa neh hùc, Lơh broă song ring, song ngan Gen tàng gơlik niam khai in.

¹⁶Khai neh cahrña song cau rƀah mơ cau siơ̆u siar in, Gen tàng gơlik niam khai in. Yàng Jehôwa đơs: ‘Behơ̆ ngan ò di la neh git Añ ò ơ?

¹⁷Mơya mat mơ nùs mê Mìng jòi cồng nha ƀơ̆ ƀơl, Lơh gơtuh mhàm cau ò gơs glài, Mơ lơh bơta rồn bơklơn iơh rmơh.’”

¹⁸Gen tàng, bơh Jehôyakim, kòn klau Jôsia, bơtau Juda dê, Yàng Jehôwa đơs be do: “Cau rơp ò ñìm khai in lah: ‘Ơ oh mi añ!’ hala ‘Ơ ruh añ!’ Kung rơp ò pơt wòl khai lah: ‘Ơ hơh! Ơ yàng añ’ hala ‘Ơ hơh! Bơta gơklŏ kơnràñ dê!’

¹⁹Khai rơp kong tơp kung be dô nơm alàng; Rơp kong hwài mơ sang tơlik bơh di mpồng Jerusalem dê.

²⁰Guh tĕ hơ Liban mơ driau, Ai jơnau driau nggà tòm Basan; Driau tĕ bơh mơnơm Abarim! Bơh jơh ală cau kòñ gơboh mê neh kong jă tơnlề.

²¹Añ neh đơs mơ mê tòm tŭ mê ơm tòm bơta bơtoah bơtoài; mơya mê đơs lah: ‘Añ ò bài iat.’ Do la gùng dà mê bơh tŭ kơnòm să, Mê neh ò dòn jơnau Añ.

²²Jơh ală cau ê belàt bol mê rơp kong càl khồm pơrdô ngài, Ală cau kòñ gơboh mê rơp kong kup cèng pơrdô; Gen mê rơp kong bơta ƀàssìl mơ rngòt rngơt, Bơh jơh ală broă iơh mê dê.

²³Mê la cau ơm tòm Liban lơh rsòn tòm chi pơnggŏ ne, Ngan mê rơp rơnđơh tòm tŭ bơta jê sồt tus hơđang mê, Jê sồt kung be cau ùr jê deh.”

²⁴Yàng Jehôwa đơs: “Ngan kung be Añ gam kis sùm, bulah Jekônia, kòn klau Jehôyakim, bơtau Juda, la sơmbiat ƀang kì hơđang tê ma Añ, Añ kung rơp tă sơmbrơt mê.

²⁵Añ rơp jào mê tòm tê ală cau kòñ jòi bơta kis mê, tòm tê ală cau mơ mê rngòt, hơ̆ la tòm tê Nebukatnessar, bơtau Babilôn, mơ tòm tê cau Kalde.

²⁶Añ rơp bơtrơh mê bal mơ mè neh deh mê tus tòm dô nơm lơgar ndai, ò di la tiah neh deh mê, mơ mê rơp chơt tềng hơ̆.

²⁷Mơya bol khai rơp ò geh rê wơl hơ lơgar mơ bol khai kơp kòñ rê wơl.”

²⁸Behơ̆ Jekônia do ngan la dô nơm gri bơcah mơ kong sền òsơp sơl? Dô nơm gri ò gơs cau lơi kòñ ơ? Ñchi bơh tài khai mơ kòn sau khai kong sang tơlik, Kong sang ngài tus tòm dô nơm lơgar bol khai òhềt tŭ lơi git taih?

²⁹Ơ ù tiah, ù tiah, ù tiah! Iat tĕ jơnau Yàng Jehôwa dê.

³⁰Yàng Jehôwa đơs be do: “Cih tĕ cau do tòm ală cau ò gơs kòn sau, Tòm ală cau jơh rài kis ò geh cồng nha; Bơh jơh kòn sau khai rơp ò gơs dô nă cau lơi bơtoah bơtoài, nggui hơđang sơbàn Dabit mơ at bồ tòm Juda tai!”