Read koho Jeremi 36 Bible Online

Jeremi 36 - koho bible

Jeremi 36

¹Nam dơ̆ poan rài Jehôyakim, kòn klau Jôsia, bơtau Juda, gơs jơnau Yàng Jehôwa dê đơs mơ Jeremi lah:

²“Ai tĕ dô dap sră, cih wơl tòm hơ̆ ală jơnau Añ neh đơs mơ mê tòmdră mơ Israel, Juda, mơ jơh ală lơgar, bơh ngai Añ rơp sơntòm đơs mơ mê, bơh rài Jôsia, jơl tus ngai do.

³Tồ cau Juda rơp git ală bơta rung rài lơh nền dùh hơđang bol khai, nàng kòp nă rê wơl sang gùng iơh he, tồ Añ in rgơi toh bơta iơh bơsak mơ tồi glài bol khai dê.”

⁴Gen Jeremi hòi Baruk, kòn klau Neriya tus, Baruk kơnòm di bơr Jeremi yal wơl, gen cih jơh ală jơnau đơs Yàng Jehôwa dê yal khai in tòm dap sră.

⁵Mơ Jeremi sồr Baruk lah: “Añ gơkòl kơryan, ò geh mut tòm hìu Yàng Jehôwa;

⁶gen tus di ngai ơt sa, să tòm mê lòt tus tĕ tòm hìu Yàng Jehôwa, sền tĕ làng bol in iat jơnau Yàng Jehôwa tòm sră mơ mê neh bơh bơr Añ cih wơl. Mê kung pal sền tĕ sră hơ̆ ală cau Juda tus bơh ală ƀòn in geh iat tai sơl.

⁷Digơlan bol khai rơp hòi dan Yàng Jehôwa, mơ pleh bơh gùng iơh he; bơh bơta gơjrañ mơ bơta gơjrañ dờng Yàng Jehôwa neh yal tòmdră mơ làng bol do.”

⁸Gen Baruk, kòn klau Neriya, jat ală bơta cau gơnoar hwơr Jeremi neh sồr sền jơnau Yàng Jehôwa tòm sră, tòm hìu Yàng Jehôwa.

⁹Tòm kơnhai sin, nam dơ̆ pram rài Jehôyakim, kòn klau Jôsia, bơtau Juda, jơh ală làng bol Jerusalem mơ jơh làng bol bơh ală ƀòn Juda tus hơ Jerusalem, yal bơta ơt sa di đap Yàng Jehôwa.

¹⁰Gen Baruk sền jơh làng bol in iat ală jơnau Jeremi bơh tòm dap sră, tòm hìu Yàng Jehôwa, tòm ơdŭ Gemaria, kòn klau Saphan cau gơnoar cih, tòm rơng hìu hơđang, di gùng mut Mpồng Pa hìu Yàng Jehôwa dê.

¹¹Tŭ Mice, kòn klau Gemaria, sau Saphan, neh kơno sền kòp jơnau Yàng Jehôwa dê tòm sră,

¹²gen tus tòm gơlang bơtau, tòm ơdŭ cau gơnoar cih; mơ do, jơh ală kwang at bồ neh nggui tềng hơ̆: hơ̆ la Elisama cau gơnoar cih, Delaya kòn klau Semaya, Elnathan kòn klau Akbô, Gemaria kòn klau Saphan, Jedekia kòn klau Hanania, mơ jơh ală kwang at bồ.

¹³Mice yal wơl bol khai in jơh ală jơnau he neh kơno, tòm tŭ Baruk sền sră jơh làng bol ơm iat.

¹⁴Gen tàng ală kwang at bồ sồr Jehudi, kòn klau Nethania, sau Selemia, se Kusi, lòt tus hơ Baruk, mơ lah: “At tĕ tòm tê dap sră mơ mê neh sền làng bol in iat, mơ tus tềng do.” Baruk, kòn klau Neriya, at dap sră tòm tê khai, lòt tus mơ bol hơ̆.

¹⁵Bol hơ̆ sồr Baruk lah: “Nggui tĕ mơ sền sră bol hi in iat.” Baruk sền sră bol khai in iat.

¹⁶Mơya, tòm tŭ bol khai kơno jơh ală jơnau, gen rngòt sền di gơp, mơ đơs mơ Baruk lah: “Bol hi ngan pal cèng ală jơnau yal cau bơtau in.”

¹⁷Gen, bol khai khào lùp Baruk lah: “Yal tĕ bol hi in git mbe mê rgơi cih wơl ală jơnau do taih? Khai neh đơs mê in cih sơl?”

¹⁸Baruk ho lah: “Khai ai bơr yal añ in ală jơnau do, mơ añ ngui dà cih, cih wơl tòm dap sră.”

¹⁹Gen ală kwang at bồ đơs mơ Baruk lah: “Lòt tĕ, mê bal mơ Jeremi pleh mat tĕ, bañ ai cau lơi in git ntềng đah bol mê ơm.”

²⁰Lồc behơ̆, ală kwang at bồ prap dap sră tòm ơdŭ cau gơnoar cih Elisama, lòt tus mơ cau bơtau tòm rơng hìu, mơ yal wơl kòp jơnau bơtau in.

²¹Bơtau sồr Jehudi ai dap sră; Jehudi ai dap sră tòm ơdŭ cau gơnoar cih Elisama, cèng sền bơtau in mơ jơh ală kwang at bồ ơm ntào di gah bơtau in kơno.

²²Tŭ hơ̆ la kơnhai sin; bơtau ơm nggui tòm gơlang kơnhai noat mrềt, gơs bơnhă ồs rnga di đap bơtau.

²³Tòm tŭ Jehudi ơm sền pe poan sèng tòm sră, gen bơtau ai pềs dềt koh dap sră mơ sơrbì tòm bơnhă ồs, tian gơs ồs sa jơh sră tòm bơnhă.

²⁴Bơtau mơ ală làng bol neh kơno ală jơnau hơ̆, ò rngòt dô êt lơi, ò crè ào he.

²⁵Mơ tai, Elnathan, Delaya mơ Gemaria neh dan mơ bơtau bañ chu dap sră, mơ bơtau ò bài iat.

²⁶Bơtau ai gơnoar sồr Jerakmel, kòn klau Hamelek, mơ Seraya, kòn klau Asriel, mơ Selemia, kòn klau Apdiel, lòt kup cau gơnoar cih Baruk mơ cau gơnoar hwơr Jeremi; mơya Yàng Jehôwa pồn bàr nă dĭ gơna Kơnràñ dê.

²⁷Tơnơ̆ mơ tŭ bơtau neh chu dap sră gơs ală jơnau mơ Baruk neh bơh bơr Jeremi cih wơl, gơs jơnau Yàng Jehôwa đơs mơ Jeremi be do:

²⁸“Ai tĕ dô dap sră ndai, mơ cih wơl kòp jơnau neh cih tòm dap sră lài mơ Jehôyakim, bơtau Juda, neh chu rau.

²⁹Ai bơh să tòm Jehôyakim, bơtau Juda, gen mê pal đơs lah: Yàng Jehôwa đơs be do: ‘Mê neh chu dap sră do mơ đơs lah: Ñchi bơh tài mê neh cih lah bơtau Babilôn ngan rơp tus, phà lơgar do mơ tơnroh kòn mơnus mơ phan poan jơng?’

³⁰Tài bơh hơ̆, do la jơnau Yàng Jehôwa đơs bơh Jehôyakim bơtau Juda: ‘Ò gơs cau lơi gơrê bal mơ khai rơp nggui hơđang sơbàn Dabit; ƀồc khai rơp kong duh mattơngai tòm trồ ngai, mơ kong mrềt dà tŭ tòm trồ mang.

³¹Añ rơp lơh glài khai, lơh glài kòn sau mơ ală cau duh broă khai dê, tài bơh bơta iơh bơsak bol khai dê. Añ rơp dùh hơđang bol khai hơđang Jerusalem mơ cau Juda, kòp bơta rung rài Añ neh yal tơnggit bol khai in mơ bol khai ò bài iat.’”

³²Gen Jeremi ai dô dap sră ndai tong cau gơnoar cih Baruk, kòn klau Neriya in; Baruk bơh bơr Jeremi mơ cih wơl kòp jơnau tòm dap sră lài mơ Jehôyakim bơtau Juda, neh chu tòm ồs. Gơs oă jơnau tòm toh bal neh bơtơl tòm hơ̆.