Read koho Jeremi 39 Bible Online

Jeremi 39 - koho bible

Jeremi 39

¹Nam dơ̆ sin rài Jedekia, bơtau Juda, kơnhai jơt, Nebukatnessar, bơtau Babilôn, tus bal mơ jơh mpồl ling khai dê, gơrwàng ƀòn Jerusalem.

²Nam dơ̆ jơt dùl rài Jedekia, kơnhai poan, ngai dơ̆ sin, ƀòn kong phà tơrlah.

³Tòm tŭ Jerusalem kòl tòmpìt ai, jơh ală kwang at bồ bơtau Babilôn dê mut tòm ƀòn mơ nggui di mpồng Digùl. Hơ̆ la Netgan Saretse, Samga Nebô, Sasekim, lam bồ kwang kơndời, Netgan Saretse, lam bồ ală cau jak chài, bal mơ ală kwang ndai bơtau Babilôn dê.

⁴Jedekia, bơtau Juda, bal mơ jơh ală cau ling gŏ bol khai, gen dô lik bơh ƀòn tòm trồ mang, jat gùng lòt tòm suơn bơtau, bơh mpồng digùl bàr nơm dơrñang, lòt song tus hơ Araba.

⁵Mơya mpồl ling cau Kalde ting jat, mơ bàn Jedekia tòm ƀlàng Jerikô; gen kup cèng Nebukatnessar bơtau Babilôn in tòm Ripla, tiah Hamat. Tềng hơ̆, bơtau Jedekia kong Nebukatnessar cahrña.

⁶Bơtau Babilôn tơnchơt ală kòn klau bơtau Jedekia dê di đap mat khai tòm Ripla; bơtau Babilôn kung tơnchơt ală cau màng ryŭ tòm lơgar Juda sơl.

⁷Gen, sồr kơlwĕ mat bơtau Jedekia, ngui sreng mơ cap wơl, nàng cèng brê hơ Babilôn.

⁸Cau Kalde ngui ồs chu gơlang bơtau mơ hìu làng bol dê, phà tơrlah dơrñang ƀòn Jerusalem.

⁹Nebujaradan, cau lam bồ mpồl ling kơp gàr bơtau, kup ală làng bol gam ơm wơl tòm ƀòn, mơ ală cau kong alah, bal mơ ală cau gam ơm wơl tòm lơgar, cèng pơrdô hơ lơgar Babilôn.

¹⁰Ai ală cau rƀah lơòi, ò gơs sre brê dô êt lơi, gen Nebujaradan, cau lam bồ mpồl ling kơp gàr bơtau dê, lòi bol khai in ơm wơl tòm lơgar Juda; Kung tòm tŭ hơ̆, khai ai bol hơ̆ in ală suơn ño mơ sre.

¹¹Nebukatnessar, bơtau Babilôn, ai gơnoar sồr Nebujaradan, cau lam bồ mpồl ling kơp gàr bơtau dê, bơh broă Jeremi lah:

¹²“Cèng tĕ khai, sền gàr khai, bañ lơh iơh di khai; mơya pal gơwèt niam mơ khai jat nùs khai kòñ.”

¹³Nebujaradan, cau lam bồ mpồl ling kơp gàr bơtau dê, Nebusasban, cau lam bồ kwang kơndời, Netgan Saretse, cau lam bồ cau jak chài, mơ jơh ală kwang at bồ ling bơtau Babilôn dê,

¹⁴sồr jòi Jeremi tòm ƀlàng hìu ling kơp gàr, mơ jào khai Gedalia kòn klau Ahikam, sau Saphan in, nàng jun khai rê tòm hìu. Gen khai ơm digùl làng bol.

¹⁵Tòm tŭ Jeremi gam ơm jàm tòm ƀlàng hìu ling kơp gàr, gơs jơnau Yàng Jehôwa đơs mơ khai be do:

¹⁶“Lòt tĕ yal Ebetmelet, cau Ethiôpi, lah: ‘Yàng Jehôwa Gơnap Gơnoar, Yàng Tom Trồ Israel dê, đơs be do: Tus di ngai hơ̆ Añ rơp lơh gơlik gơs di đap mê ală jơnau mơ Añ neh đơs tòmdră mơ ƀòn do, lòi gơ in àñ bơta rung rài mơ ò geh lơngai ò.’

¹⁷Yàng Jehôwa đơs: ‘Mơya tòm ngai hơ̆, Añ rơp dong tă mê, gen mê rơp ò kong jào tòm tê ală cau mê rngòt.

¹⁸Bơh Añ ngan rơp dong klàs mê, mê rơp ò gơpừ hơđơm lơmpiat đào; mê rơp geh lik klàs bơh bơta chơt be phan dòp geh bơh bơta tòmlơh, bơh mê neh ơn nùs dòn kơnòm di Añ,’ Yàng Jehôwa đơs behơ̆.”