Read koho Jeremi 38 Bible Online

Jeremi 38 - koho bible

Jeremi 38

¹Tŭ hơ̆ Sephatia, kòn klau Mattan, Gedalia, kòn klau Pasur, Jukan, kòn klau Selemia, mơ Pasur, kòn klau Malkija, kung kơno ală jơnau Jeremi bơto yal di đap làng bol, lah:

²“Yàng Jehôwa đơs be do: ‘Cau lơi ơm wơl tòm ƀòn gen kong chơt bơh pềs tà, jơgloh rung, hala pluh plàng; mơya cau lơi lik jào să cau Kalde in gen rơp geh kis, khai rơp geh klàs bơh bơta chơt be phan pà, khai rơp kis.’

³Yàng Jehôwa đơs be do: ‘Ƀòn do ngan rơp jào tòm tê mpồl ling bơtau Babilôn dê, khai rơp tòmpìt ai.’”

⁴Ală kwang at bồ yal mơ bơtau lah: “Dan sồr tơnchơt tĕ cau do, bơh khai đơs ală jơnau behơ̆, lơh tê ală cau ling tòmlơh ơm wơl tòm ƀòn mơ jơh ală làng bol gơlik lơbơn lơño; bơh cau do ò jòi bơta dong kòl làng bol mơya jòi bơta roh gơprah.”

⁵Bơtau Jedekia ho lah: “Do, khai ơm tềng do, khai ơm tòm tê bol mê, bơh bơtau ò geh tòmdră mơ bol mê.”

⁶Gen bol khai kup Jeremi mơ sơrbì tòm trồm jrô Malkija, kòn klau bơtau dê, trồm jrô hơ̆ ơm tòm ƀlàng hìu ling kơp gàr; bol khai ngui che mơ tơndùh Jeremi, trồm jrô hơ̆ ò gơs dà, mìng gơs bŏ lơm; Jeremi kong gơkram tòm bŏ.

⁷Ebetmelet, cau Ethiôpi, lơh kwang kơndời tòm gơlang bơtau, kơno cau sơrbì Jeremi tòm trồm jrô. Mơ tai tŭ hơ̆, bơtau ơm nggui di mpồng Benjamin.

⁸Ebetmelet bơh tòm gơlang bơtau lik lòt mơ đơs mơ bơtau lah:

⁹“Ơ bơtau, cau tòm añ, ală cau do lơh gơwèt mơ cau gơnoar hwơr Jeremi behơ̆, mơ sơrbì khai tòm trồm jrô la iơh ngan. Khai rơp chơt jơgloh tềng hơ̆, bơh tòm ƀòn ò gam piang lă tai.”

¹⁰Gen bơtau ai gơnoar sồr Ebetmelet, cau Ethiôpi in lah: “Lòt tĕ bơh do cèng bal pe jơt nă nàng hwài cau gơnoar hwơr Jeremi guh bơh trồm jrô, lài mơ tŭ khai òhềt chơt.”

¹¹Ebetmelet cèng ală cau hơ̆ lòt jat khai mơ mut tòm gơlang bơtau, tus tòm dô bă tiah tòm đam jàr. Tềng hơ̆, khai ai bài tơngkah mơ ào yau, ngui che kơt mơ tơndùh tòm trồm jrô Jeremi in.

¹²Ebetmelet, cau Ethiôpi, đơs mơ Jeremi lah: “Ơn tĕ bài tơngkah mơ ào yau hơ̆ hơđang che, ơn di hơđơm pơnoà ồng dê.” Jeremi lơh jat behơ̆.

¹³Bol khai ngui che hwài Jeremi guh hơđang lik bơh trồm jrô; lồc behơ̆, Jeremi ơm tòm ƀlàng hìu ling kơp gàr.

¹⁴Bơtau Jedekia sồr jòi Jeremi mơ cèng is khai di tiah mpồng dơ̆ pe hìu Yàng Jehôwa dê. Bơtau đơs mơ Jeremi lah: “Añ gơs dô bơta lùp mê, bañ pồn añ dô êt lơi!”

¹⁵Gen Jeremi ho mơ bơtau Jedekia lah: “Dilah añ yal bơtau in bơta hơ̆, gen bơtau ngan ò tơnchơt añ ơ? Mơ dilah añ tơngkah bơtau, ngan bơtau kung ò iat añ ò.”

¹⁶Bơtau Jedekia srat să dô bă ndơp ndơr bal mơ Jeremi lah: “Ngan be Yàng Jehôwa kis sùm, la Bơtau neh lơh gơs hwềng soàn do bol he in, añ rơp ò tơnchơt mê, mơ ò jào mê tòm tê ală cau jòi bơta kis mê.”

¹⁷Gen Jeremi yal mơ Jedekia lah: Jehôwa Yàng Tom Trồ Gơnap Gơnoar, Yàng Tom Trồ Israel dê, đơs be do: “Dilah mê kong alah mơ ală kwang at bồ bơtau Babilôn dê, gen mê rơp geh kis, mơ ƀòn do rơp ò kong chu mơ ồs; mê rơp kis bal mơ jơh hìu nhă he dê.

¹⁸Mơya dilah mê ò kong alah mơ ală kwang at bồ bơtau Babilôn dê, gen ƀòn do rơp phi tòm tê cau Kalde, bol khai rơp ngui ồs chu pơrguc gơ, mơ mê rơp ò klàs bơh tê bol khai.”

¹⁹Bơtau Jedekia đơs mơ Jeremi lah: “Añ rngòt cau Juda neh kong alah mơ cau Kalde, rơp phi añ tòm tê bol khai, mơ añ pal kong bol khai dơñŏ tơnhial sơl.”

²⁰Jeremi đơs lah: “Cau rơp ò jào bơtau ò. Dan bơtau dòn tĕ jơnau Yàng Jehôwa tòm bơta añ đơs, gen bơtau rơp geh lơngap lơngai mơ geh kis.

²¹Mơya dilah bơtau ò bài kong alah, gen do la jơnau Yàng Jehôwa neh yal tơlik añ in:

²²‘Jơh ală cau ùr gam wơl tòm gơlang bơtau Juda rơp kong cèng tus mơ ală kwang at bồ bơtau Babilôn dê; ală cau ùr hơ̆ rơp đơs mơ bơtau lah: Ală cau bơyô đềt mềr bơtau dê Neh pơrlồm pơndòm mơ geh pha; Do, jơng bơtau neh kram tòm bŏ, Gen bol khai sang lòi bơtau.’

²³Jơh ală bau ùr, bau cồng, kòn klau kòn ùr bơtau dê rơp kong cèng tus hơ cau Kalde; ai să tòm bơtau, rơp ò klàs bơh tê bol khai, mơya rơp kong tê bơtau Babilôn kup, mơ ƀòn do rơp kong chu mơ ồs.”

²⁴Tŭ hơ̆ Jedekia đơs mơ Jeremi lah: “Bañ ai cau lơi in git ală bơta do, gen mê rơp ò chơt.

²⁵Dilah ală kwang at bồ kơno añ neh đơs mơ mê, tus mơ mê mơ đơs lah: ‘Yal wơl tĕ añ in ală bơta mê đơs mơ bơtau mơ bơtau đơs mơ mê; bañ pồn bol hi, gen bol hi rơp ò tơnchơt mê,’

²⁶mê pal ho lah: ‘Añ neh rac dan bơtau bañ lòi añ rê wơl tòm hìu Jônathan, rngòt añ chơt tềng hơ̆ sơl!’”

²⁷Ală kwang at bồ tus jòi Jeremi mơ khào lùp. Khai ngui ală jơnau bơtau neh sồr mơ ho wơl mơ ală cau kwang. Gen bol khai ơm ò đơs mơ khai tai, bơh ò gơs cau lơi git broă hơ̆.

²⁸Mơ Jeremi gam ơm tòm ƀlàng hìu ling kơp gàr, jơl tus di tŭ Jerusalem kong tòmpìt ai.