Read koho Jeremi 25 Bible Online

Jeremi 25 - koho bible

Jeremi 25

¹Gơs jơnau tus mơ Jeremi bơh jơh làng bol Juda, tòm nam dơ̆ poan rài Jehôyakim, kòn klau Jôsia, bơtau Juda dê; hơ̆ la nam dơ̆ sơnròp rài Nebukatnessar, bơtau Babilôn,

²la jơnau mơ cau gơnoar hwơr Jeremi neh đơs di đap làng bol Juda mơ jơh ală làng bol tòm Jerusalem lah:

³“Neh bàr jơt pe nam, bơh nam dơ̆ jơt pe rài Jôsia, kòn klau Ammôn, bơtau Juda dê, jơl tus di ngai do jơnau Yàng Jehôwa dê neh đơs mơ añ. Añ neh ò dơh đơs mơ oh mi; mơya oh mi ò bài iat añ.

⁴Yàng Jehôwa neh kong ơt sồr ală dĭ gơna Kơnràñ, la ală cau gơnoar hwơr, mơya oh mi ò bài iat jơnau, ò ơn tồr iat.

⁵Tòm tŭ ală cau hơ̆ đơs lah: ‘Kòp nă tòm bol mê sang tĕ gùng iơh he dê mơ rê wơl; sang tĕ broă lơh iơh bơsak bol mê dê, mơ ơm tòm lơgar mơ Yàng Jehôwa neh ai oh mi mơ ồng pàng oh mi in sùm sùm.

⁶Bañ jat ală yàng ndai nàng duh broă mơ duh khoai bol gơ; bañ ai broă tê bol mê lơh gơs mơ bơrcek Añ gơjrañ, gen Añ rơp ò lơh glài bol mê tai.’

⁷Yàng Jehôwa đơs: ‘Mơya bol mê ò iat Añ, mơ ai broă lơh bơh tê bol mê bơrcek Añ gơjrañ, mơ toès wơl bơta rung rài he in.’

⁸Behơ̆ gen, Yàng Jehôwa Gơnap Gơnoar đơs be do: ‘Tài bơh bol mê ò bài iat jơnau Añ,

⁹do, Añ rơp sồr ală jơi bơtiàn đah đang bal mơ dĭ gơna Añ la Nebukatnessar, bơtau Babilôn, tus tòmdră mơ lơgar do, tòmdră mơ làng bol gơ dê, mơ ală lơgar ơm gùt dar. Añ rơp tơnroh jơh bol khai, lơh bol khai in gơlik gơs bơta cù kìr, dơñŏ tơnhial, mơ tơrlah tơrling sùm sùm.

¹⁰Rlau mơ hơ̆, añ rơp tă bơh mpồl bol khai jơh sap driau chò mơ hòn chò, jơh sap bơrtơu pa mơ ƀan pa, jơh jơnau ntas mpal piah mơ bơta àng ồs đèng dê.

¹¹Jơh lơgar do rơp gơlik gơs tiah sang lòi ngềt ngơt cù kìr, ală lơgar do rơp dòn duh bơtau Babilôn tòm poh jơt sơnam.’

¹²Yàng Jehôwa đơs: ‘Tŭ poh jơt sơnam hơ̆ neh rlau, Añ rơp lơh glài bơtau Babilôn mơ làng bol khai, tài bơh tồi glài iơh bơsak bol khai dê. Añ rơp lơh glài lơgar cau Kalde mơ lơh gơlik gơs tiah sang lòi ngềt ngơt sùm sùm.

¹³Bơh jơnau Añ neh đơs tòmdră mơ lơgar hơ̆, hơ̆ la jơnau cih tòm sră do, la jơnau Jeremi neh đơs hwơr tòmdră mơ jơh ală lơgar, gen rơp gơlik gơs lơgar hơ̆ in.

¹⁴Mơ tai, rơp gơs oă lơgar mơ ală cau bơtau dờng kup cau Kalde gơs dĭ, mơ Añ rơp tơm wơl bol khai in jat broă bol khai lơh, mơ jat broă tê bol khai neh lơh.’”

¹⁵Jehôwa Yàng Tom Trồ Israel dê neh đơs mơ añ be do: “Ai tĕ mơngàn tơrnòm bơta gơjrañ lik bơh tê Añ, mơ ală làng bol mơ Añ neh sồr mê tus pal ñô gơ.

¹⁶Bol khai rơp ñô, rơp lòt gơsèng, mơ lu sơnrang, tài bơh pềs tà mơ Añ rơp sồr tus digùl bol khai.”

¹⁷Behơ̆ Añ ai mơngàn lik bơh tê Yàng Jehôwa, mơ lơh kòp nơm lơgar mơ Yàng Jehôwa sồr Añ tus ñô gơ:

¹⁸Ai Jerusalem mơ ală ƀòn Juda dê, ală bơtau mơ ală kwang at bồ gơ dê, lơh bol gơ in gơlik gơs tiah sang lòi ngềt ngơt, kong sền òsơp, kong srat sơntơm kung be ngai do;

¹⁹Pharaôn, bơtau lơgar Ejiptơ, ală cau dĭ gơna khai, ală kwang at bồ mơ làng bol khai;

²⁰ală làng bol ơm bơcă bal, ală bơtau lơgar Us, ală bơtau lơgar Philistin: hơ̆ la bơtau Askalôn, Gaja, Ekrôn, mơ ală cau gam kis ơm tòm Asdôt;

²¹ai Edôm, ai Môap, ai kòn sau Ammôn in;

²²ală bơtau Tirơ, ală bơtau Sidôn, mơ ală bơtau ơm tòm bồt pơlào tòm dàlềng in;

²³Dedan, Thema, Bus, ală cau koah sŏ gùt dar bồ;

²⁴ală bơtau Arabi, ală bơtau ală lơgar cau ơm tòmpơrlŭ bal tòm ƀlàng bràs;

²⁵jơh ală bơtau Simri, bơtau Elam, bơtau Medi dê;

²⁶ală bơtau đah đang dê, rềp hala ngài, bơtau do mơ bơtau ne in, ală lơgar ơm tòm làm plai ù. Tơnơ̆ hơ̆ bơtau Sesak dê kung rơp ñô sơl.

²⁷“Mê pal đơs mơ bol khai lah: Yàng Jehôwa Gơnap Gơnoar, Yàng Tom Trồ Israel dê, đơs be do: ‘Ñô tĕ, bơñul tĕ, tuh hă tĕ, gơpừ tĕ, bañ guh tai, tài bơh pềs tà mơ Añ rơp sồr tus digùl bol mê!’

²⁸Dilah bol khai ò bài dòp mơngàn bơh tê mê nàng ñô, gen mê pal đơs lah: Yàng Jehôwa Mpồl Ling dê đơs be do: ‘Ngan bol mê pal ñô!

²⁹Sền tĕ, Añ rơp sơntòm tuh bơta rung rài hơđang ƀòn geh sơnđan bơh sơnđan Añ; tơ ài lah bol mê, ngan rơp geh klàs bơh bơta lơh glài ơ? Ò! Bol mê rơp ò klàs bơh bơta lơh glài ò; bơh Añ rơp sồr pềs tà tus hơđang kòp làng bol ơm hơđang plai ù,’” Yàng Jehôwa Mpồl Ling đơs behơ̆.

³⁰“Gen tàng mê ai tĕ ală jơnau do đơs hwơr tòmdră mơ bol khai, mơ đơs lah: ‘Yàng Jehôwa rơp rơnđơh bơh hơđang; Bơh tiah ơm sàng goh Kơnràñ tơlik sap đơs; Kơnràñ rơp rơnđơh pràn ngan tòmdră mơ mpồl belàt; Ai jơnau driau kung be ală cau pat plai ño, Tòmdră mơ jơh ală làng bol tòm plai ù.

³¹Jơnau nggồr rơp tus làm plai ù; bơh Yàng Jehôwa lơh nền glài tòmdră mơ ală lơgar, Bơh Yàng Jehôwa cahrña jơh ală poac să, mơ ală cau tìs glài Kơnràñ phi pềs tà in.’ Yàng Jehôwa đơs behơ̆.

³²Yàng Jehôwa Gơnap Gơnoar đơs be do: ‘Sền tĕ, bơta rung rài neh rsìh làm jơh, Bơh lơgar do tus hơ lơgar ne; Mơ càl rbut dờng neh gơlơnggac. Bơh tiah ngài rlau jơh plai ù dê.’

³³Ală cau mơ Yàng Jehôwa neh tơnchơt tòm ngai hơ̆, rơp bềng hơđang ù bơh bồ tus di lồi plai ù; Bol khai rơp ò gơs cau ñìm, ò gơs cau tơrgòm, hala tơp, bol khai rơp gơlik gơs phan pơnđồm ù!

³⁴Ơ ală cau ê, ñìm rac tĕ, pơt wòl tĕ! Ơ ală cau ê mpồl belàt, pơrlac tĕ să tòm bùh! Tài bơh ală ngai bol mê kong tơnchơt neh tus rau, mơ ngai mê kong nrah nring neh tus; Bol mê rơp gơpừ mơ bơcah kung be gri màng ryŭ.

³⁵Cau ê ò gơs tiah dô pleh, cau tòm mpồl belàt ò gơs tiah nàng dô pleh.

³⁶Ne, cau ê hòi driau, Cau tòm mpồl belàt ñìm rac; Tài bơh Yàng Jehôwa tơnroh ƀlàng ñhơt bol khai dê,

³⁷Mơ ală mpồl belàt ring lơngai neh kong sang lòi, Tài bơh bơta gơhào gơjrañ Yàng Jehôwa dê.

³⁸Kơnràñ kung be klìu triă neh lik bơh rgồng he dê. Lơgar bol khai neh gơlik gơs tiah lòi srau, tài bơh đào jàñ bơsak, mơ tài bơh bơta gơjrañ dờng Yàng dê.”