Read koho Jeremi 40 Bible Online

Jeremi 40 - koho bible

Jeremi 40

¹Gơs jơnau Yàng Jehôwa đơs mơ Jeremi tơnơ̆ mơ tŭ Nebujaradan, cau at bồ mpồl ling kơp gàr bơtau dê, hồ toh Jeremi tòm Rama. Nebujaradan neh jòi bàn Jeremi tŭ gam kòl kơt mơ sreng digùl ală cau kòl kup bơh Jerusalem mơ Juda dê nàng cèng hơ Babilôn.

²Cau lam bồ mpồl ling kơp gàr bơtau dê sồr lam Jeremi tus mơ đơs lah: “Jehôwa Yàng Tom Trồ mê neh lơh nền cèng bơta rung rài tiah do in;

³mơ Yàng Jehôwa neh lơh tòm toh kung be Kơnràñ neh đơs, bơh bol mê tìs glài tòmdră mơ Yàng Jehôwa mơ ò lơh jat jơnau đơs Kơnràñ dê; gen tàng bơta do gơlik tus bol mê in.

⁴Mơya, ngai do mê gŏ lah añ neh dong mê klàs che sreng bơh di tê mê. Dilah mê kòñ lòt bal mơ añ tus hơ Babilôn la di, gen lòt tĕ, añ rơp sền gàr mê, dilah mê ò kòñ lòt bal mơ añ tus hơ Babilôn, gen bañ lòt, do làm jơh lơgar ơm di đap mê, mê sền tiah lơi niam mơ di nàng lòt, gen lòt tĕ.”

⁵Lài mơ tŭ Jeremi lòt, gen Nebujaradan đơs pơnjat tai lah: “Rê tĕ bal mơ kòn klau Ahikam, sau Saphan, la Gedalia, hơ̆ la cau mơ bơtau Babilôn bơtào lơh gơs kwang at bồ ală ƀòn Juda; ơm tĕ mơ khai digùl làng bol, hala mê kòñ lòt tiah lơi gen lòt tĕ tềng hơ̆.” Gen, kwang at bồ mpồl ling kơp gàr bơtau ai khai in phan sa, phan ngui, mơ lòi khai lòt.

⁶Gen Jeremi tus hơ Gedalia, kòn klau Ahikam, tòm Mispa, mơ ơm bal mơ khai digùl làng bol gam ơm wơl tòm lơgar.

⁷Tòm tŭ ală cau at bồ ling gam ơm wơl tòm ală ƀòn dềt bal mơ ală cau ling bol khai dê kơno lah bơtau Babilôn neh bơtào Gedalia, kòn klau Ahikam, lơh gơs kwang đơng lơgar, mơ kơno bơtau neh jào khai in ală cau klau, cau ùr, kòn dềt, la ală cau rƀah lơòi tòm lơgar, òhềt cèng hơ Babilôn gơs dĭ.

⁸Gen bol khai tus hơ Gedalia tòm Mispa. Hơ̆ la Ismael, kòn klau Nethania, Jôhanan mơ Jônathan, kòn klau Kareah, Seraya, kòn klau Tanhumet, ală kòn klau Ephai ơm tòm Netôpha, mơ Jesania, kòn klau Maaka, bal mơ ală cau lòt bal mơ bol khai.

⁹Gedalia, kòn klau Ahikam, sau Saphan, ngui jơnau srat să ho nền mơ ală cau hơ̆ bal mơ ală cau mơ bol khai lah: “Bañ rngòt duh broă cau Kalde; ơm tĕ tòm lơgar mơ duh broă bơtau Babilôn, gen rơp gơs niam bol mê in.

¹⁰Đah mơ añ do, añ rơp ơm tòm Mispa, nàng ala mat bol mê tìp mơ ală cau Kalde rơp tus tềng do. Mơya ală bol mê tơrgòm tĕ tơrnòm ño, plai đo kơnhai prang mơ mơñà; ơn tĕ tòm gri bol mê dê, mơ ơm tòm ală ƀòn he neh tòmpìt geh.”

¹¹Tŭ jơh ală cau Juda ơm tòm Môap, digùl kòn sau Ammôn, tòm Edôm mơ ală lơgar, kơno bơtau Babilôn neh lòi ală cau gam wơl ơm tòm Juda, mơ bơtào Gedalia, kòn klau Ahikam, sau Saphan, lơh gơs kwang at bồ hơđang bol khai.

¹²Ală cau Juda hơ̆ bơh ală tiah he neh kong bơtrơh tus rê wơl tòm lơgar Juda, lòt tus mơ Gedalia tòm Mispa, tơrgòm tơrnòm mơ plai đo tòm kơnhai prang oă ngan.

¹³Tŭ hơ̆ Jôhanan kòn klau Kareah mơ ală cau at bồ ling gam ơm tòm dơr brê, tus jòi Gedalia tòm Mispa mơ đơs mơ khai lah:

¹⁴“Ồng neh git sơl Baalis bơtau Ammôn dê, neh sồr òm Ismael, kòn klau Nethania, nàng tă bơta kis ồng dê?” Mơya Gedalia kòn klau Ahikam ò dòn jơnau bol khai.

¹⁵Gen Jôhanan, kòn klau Kareah đơs òm mơ Gedalia tòm Mispa lah: “Dan ai añ in lòt, añ rơp tơnchơt Ismael, kòn klau Nethania, mơ ò gơs cau lơi git. Mbe rgơi lòi khai tă bơta kis ồng dê, mơ kòp nă cau Juda tơrgòm gùt dar ồng rơp nrah nring, mơ làng bol Juda gam wơl rơp chơt roh?”

¹⁶Mơya Gedalia, kòn klau Ahikam, ho wơl Jôhanan, kòn klau Kareah, lah: “Bañ lơh bơta hơ̆; bơh bơta mê đơs bơh Ismael la ò tòm toh.”