Read koho Jeremi 23 Bible Online

Jeremi 23 - koho bible

Jeremi 23

¹“Bòl glar ngan ală cau ê la cau tơnroh mơ lơh gơprah mpồl belàt tòm ƀlàng ñhơt Añ jê.

²Behơ̆ gen, gơwèt hơ ală cau ê gàr làng bol Kơnràñ, gen Jehôwa Yàng Tom Trồ Israel dê đơs be do: ‘Bol mê la ală cau lơh nrah nring mpồl belàt la làng bol Añ jê mơ neh bơtrơh bol gơ, ò kơlôi rcang bơh bol gơ. Añ rơp lơh glài bol mê bơh ală broă iơh bol mê neh lơh,’ Yàng Jehôwa đơs behơ̆.

³Să tòm Añ rơp tơrgòm wơl ală belàt gam wơl tòm mpồl Añ jê, lik bơh ală lơgar mơ Añ neh bơtrơh bol khai. Añ rơp cèng bol khai rê wơl tòm wàng bol khai dê; bol khai rơp geh tơnggơs bơtơl oă.

⁴Añ rơp bơtào ală cau ê hơđang bol khai nàng sền gàr bol khai; bol khai rơp ò rngòt rngơt tai, ò gơdô nùs mơ ò roh dô nơm lơi,” Yàng Jehôwa đơs behơ̆.

⁵Yàng Jehôwa đơs: “Ală ngai rơp tus nền cê, Tŭ hơ̆ Añ rơp bơtào Dabit in dô Ntê Song Ring. Kơnràñ rơp lơh gơs bơtau ai bơta jak chài at bồ, Lơh bơta song ngan mơ song ring hơđang ù.

⁶Tòm rài bơtau hơ̆, Juda rơp geh dong klàs; Israel rơp ơm lơngap lơngai, Mơ cau rơp sơnđan Bơtau hơ̆ lah: ‘Yàng Jehôwa bơta song ring bol he dê!’”

⁷Yàng Jehôwa đơs: “Behơ̆ gen ală ngai tus, tŭ hơ̆ cau ò gam đơs lah: ‘Ngan kung be Yàng Jehôwa kis gam sùm sùm, la Bơtau neh cèng làng bol Israel lik klàs bơh lơgar Ejiptơ.’

⁸Mơya đơs lah: ‘Ngan kung be Yàng Jehôwa kis sùm, hơ̆ la Bơtau neh cèng mơ tề lam ală kòn sau Israel rê wơl bơh đah đang mơ bơh ală lơgar Añ neh bơtrơh bol khai.’ Gen bol khai rơp ơm tòm lơgar tòm bol khai dê.”

⁹Bơh ală cau gơnoar hwơr: Nùs añ lề lac tòm añ; Nting añ gơ mprơm; Añ kung be cau bơñul ñô, Kung be cau swing bồ bơh alak, Tài bơh Yàng Jehôwa mơ ală jơnau sàng goh Kơnràñ dê.

¹⁰Tòm lơgar bềng lìu ală cau rềs àr bơrnàn; Tài bơh bơta srat sơntơm gen ù tiah gơlik moat jrùng; Ală ƀlàng ñhơt tòm ƀlàng ngềt ngơt ro rañ. Cau gơnoar hwơr lòt jat gùng iơh, ngui gơnoar bol khai tòm bơta ò song ring;

¹¹Yàng Jehôwa đơs: “Bơh cau gơnoar hwơr mơ cau gơnoar ơn phan duh khoai ò duh rngòt, Tian gơs Añ gŏ bơta iơh bơsak bol khai dê tòm hìu Añ;

¹²Gen tàng gùng bol khai Rơp kung be tiah ntiar tòm klam jơngo, Rơp kong bơtrơh mơ gơtup gơpừ, Bơh Añ rơp tơndùh bơta rung rài hơđang bol khai, Di sơnam lơh glài bol khai dê.” Yàng Jehôwa đơs behơ̆.

¹³“Tòm ală cau gơnoar hwơr Samari dê, Añ neh gŏ dô bơta ngkòr ngkàc; Bol khai ai sơnđan Baal mơ đơs hwơr, Lơh làng bol Israel Añ tìs nrah.

¹⁴Mơya, tòm mpồl cau gơnoar hwơr tòm Jerusalem, Añ gŏ dô bơta cù kìr rlau tai; Bol khai tìs glài rềs àr bơrnàn, cơnđòa jat bơta ma blac; Bol khai lơh pràn kơldang tê cau lơh iơh in, Tian gơs ò gơs cau lơi pơrlac sang bơta iơh. Añ sền jơh ală bol khai gơlik kung be Sôdôm, Mơ làng bol gơ dê kung be Gômôrơ.”

¹⁵Gen tàng, Yàng Jehôwa Gơnap Gơnoar đơs bơh ală cau gơnoar hwơr be do: “Añ rơp ai bol khai in sa crìu bơtang Mơ hùc dà bih khih; Bơh ală cau gơnoar hwơr ơm tòm Jerusalem Neh rsìh bơta ò duh rngòt tòm làm jơh lơgar.”

¹⁶Yàng Jehôwa Gơnap Gơnoar dờng đơs be do: “Bañ iat ală jơnau ală cau gơnoar hwơr hơ̆ đơs hwơr mơ bol mê. Bol khai bơto bol mê in ală bơta gơn kơnòm ò kwơ, Mơ đơs bơta gơtơnggŏ bơh nùs is bol khai dê, ò di bơh bơr Yàng Jehôwa.

¹⁷Bol khai kư̆ yal mơ cau sền òsơp di Añ lah: ‘Yàng Jehôwa đơs, bol mê rơp geh lơngap lơngai.’ Kung đơs mơ ală cau cơnđòa jat bơta kơldang nùs he dê lah: ‘Ò gơs bơta rung rài lơi rơp gơtơntus hơđang bol mê.’

¹⁸Behơ̆ ñcau neh geh ntào tòm mpồl bơyai broă Yàng Jehôwa dê, nàng geh sền mơ iat jơnau Kơnràñ dê? Ñcau neh ơn nùs kơlôi sơnơng mơ lơh jat jơnau Kơnràñ taih?

¹⁹Sền ne, càl rbut Yàng Jehôwa dê! Hơ̆ la bơta gơjrañ dờng Yàng Jehôwa dê neh gơhào, Kung be càl wàl bong, Gơ neh khồm druh hơđang bồ ală cau iơh bơsak dê.

²⁰Bơta gơjrañ Yàng Jehôwa rơp ò ruc wơl Jơl tus di tŭ Kơnràñ lơh sir mơ wil tơl bơta Kơnràñ neh lơh nền tòm nùs, Tòm ngai lồi dut, bol mê rơp git wă loh làng bơta hơ̆.

²¹Añ òhềt sồr ală cau gơnoar hwơr do, Mơ bol khai neh ntoat; Añ òhềt đơs mơ bol khai, Mơya bol khai neh đơs hwơr.

²²Dilah bol khai neh ntào tòm bơta bơyai Añ, Gen bol khai neh ràng tơlik jơnau Añ jê làng bol Añ in Mơ lơh bol khai in sang gùng iơh bol khai dê mơ broă iơh bol khai lơh.”

²³Yàng Jehôwa đơs: “Añ ò di ngan la Yàng Tom Trồ ơm rềp mơ ò di la Yàng Tom Trồ ơm ngài ò ơ?”

²⁴Yàng Jehôwa đơs: “Gơs cau lơi rgơi pồn să tòm ală tiah ndơp nàng Añ in ò rgơi gŏ bol khai ơ?” Yàng Jehôwa đơs: “Hơ̆ ò di ngan Añ bềng lìu ală tap trồ mơ ù tiah ơ?

²⁵Añ neh kơno bơta ală cau gơnoar hwơr do đơs, bol khai ai sơnđan Añ mơ đơs hwơr ma blac lah: ‘Añ neh mpau; ngan añ neh mpau!’

²⁶Ală cau gơnoar hwơr hơ̆, jat bơta ma blac nùs bol khai dê mơ đơs hwơr, bol khai gơs nùs behơ̆ jơl tus di tŭ lơi taih?

²⁷Bol khai kòp nă yal wơl bơta mpau cau gơp ƀòn in, kơlôi lah rơp lơh làng bol hŭi sơnđan Añ, kung be ồng pàng bol khai tài bơh Baal hŭi sơnđan Añ.

²⁸Lòi cau gơnoar hwơr lơi gơs mpau yal tĕ mpau; ai cau lơi neh dòp leng jơnau Añ, yal wơl tĕ jơnau Añ dô bă dòn song! Rhe ngan gơs pơnah bal mơ kòi mi ơ?” Yàng Jehôwa đơs behơ̆.

²⁹“Jơnau añ ngan ò di kung be ồs, kung be mut pòng bơcah lŭ ơ?” Yàng Jehôwa đơs behơ̆.

³⁰Gen tàng Yàng Jehôwa đơs lah: “Do, Añ tòmdră mơ ală cau gơnoar hwơr ntung kơñau bal mơ gơp bơh jơnau Añ jê.”

³¹Yàng Jehôwa đơs: “Do, Añ tòmdră mơ ală cau gơnoar hwơr ngui lơmpiat he mơ đơs lah: ‘Yàng Jehôwa đơs.’”

³²Yàng Jehôwa đơs: “Do, Añ tòmdră mơ ală cau ai bơta mpau ma blac mơ đơs hwơr Yàng Jehôwa đơs, ală cau sồr bol khai mơ ală cau tề lam làng bol Añ lòt tìs gùng bơh bơta pơrlồm mơ đơs jòng să bol khai dê; bơh Añ ò sồr mơ ò bơtào bol khai; behơ̆ bol khai ò lơh kwơ dô êt lơi làng bol do in.” Yàng Jehôwa đơs behơ̆.

³³“Dilah làng bol do, cau gơnoar hwơr hala cau gơnoar ơn phan duh khoai, lùp mê lah: ‘Ơnòng kơnjơ̆ Yàng Jehôwa dê la ñchi?’ Ho tĕ lah: ‘Ơnòng kơnjơ̆ hơ̆ la bol mê,’ Yàng Jehôwa đơs: ‘Añ rơp sang lòi bol mê.’

³⁴Ai ală cau gơnoar hwơr, cau gơnoar ơn phan duh khoai, mơ làng bol đơs ‘Ơnòng kơnjơ̆ Yàng Jehôwa dê,’ gen Añ rơp lơh glài cau hơ̆ mơ hìu khai dê.

³⁵Behơ̆, do la sèng kòp nă pal lùp oh mi he lah: ‘Yàng Jehôwa neh ho wơl mbe lơi taih?’ hala ‘Yàng Jehôwa neh đơs mbe lơi taih?’

³⁶Tŭ hơ̆ bañ đơs ‘Ơnòng kơnjơ̆ Yàng Jehôwa dê tai;’ bơh jơnau đơs kòp nă cau dê rơp la dô nơm ơnòng kơnjơ̆ khai dê, bơh bol mê neh lơh tìs ală jơnau đơs Yàng Tom Trồ kis gam sùm dê, Yàng Jehôwa Gơnap Gơnoar, Yàng Tom Trồ bol he dê.

³⁷Behơ̆ mê pal lùp tĕ cau gơnoar hwơr lah: ‘Yàng Jehôwa neh ho wơl mê in mbe lơi taih?’ hala ‘Ñchi jơnau Yàng Jehôwa neh đơs taih?’

³⁸Mơya dilah bol mê đơs lah: ‘Ơnòng kơnjơ̆ Yàng Jehôwa dê,’ tài bơh hơ̆, Yàng Jehôwa đơs: Tài bơh bol mê đơs jơnau do: ‘Ơnòng kơnjơ̆ Yàng Jehôwa dê,’ mơ Añ neh sồr cau tus hơ bol mê nàng sồr bol mê bañ đơs lah: ‘Ơnòng kơnjơ̆ Yàng Jehôwa dê,’

³⁹tài behơ̆, Añ rơp hŭi ngan bol mê; Añ rơp sang bol mê ngài bơh di Añ, mơ ƀòn Añ neh ai bol mê mơ ồng pàng bol mê in, ngài bơh di đap Añ.

⁴⁰Añ rơp lơh bol mê in kong sền òsơp sùm sùm, ƀàssìl ò lồi, ò gơs tŭ lơi rgơi hŭi ò.”