Read koho Jeremi 3 Bible Online

Jeremi 3 - koho bible

Jeremi 3

¹Yàng Jehôwa đơs: “Dilah dô nă cau klau sang lòi bau ùr khai dê, Mơ bau ùr lòt bau mơ cau klau ndai, Gen bau klau rơp rê wơl bau mơ cau ùr hơ̆ sơl? Bơta hơ̆ ò lơh lơgar in ngkòr ngkàc dờng ngan sơl ơ? Mê neh lơh gơlềng gơlàng mơ oă ngan cau gơboh, mơ mê kòñ rê wơl mơ Añ ơ?

²Sền tơnggòr tĕ ală tiah jơnhoa kơlờl, mơ sền tĕ! Gơs tiah lơi mơ mê ò lơh rềs àr bơrnàn sơl? Di gah gùng mê ơm nggui nàng gơn cau lơh tir, kung be dô nă cau Arap tòm ƀlàng ngềt ngơt; Mê neh lơh ngkòr ngkàc ù tiah, mơ bơta dri tơlàr gơlềng gơlàng.

³Behơ̆ tàng mìu nhàc neh kòl krơ̆ wơl, mơ mìu bồ sơnam kung ò tus. Mơya mê gam pò bìng liang kung be cau ùr dri tơlàr; Ò git ƀàssìl.

⁴Bơh do jơl hìng nau mê rơp ò hòi di Añ lah: ‘Ơ bèp añ, Kơnràñ la cau bơyô añ jê, tŭ añ gam kơnòm să,

⁵Kơnràñ rơp gơjrañ sùm sùm, Mơ Kơnràñ prap bơta gơjrañ dờng tus lồi dut ơ?’ Do, bulah mê đơs behơ̆, Mơya mê gam lơh jơh ală bơta iơh mơ mê rgơi lơh.”

⁶Tòm rài bơtau Jôsia, Yàng Jehôwa đơs mơ añ lah: “Mê neh gŏ bơta ò dòn song cau Israel dê neh lơh, mbe khai neh guh hơđang kòp nơm dòr jơnhoa, mơ hơđơm kòp nơm chi tơlir, mơ lơh bơta rềs àr bơrnàn tềng hơ̆ sơl?

⁷Mơ Añ neh kơlôi lah: ‘Tơnơ̆ mơ tŭ khai neh lơh jơh ală bơta hơ̆, gen khai rơp rê wơl mơ Añ.’ Mơya khai ò rê wơl. Oh ùr lac lèo khai dê la Juda neh gŏ bơta hơ̆.

⁸Khai neh gŏ lah jơh ală cau Israel neh tìs glài rềs àr bơrnàn bơh ò dòn song, Añ neh sang lòi khai mơ neh lơh sră tòmlòi bau, mơya oh ùr rềs àr bơrnàn khai dê la Juda ò duh rngòt, mơya khai kư̆ sơlo lòt lơh dri tơlàr.

⁹Tài bơh khai sền òsơp bơta rềs àr bơrnàn he, gen lơh ƀơ̆ ƀơl ù tiah, rềs àr tòmtir mơ lŭ mơ chi.

¹⁰Bulah behơ̆, oh ùr lac lèo khai dê la Juda, kung ò rê wơl mơ Añ dô bă jơh nùs, mìng lơh ma blac lơm,” Yàng Jehôwa đơs behơ̆.

¹¹Gen Yàng Jehôwa đơs mơ añ lah: “Israel ò dòn song gam song ring rlau mơ Juda ma blac.

¹²Lòt tĕ mơ yal tơnggit ală jơnau do wèt hơ đah đang lah: ‘Ơ Israel ò dòn song, rê wơl tĕ! Yàng Jehôwa đơs, Añ rơp ò sền di ai mơ muh mat gơjrañ tai, Bơh Añ jak nđàc sơngit; Añ ò prap bơta gơjrañ sùm sùm.’ Yàng Jehôwa đơs behơ̆.

¹³‘Mìng mê pal dòp git tồi glài mê dê, Mê neh pơrlơ̆ dră mơ Jehôwa Yàng Tom Trồ mê dê; Mê neh lòt nrah nring digùl ală yàng ndai hơđơm kòp nơm chi tơlir, Mơ ò lơh jat jơnau Añ.’” Yàng Jehôwa đơs behơ̆.

¹⁴Yàng Jehôwa đơs: “Ơ kòn sau pơrlơ̆ dră, rê wơl tĕ! Bơh Añ la cau tòm bol mê dê. Añ rơp sac dô nă tòm kòp nơm ƀòn dờng, mơ bàr nă bơh kòp hìu nhă, Mơ Añ rơp cèng mê tus hơ Siôn.

¹⁵Añ rơp ai bol mê in ală cau ê gàr jat nùs kòñ Añ jê, la ală cau rơp ai bơta àng loh jak chài mơ ròng siam bol mê.”

¹⁶Yàng Jehôwa đơs: “Tòm tŭ bol mê neh tơnggơs bơtơl oă tòm ù, tòm ngai hơ̆ cau rơp ò đơs bơh Đài Bơta Ho Bal Yàng Jehôwa dê tai! Cau rơp ò kơlôi sơnơng tai, ò kah tai, ò pơlai tai, mơ ò lơh dô nơm Đài ndai tai.

¹⁷Tòm rài hơ̆ cau rơp sơnđan Jerusalem la sơbàn Yàng Jehôwa dê, mơ jơh ală lơgar gen pơjum wơl tòm Jerusalem, bơh sơnđan Yàng Jehôwa; mơ ò cơnđòa jat bơta kră kơldang nùs iơh bơsak he dê tai.

¹⁸Tòm ală ngai hơ̆ hìu Juda rơp ơm dô bă bal mơ hìu Israel, mơ bol khai rơp tus dô bă bal bơh ù tiah đah đang rê wơl tòm ù tiah mơ Añ ai ồng pàng bol mê in lơh gơs sre brê.

¹⁹Añ neh kơlôi lah: ‘Añ rơp ơn mê digùl ală kòn sau Añ jê, Añ rơp ai mê in dô bă tiah ù niam, Phan jơtài hàng mơnĕ rlau jơh tòm ală lơgar Añ neh kơlôi: Mê rơp hòi di Añ la “Bèp Añ jê!” Mơ ò pơrlac sang bơh bơta lòt jat Añ.

²⁰Mơya, ơ cau Israel, Ngan kung be dô nă cau ùr ò dòn song sang lòi bau klau be lơi, Gen bol mê kung ò dòn song mơ Añ behơ̆ sơl.’” Yàng Jehôwa đơs behơ̆.

²¹Gơs jơnau đơs bơh hơđang ală dòr kơlờl: Hơ̆ la sap kòn sau Israel ñìm rac, Tài bơh bol khai neh lơh rkwet rkwe gùng bol khai dê; bol khai neh hŭi Jehôwa Yàng Tom Trồ bol khai dê.

²²“Ơ kòn sau pơrlơ̆ dră, rê wơl tĕ! Añ rơp sơm bơta ò dòn song bol mê dê.” Bol mê đơs lah: “Do, bol hi rê wơl mơ Kơnràñ, Bơh Kơnràñ la Jehôwa Yàng Tom Trồ bol hi dê.

²³Ngan, gơn bơta dong kòl di ală dòr la ò kwơ, Jơnau nggồr nggàc hơđang ală mơnơm la blac pơrlồm; Ngan tòm Jehôwa Yàng Tom Trồ bol hi dê, La bơta dong klàs Israel dê.

²⁴Mơya bơh tŭ bol hi gam kơnòm să, Rùp ràk ƀàssìl neh loan jơh ală phan mơna ồng pàng bol hi dê kong lơh broă bòl glar, Mpồl belàt, mpồl kơnrồ, Kòn klau, kòn ùr bol khai dê.

²⁵Lòi bol hi bic tòm bơta ƀàssìl bol hi dê, mơ lòi bơta bơrsèl tơnhial jơm bol hi! Bơh bol hi bal mơ ồng pàng bol hi dê Neh tìs glài mơ Jehôwa Yàng Tom Trồ bol hi dê, Bơh tŭ gam kơnòm jơl tus di ngai do; Bol hi ò lơh jat jơnau Jehôwa Yàng Tom Trồ bol hi dê.”