Read koho Jeremi 41 Bible Online

Jeremi 41 - koho bible

Jeremi 41

¹Tòm kơnhai poh, Ismael kòn klau Nethania, sau Elisama tòm jơi bơtiàn cau bơtau, mơ la dô nă cau kwang dờng cau bơtau dê, cèng jơt nă cau bal mơ khai lòt tus mơ Gedalia kòn klau Ahikam, tòm Mispa. Tòm tŭ bol khai sa ƀañ mơ gơp tềng hơ̆.

²Ismael kòn klau Nethania, bal mơ jơt nă cau lòt bal mơ khai ñă ntào ai đào srơp Gedalia kòn klau Ahikam sau Saphan, tơnchơt khai la cau mơ bơtau Babilôn pồ bơtào lơh kwang at bồ tòm lơgar.

³Ismael kung tơnchơt tơn ală cau Juda ơm bal mơ Gedalia tòm Mispa, mơ ală ling cau Kalde neh ơm tềng hơ̆.

⁴Ngai dơ̆ bàr tơnơ̆ mơ tŭ khai neh tơnchơt Gedalia, òhềt gơs cau lơi git bơta hơ̆,

⁵gen gơs phàm jơt nă koah sơnò tềp, soh ào sèt, reh să he, bơh Sicem, Silô, Samari tus, at ală phan ơn mơ kòi mbo mơ sơnơm kơlhô tòm tê bol khai nàng cèng tus hơ hìu Yàng Jehôwa.

⁶Ismael kòn klau Nethania bơh Mispa lik rò ală cau hơ̆, lòt ndang ñìm ndang. Tŭ tìp bol khai rau gen đơs lah: “Tus tĕ hơ Gedalia, kòn klau Ahikam.”

⁷Tŭ ală cau hơ̆ tus digùl ƀòn, Ismael kòn klau Nethania, mơ ală cau lòt bal mơ khai, tơnchơt bol hơ̆ mơ sơrbì ƀồc tòm tơrlung jrô.

⁸Mơya gơs jơt nă tòm mpồl bol khai đơs mơ Ismael lah: “Bañ tơnchơt bol hi, bơh bol hi gơs ală phan sa pồn ndơp tòm ƀlàng sre: kòi mi, kòi tràng, mơñà, mơ dà lơwe.” Gen Ismael ơm dơh wơl ò tơnchơt bol khai bal mơ oh mi bol khai.

⁹Trồm jrô mơ Ismael kòn klau Nethania, sơrbì ală ƀồc khai neh tơnchơt bal mơ Gedalia, hơ̆ la trồm jrô bơtau Asa neh tò, nàng tòmdră tòmlơh mơ Baesa, bơtau Israel. Ismael, kòn klau Nethania, neh bồr trồm jrô hơ̆ bềng ală ƀồc khai neh tơnchơt.

¹⁰Tơnơ̆ hơ̆, Ismael kup jơh ală làng bol gam ơm wơl tòm Mispa cèng gơs dĭ: hơ̆ la ală kòn ùr bơtau, mơ jơh làng bol gam lòi wơl tòm Mispa mơ kwang lam bồ ling kơp gàr Nebujaradan neh jào phi Gedalia, kòn klau Ahikam in, Ismael kòn klau Nethania, kup ală cau hơ̆ cèng gơs dĭ, mơ lam tus hơ tiah làng bol Ammôn.

¹¹Tŭ Jôhanan, kòn klau Kareah, mơ ală cau at bồ ling jat khai, kơno ală bơta iơh mơ Ismael, kòn klau Nethania, neh lơh,

¹²bol khai pơjum wơl jơh ală cau bol khai dê mơ sơntòm lòt tòmlơh mơ Ismael kòn klau Nethania, bol khai ting bàn rềp di tơnau dờng Gabaôn dê.

¹³Tŭ mpồl làng bol gơkòl Ismael kup cèng sền gŏ Jôhanan, kòn klau Kareah mơ jơh ală cau at bồ ling gen jơh tơl nă hòn chò ngan.

¹⁴Jơh làng bol mơ Ismael neh kup cèng bơh Mispa tòmgơl nùs dô mơ lòt tus hơ Jôhanan, kòn klau Kareah.

¹⁵Ai Ismael kòn klau Nethania, gen bal mơ phàm nă ntoat dô bơh Jôhanan mơ lòt tus hơ cau Ammôn.

¹⁶Jôhanan, kòn klau Kareah, bal mơ ală cau at bồ ling jat khai, bal mơ mpồl cau pa geh dong tă bơh tê Ismael, kòn klau Nethania, tơnơ̆ mơ tŭ khai neh tơnchơt Gedalia, kòn klau Ahikam. Jơh ală ling, ală cau ùr, ală kòn dềt, ală kwang kơndời, neh geh Jôhanan cèng rê bơh Gabaôn.

¹⁷Bol khai rơp sơntòm lòt mơ dơh wơl tòm Gerut Kimham, rềp Betlehem, nàng dô tus hơ Ejiptơ,

¹⁸tài bơh cau kalde; bơh bol khai rngòt cau Kalde, tài bơh Ismael, kòn klau Nethania, neh tơnchơt Gedalia, kòn klau Ahikam, la cau mơ bơtau Babilôn neh pồ bơtào lơh gơs kwang at bồ hơđang lơgar.