Read koho Jeremi 29 Bible Online

Jeremi 29 - koho bible

Jeremi 29

¹Do la ală jơnau tòm sră pơyoa cau gơnoar hwơr Jeremi dê bơh ƀòn Jerusalem, pơyoa ală cau kwang kra kòl kup cèng lơh dĭ in, bal mơ ală cau gơnoar ơn phan duh khoai, ală cau gơnoar hwơr, bal mơ jơh ală làng bol mơ bơtau Nebukatnessar neh kup cèng bơh Jerusalem rê hơ Babilôn,

²tơnơ̆ mơ tŭ Jekônia, mè cau bơtau, kwang kơndời, ală kwang dờng at bồ Juda mơ Jerusalem dê, cau chài lơh broă mơ cau chài tiar neh lik lòt ngài bơh Jerusalem rau.

³Sră pơyoa do pơyoa bơh tê Eleajar, kòn Saphan, mơ Gemaria, kòn klau Hilkia, la bàr nă cau mơ Jedekia, bơtau Juda, sồr tus hơ lơgar Babilôn, tòm mat Nebukatnessar, bơtau Babilôn. Sră pơyoa be tơnơ̆ do:

⁴“Yàng Jehôwa Gơnap Gơnoar, Yàng Tom Trồ Israel dê, đơs mơ ală cau mơ Kơnràñ neh lòi gơkòl kup cèng gơs dĭ bơh Jerusalem tus hơ Babilôn be do:

⁵‘Bơt bơtào tĕ hìu mơ ơm; tam tĕ suơn ño mơ sa,

⁶jòi tĕ bau ùr, tơnggơs kòn klau mơ kòn ùr; jòi tĕ bau ùr kòn klau in, mơ lap klau kòn ùr in, tồ bol khai in tơnggơs kòn klau mơ kòn ùr. Khà bol mê pal bơtơl oă tềng hơ̆ bañ lòi gơhuc wơl.

⁷Jòi tĕ bơta lơngap lơngai ƀòn dờng mơ Añ neh lòi bol mê in kong bơtrơh, pal tài bơh bol khai hòi dan mơ Yàng Jehôwa; tài bơh bơta lơngap lơngai bol mê, kơnòm di bơta lơngap lơngai gơ dê.’”

⁸Yàng Jehôwa Gơnap Gơnoar, Yàng Tom Trồ Israel dê, đơs be do: “Bañ lòi ală cau gơnoar hwơr ma blac ơm digùl bol mê mơ ală cau sền dà pơrlồm bol mê; kung bañ iat ală bơta yal blac bơh mpau bol khai neh gŏ.

⁹Tài bơh bol khai ai sơnđan Añ mơ đơs hwơr ma blac bol mê in. Añ ò tŭ lơi sồr bol khai.” Yàng Jehôwa đơs behơ̆.

¹⁰Mơ tai, Yàng Jehôwa đơs be do: “Tŭ poh jơt sơnam neh tơl Babilôn in, Añ rơp lòt còp bol mê, rơp lơh wil tơl jơnau ho pơgon niam mơ bol mê, mơ cèng bol mê rê wơl hơ tiah do.”

¹¹Yàng Jehôwa đơs: “Bơh Añ git bơta kơlôi sơnơng Añ jê gơwèt mơ bol mê, la bơta kơlôi sơnơng lơngap lơngai, ò di la rung rài, nàng bol mê in geh bơta gơn kơnòm tòm ngai tơnơ̆ bol mê dê.

¹²Tòm tŭ bol mê hòi Añ, mơ tus mơ hòi dan mơ Añ, Añ rơp dòp jơnau.

¹³Tòm tŭ bol mê jòi Añ, bol mê rơp bàn Añ, dilah bol mê jòi Añ jơh nùs.”

¹⁴Yàng Jehôwa đơs: “Añ rơp ai bol mê in jòi bàn Añ, rơp bơtào wơl ală sre brê bol mê dê, mơ rơp tơrgòm bol mê bơh ală lơgar mơ bơh ală tiah Añ neh bơtrơh bol mê, mơ Añ rơp cèng brê bol mê wơl hơ tiah Añ neh tă bol mê.”

¹⁵Bol mê neh đơs lah: “Yàng Jehôwa neh bơtào gơs ală cau gơnoar hwơr bol mê in tòm Babilôn!”

¹⁶Gen tàng, Yàng Jehôwa đơs be do bơh bơtau ơm nggui hơđang sơbàn Dabit mơ làng bol tòm ƀòn do, kung đơs bơh oh mi bol mê dê, la ală cau ò gơkòl kup cèng gơs dĭ bal mơ bol mê.

¹⁷Behơ̆, do la jơnau Yàng Jehôwa Gơnap Gơnoar đơs: “Ngan, Añ rơp sồr pềs tà, jơgloh rung, mơ pluh plàng tus hơđang bol khai, rơp lơh bol khai in tòm toh be ală plai chi ƀal ồm, tian gơs cau ò rgơi sa.

¹⁸Añ rơp ai pềs tà, jơgloh rung mơ pluh plàng ting jat bol khai, rơp lơh bol khai in gơlik dô bơta rngòt rngơt digùl ală lơgar tòm dunnia, lơh gơs bơta srat sơntơm, cù kìr, dơñŏ tơnhial, ƀàssìl ƀàsso digùl ală làng bol mơ Añ neh bơtrơh bol khai tus.”

¹⁹Yàng Jehôwa đơs: “Hơ̆ la tài bơh bol khai ò iat jơnau Añ, tŭ Añ neh kong ơt mơ sồr dĭ gơna Añ, la ală cau gơnoar hwơr, ai jơnau hơ̆ lòt tus mơ bol khai; mơya bol mê ò bài iat,” Yàng Jehôwa đơs behơ̆.

²⁰Gen tàng, ơ bol mê la ală cau kong kup cèng ngài bơh lơgar mơ Añ neh cèng bơh Jerusalem tus Babilôn, iat tĕ jơnau Yàng Jehôwa:

²¹“Yàng Jehôwa Gơnap Gơnoar, Yàng Tom Trồ Israel dê, đơs be do bơh Ahap, kòn klau Kôlayah, mơ Jedekia, kòn klau Maaseyah, la ală cau ai sơnđan Añ đơs hwơr ma blac: ‘Añ rơp phi bol khai tòm tê Nebukatnessar, bơtau Babilôn, khai rơp tơnchơt bol khai di đap mat bol mê.’

²²Kòp nă cau Juda kong kup cèng ngài tòm Babilôn rơp ai bàr nă cau hơ̆ lơh gơs dô sèng srat rma, mơ lah: ‘Dan Yàng Jehôwa lơh mê in kung be Jedekia mơ Ahap, mơ bơtau Babilôn neh buh tòm ồs!’

²³Tài bơh bol khai neh lơh bơta tồi glài iơh rmơh tòm Israel, neh tìs glài rềs àr bơrnàn mơ bau ùr ală cau gơp ƀòn he, mơ neh ai sơnđan Añ đơs ală jơnau ma blac mơ Añ ò tŭ lơi sồr bol khai. Să tòm Añ la Bơtau git loh mơ lơh cơng bơh bơta hơ̆.” Yàng Jehôwa đơs behơ̆.

²⁴“Mê kung pal đơs bơh Semaya ơm tòm Nehelam lah:

²⁵Yàng Jehôwa Gơnap Gơnoar, Yàng Tom Trồ Israel dê, đơs be do: ‘Mê neh ai sơnđan să he pơyoa sră jơh làng bol Jerusalem in, ai Sôphôni, kòn klau Maaseyah, cau gơnoar ơn phan duh khoai, mơ jơh ală cau gơnoar ơn phan duh khoai in lah:

²⁶Yàng Jehôwa neh bơtào mê lơh gơs cau gơnoar ơn phan duh khoai ala Jehôyada, la cau gơnoar dờng ơn phan duh khoai, sền gàr tòm hìu Yàng Jehôwa, dilah cau lơi gơla bơrngơl sơnđan he la cau gơnoar hwơr, gen kup tĕ, dò gơsàng mơ kơt sreng wơl.

²⁷Behơ̆ gen ñchi bơh tài mê ò lah sơrpah Jeremi ơm tòm Anatôt, la cau sơnđan he la cau gơnoar hwơr bol mê in behơ̆ taih?

²⁸Mơ tai, să tòm khai neh pơyoa jơnau tus hơ Babilôn đơs mơ bol hi lah: Bơta kong kup gơs dĭ gam jŏ ngai; bơt tĕ hìu nàng ơm; tam tĕ suơn nàng sa plai.’”

²⁹Cau gơnoar ơn phan duh khoai Sôphôni neh sền sră do cau gơnoar hwơr Jeremi in iat.

³⁰Tŭ hơ̆ gơs jơnau Yàng Jehôwa đơs mơ Jeremi lah:

³¹“Sồr yal tĕ ală bơta do kòp nă cau kong kup cèng ngài bơh lơgar in git lah: Yàng Jehôwa đơs bơh Semaya ơm tòm Nehelam be do: ‘Bơh Semaya neh đơs hwơr bol mê in, mơ Añ òhềt tŭ lơi sồr khai, mơ khai neh lơh bol mê in kơnòm di bơta ma blac,’

³²gen tàng Yàng Jehôwa đơs be do: ‘Añ rơp lơh glài Semaya, cau Nehelam, mơ jơi bơtiàn khai. Bơh jơi bơtiàn khai, khai rơp ò gơs cau lơi ơm digùl làng bol do gŏ bơta niam Añ rơp lơh làng bol Añ in, bơh khai neh đơs bơta tòmdră mơ Yàng Jehôwa,’” Yàng Jehôwa đơs behơ̆.