Read koho Jeremi 32 Bible Online

Jeremi 32 - koho bible

Jeremi 32

¹Nam dơ̆ jơt rài Jedekia bơtau Juda; hơ̆ la nam dơ̆ jơt phàm rài bơtau Nebukatnessar, gơs jơnau Yàng Jehôwa đơs mơ Jeremi.

²Tŭ hơ̆ mpồl ling bơtau Babilôn dê gơrwàng gùt dar ƀòn dờng Jerusalem; ai cau gơnoar hwơr Jeremi gen neh kong jàm di tiah rơng hìu ling kơp gàr tòm gơlang bơtau Juda.

³Bơh Jedekia, bơtau Juda neh jàm khai, đơs lah: “Ñchi bơh tài mê đơs hwơr lah: Yàng Jehôwa đơs be do: ‘Do, Añ rơp phi ƀòn dờng do tòm tê bơtau Babilôn, khai rơp tòmpìt ai;

⁴Jedekia, bơtau Juda, rơp ò pleh klàs bơh tê cau Kalde, mơya ngan rơp kong jào tòm tê bơtau Babilôn, rơp đơs mơ bơtau hơ̆ bơr mơ bơr, mat sền mat;

⁵Bơtau hơ̆ rơp cèng Jedekia tus hơ Babilôn, khai rơp ơm tềng hơ̆ jơl tus di tŭ Añ lơh gơlik gơs ală bơta gơwèt hơ khai, dilah bol mê tòmlơh mơ cau Babilôn, bol mê rơp ò geh cồng nha.’ Yàng Jehôwa đơs behơ̆.”

⁶Jeremi neh đơs: “Gơs jơnau Yàng Jehôwa đơs mơ añ lah:

⁷Hanamel, kòn klau Salum wa mê, rơp tus hơ mê mơ đơs lah: ‘Blơi tĕ sre añ jê tòm Anatôt bơh mê la cau jơi bơtiàn rềp rlau jơh, mê gơs gơnoar mơ broă tòm nàng blơi gơ.’

⁸Gen jat be jơnau Yàng Jehôwa neh đơs, Hanamel, kòn klau oh bèp añ jê tus hơ añ tòm rơng hìu cau ling kơp gàr mơ đơs lah: ‘Añ dan mê blơi tĕ sre añ jê tòm Anatôt, tòm ù tiah Benjamin dê, bơh mê geh gơnoar tơwài wơl sre hơ̆ mơ lơh gơs sre brê mê dê gen blơi tĕ gơ să tòm mê in.’ Tŭ hơ̆ añ đal git hơ̆ la jơnau Yàng Jehôwa dê.

⁹Behơ̆ añ neh blơi sre tòm Anatôt bơh di Hanamel, kòn klau wa añ, mơ añ kơr jơt poh sieklơ priă tơm khai in.

¹⁰Añ cih mat mơ tap ƀang kì tòm sră cơng tàng blơi sre, jà cau lơh cơng mơ kơr priă hơđang phan kơr.

¹¹Gen añ dòp sră cơng tàng blơi sre, sră neh gơs tap ƀang kì gơs cih ală jơnau gơwèt hơ bơta tac mơ blơi sre jat bơta boh lam ƀòn lơgar dê, bal mơ sră tòm toh behơ̆ mơya ò gŏ tap ƀang kì.

¹²Añ tong sră cơng tàng blơi sre hơ̆ Baruk in, kòn klau Neriya, sau Maaseya, di đap Hanamel, kòn klau wa añ, di đap ală cau lơh cơng neh cih sơnđan mat tòm sră cơng tàng tac sre, mơ di đap jơh ală cau Juda ơm nggui tòm rơng hìu cau ling kơp gàr.

¹³Di đap bol khai, añ nting sồr Baruk lah:

¹⁴Yàng Jehôwa Gơnap Gơnoar Dờng Làm Jơh la Yàng Tom Trồ Israel dê đơs be do: ‘Ai tĕ ală sră cơng tàng blơi sre do, sră cơng tàng neh gơs tap ƀang kì, mơ sră cơng tàng ò gơs tap ƀang kì mơ ơn tòm dô nơm gri mơ ù nàng ală sră hơ̆ gam prap niam tòm jŏ ngai.’

¹⁵Bơh Yàng Jehôwa Gơnap Gơnoar Dờng Làm Jơh la Yàng Tom Trồ Israel dê, đơs be do: ‘Cau rơp gam blơi hìu, sre, mơ suơn ño tòm lơgar do tai sơl.’

¹⁶Tơnơ̆ mơ tŭ añ neh dòp sră cơng tàng blơi sre Baruk in la kòn klau Neriya, gen añ hòi dan mơ Yàng Jehôwa lah:

¹⁷‘Khoai Yàng Jehôwa, Kơnràñ neh ngui gơnap gơnoar dờng làm jơh mơ pò tơlik tơwòr Kơnràñ dê mơ crơng gơs ală tap trồ mơ tiah; ò gơs bơta lơi la kalke Kơnràñ in.

¹⁸Kơnràñ ràng tơlik bơta kòñ gơboh kơ̆ dơn gơwèt hơ rbô rài, mơya lơh glài bơh bơta tồi glài ồng pàng dê hơđang kòn sau tòm rài tơnơ̆. Khoai Yàng Tom Trồ dờng mơ gơs gơnap gơnoar làm jơh, sơnđan Kơnràñ la Yàng Jehôwa Gơnap Gơnoar Dờng Làm Jơh.

¹⁹Ală tơnggume broă Kơnràñ dê la dờng, ală broă lơh Kơnràñ dê la gơs gơnoar pràn. Gar mat Kơnràñ dê pò sền jơh ală gùng dà kòn mơnus dê, nàng tơm wơl kòp nă cau in jat gùng dà khai dê, mơ jat cồng nha broă lơh khai dê.

²⁰Kơnràñ neh lơh bơta krơi tềl is tòm Ejiptơ mơ kư̆ pơnjat lơh sùm jơl tus di ngai do, tòm Israel kung be digùl jơh kòn mơnus tòm dunnia, mơ Kơnràñ neh geh tiơng pơnro jơl tus di ngai do.

²¹Kơnràñ neh cèng làng bol Israel Kơnràñ dê lik bơh lơgar Ejiptơ ngui bơta krơi tềl is, tê pràn, mơ tơwòr tê pò tơlik bal mơ bơta rngòt rngơt dờng.

²²Kơnràñ ai bol khai in lơgar do, la lơgar bềng lìu dà toh mơ dà lơwe, mơ Kơnràñ neh srat să ai ồng pàng bol khai in.

²³Bol khai neh mut ai lơgar do lơh gơs sre brê, mơya bol khai ò dòn bơr Kơnràñ, ò lòt jat bơta boh lam Kơnràñ dê, ò lơh jat dô bơta lơi tòm ală bơta Kơnràñ neh nting sồr pal lơh jat. Tài behơ̆ tàng Kơnràñ neh dùh ală bơta rung rài do hơđang bol khai.

²⁴Ne, ală theng gơrwàng kơ̆ cê neh geh bơt gùt dar ƀòn nàng tòmpìt ai gơ. Tài bơh pềs tà, jơgloh rung, pluh plàng, gen tàng ƀòn kong phi tòm tê cau Kalde tòmlơh mơ bol khai. Bơta Kơnràñ đơs neh gơlik gơs, be Kơnràñ neh gŏ!

²⁵Ơ Yàng Jehôwa, Kơnràñ neh đơs mơ añ lah: “Ai tĕ khà priă blơi sre do, mơ jà ală cau lơh cơng.” Mơ ne, ƀòn dờng neh kong phi tòm tê cau Babilôn!’”

²⁶Gơs jơnau Yàng Jehôwa geh đơs mơ Jeremi lah:

²⁷“Do, Añ la Jehôwa, Yàng Tom Trồ ală jơi poac să dê; gơs bơta lơi kalke Añ in sơl ơ?

²⁸Gen tàng, Yàng Jehôwa đơs be do: Añ rơp phi ƀòn do tòm tê cau Kalde, tòm tê Nebukatnessar, bơtau Babilôn, khai rơp tòmpìt ai.

²⁹Ală cau Kalde tòmlơh mơ ƀòn do rơp tus, ơn ồs mơ chu gơ, chu tơn ală hìu mơ cau neh ơn kơlhô Baal in hơđang rkàng hìu, mơ ơn phan pơdơng ñô ală yàng ndai, nàng bơrcek Añ gơjrañ.

³⁰Mơ tai, kòn sau Israel mơ kòn sau Juda, bơh tŭ gam kơnòm să, mìng lơh bơta iơh bơsak di đap Añ; bơh kòn sau Israel mìng ai broă lơh tê he mơ bơrcek Añ gơjrañ, Yàng Jehôwa đơs behơ̆.

³¹Ƀòn dờng do neh lơh kai Añ in gơhào gơjrañ, bơh tŭ pa bơtào gơs jơl tus ngai do. Gen tàng, Añ kòñ tă tơlik gơ ngài bơh di đap Añ,

³²tài bơh bơta iơh bơsak mơ kòn sau Israel mơ kòn sau Juda neh lơh nàng bơrcek Añ gơjrañ, bol khai, cau bơtau, kwang at bồ, cau gơnoar ơn phan duh khoai, cau gơnoar hwơr, cau Juda mơ làng bol Jerusalem sơl.

³³Bol khai ò wèt mat mơ Añ, mơya wèt ngkòi. Bulah Añ neh bơto sồr bol khai, guh gòñ mơ bơto tơngkah, mơya bol khai ò bài iat, ò dòp bơta bơto sồr.

³⁴Bol khai neh ơn ală rùp ràk cù kìr tòm hìu geh sơnđan bơh sơnđan Añ, nàng lơh gơs ƀơ̆ ƀơl.

³⁵Bol khai neh bơt ală tiah jơnhoa Baal in tòm thòng kòn klau Hinôm, chu kòn klau kòn ùr he tòm ồs, ơn Molok in, la bơta Añ ò tŭ lơi ai gơnoar sồr; Añ ò tŭ lơi kơlôi sơnơng lah bol khai rgơi lơh dô bơta cù kìr behơ̆ mơ lơh Juda in tìs glài.

³⁶Gen tàng tŭ do, bơh ƀòn dờng do, mơ bol mê đơs lah gơ neh phi tòm tê bơtau Babilôn bơh pềs tà, jơgloh rung, pluh plàng, gen Jehôwa, Yàng Tom Trồ Israel dê, đơs be do:

³⁷‘Añ rơp pơjum tơrgòm bol khai wơl bơh ală lơgar mơ Añ neh bơtrơh bol khai tài bơh gơhào gơjrañ, mơ gơjrañ dờng; Añ rơp cèng bol khai rê wơl tòm tiah do, lòi bol khai in ơm lơngap lơngai.

³⁸Bol khai rơp lơh gơs làng bol Añ, mơ Añ rơp lơh gơs Yàng Tom Trồ bol khai dê.

³⁹Añ rơp ai bol khai in dô nơm nùs mơ dô nơm gùng, tồ bol khai duh rngòt di Añ sùm sùm, bơh bơta niam bol khai in mơ niam kòn sau bol khai in pơnjat tơnơ̆.

⁴⁰Añ rơp bơtào bơta ho bal gam sùm sùm mơ bol khai; ò tŭ lơi sang lòi mơya kư̆ ai lơngai bol khai in; mơ Añ rơp ơn bơta duh rngòt di Añ tòm nùs, nàng bol khai ò sang lòi Añ.

⁴¹Añ rơp chò hòp mơ ai lơngai bol khai in, mơ Añ rơp tam bol khai tòm lơgar do tòm bơta dòn song, mơ jơh nùs jơh hwềng soàn Añ jê.’

⁴²Yàng Jehôwa đơs: ‘Kung be Añ neh cèng bơta rung rài dờng hơđang làng bol do kàr lơi, gen Añ kung rơp dùh ală bơta lơngai lơngò Añ neh ho mơ bol khai.

⁴³Cau rơp blơi sre tòm lơgar do mơ bol mê đơs lah: “Hơ̆ la dô bă tiah lòi srau, ò gơs cau ơm, kung ò gơs phan poan jơng, neh kong phi tòm tê cau Kalde.”

⁴⁴Cau rơp ngui khà priă blơi sre tềng hơ̆, cih sră cơng tàng tac, tap ƀang kì, cau lơh cơng, tòm lơgar Benjamin mơ gùt dar Jerusalem, tòm ală ƀòn dờng Juda mơ tòm ală ƀòn tiah mơnơm, ală ƀòn tiah ring mơ ală ƀòn tiah Negep. Bơh Añ rơp cèng ală cau kong kup cèng gơs dĭ rê wơl.’” Yàng Jehôwa đơs behơ̆.