Read koho Jeremi 44 Bible Online

Jeremi 44 - koho bible

Jeremi 44

¹Gơs jơnau yal Jeremi in bơh jơh ală cau Juda ơm tòm lơgar Ejiptơ, tòm Mikdôl, Tahpanhes, Nôp, mơ tòm kơnhwàl Patros lah:

²Yàng Jehôwa Gơnap Gơnoar, Yàng Tom Trồ Israel dê đơs be do: “Bol mê neh gŏ ală bơta rung rài mơ Añ neh tơndùh hơđang Jerusalem mơ ală ƀòn Juda dê. Ne, ală ƀòn hơ̆ ngai do gơkòl sang lòi ngềt ngơt ò gơs cau ơm,

³tài bơh glài iơh bol khai neh bơrcek Añ gơjrañ, lòt chu kơlhô mơ duh khoai ală yàng ndai mơ bol khai, bol mê bal mơ ồng pàng bol mê kung òhềt tŭ lơi git.

⁴Ngan, Añ neh ơt ơl sồr ală dĭ gơna Añ la ală cau gơnoar hwơr, lòt tus mơ bol mê mơ đơs lah: ‘Bañ lơh bơta cù kìr mơ Añ gơjrañ hơ̆.’

⁵Mơya bol khai ò kơno, ò ơn tồr iat, ò sang bơta iơh kư̆ chu kơlhô ală yàng ndai in.

⁶Gen tàng bơta gơjrañ mơ bơta gơjrañ dờng Añ jê neh tuh tơlik kung be ồs chu ală ƀòn Juda dê mơ ală gùng ƀòn dờng Jerusalem dê; mơ bol gơ kong phà tơrlah ngềt ngơt jơl tus ngai do.

⁷Tŭ do Jehôwa, Yàng Tom Trồ Gơnap Gơnoar, Yàng Tom Trồ Israel dê, đơs be do: ‘Ñchi bơh tài bol mê lơh bơta iơh dờng behơ̆ tòmdră mơ bơta kis să tòm bol mê, tian gơs ală cau klau, cau ùr, cau kòn, kòn dềt gam pô, kong tơnroh bơh digùl Juda ò gam wơl dô êt lơi;

⁸Ñchi bơh tài bol mê bơrcek Añ gơjrañ bơh ală broă tê bol mê lơh, chu kơlhô ală yàng ndai in tòm lơgar Ejiptơ, la tiah bol mê pa tus ơm; tian gơs bol mê toès wơl bơta tơnroh he in, cèng he lơh gơs kai srat rma sền òsơp digùl ală làng bol dunnia.

⁹Bol mê neh hŭi bơta iơh ồng pàng bol mê dê, bơta iơh ală cau bơtau Juda dê, bơta iơh ală bau ùr cau bơtau dê, bơta iơh să tòm bol mê mơ bau ùr he dê neh tìs tòm lơgar Juda mơ tòm ală gùng Jerusalem ơ?

¹⁰Bol khai ò tơnliah să jơl tus ngai do, ò duh rngòt, ò lòt jat bơta boh lam gơnoar sồr Añ neh ơn di đap bol mê mơ ồng pàng bol mê dê.’

¹¹Tài bơh hơ̆, Yàng Jehôwa Gơnap Gơnoar, Yàng Tom Trồ Israel dê đơs be do: ‘Añ neh lơh nền cèng bơta rung rài tơndùh hơđang bol mê, mơ tơnroh jơh Juda.

¹²Añ rơp ai cau Juda gam wơl, hơ̆ la ală cau neh lơh nền lòt hơ Ejiptơ nàng ơm tềng hơ̆; jơh tơl nă bol khai rơp kong tơnroh tềng hơ̆. Tòm Ejiptơ, bol khai rơp chơt bơh bơta kơlìn hala jơgloh rung, cau dềt bal mơ cau dờng rơp chơt bơh đào mơ jơgloh rung, lơh kai cau in dơñŏ tơnhial, cù kìr, sền òsơp.

¹³Añ rơp lơh glài ală cau ơm tòm lơgar Ejiptơ, kung be neh lơh glài Jerusalem mơ pềs tà, jơgloh rung, mơ pluh plàng,

¹⁴tian gơs tòm ală cau Juda gam wơl lòt tus ơm tòm Ejiptơ, gen ò gơs cau lơi lik klàs, hala gam kis, nàng rê wơl hơ lơgar Juda. Bulah bol khai kòñ ngan rê wơl kis tềng hơ̆, bol khai rơp ò rê wơl, mìng la dô êt nă cau neh dô klàs lơm.’”

¹⁵Tŭ hơ̆, jơh ală cau neh git bau ùr he chu kơlhô ală yàng ndai, jơh ală cau ùr ơm tềng hơ̆ pơjum wơl dô mpồl dờng, hơ̆ la ală làng bol ơm tòm lơgar Ejiptơ, tòm Phatrôt, ho mơ Jeremi lah:

¹⁶“Bơh bơta ồng ai sơnđan Yàng Jehôwa đơs mơ bol hi, gen bol hi ò bài iat ò.

¹⁷Mơya bol hi ngan rơp lơh wil tơl ală jơnau neh lik bơh bơr bol hi, rơp chu kơlhô mơ ơn phan ơn ưnngài yàng ùr hơđang trồ, kung be bol hi bal mơ ồng pàng bol hi, cau bơtau, cau kwang at bồ bol hi neh lơh tòm ală ƀòn Juda dê mơ tòm ală gùng ƀòn dờng Jerusalem; Tài bơh tŭ hơ̆ bol hi gơs ƀañ nàng sa hòm să he, geh lơngai, ò gŏ rung rài lơi.

¹⁸Mơya, bơh tŭ bol hi ơm ò chu kơlhô mơ ơn phan ơn ưnngài yàng ùr hơđang trồ, gen bol hi siơ̆u siar ală bơta, mơ kong tơnroh bơh pềs tà jơgloh rung.

¹⁹Mơ tai, tŭ bol hi chu kơlhô mơ ơn phan ơn ưnngài yàng ùr hơđang trồ, bol hi lơh ƀañ gơs cih rùp yàng ùr hơ̆, gen ală bau klau bol hi ngan ò git sơl ơ?”

²⁰Gen Jeremi đơs mơ jơh ală làng bol, cau klau, cau ùr, mơ kòp nă cau neh ho wơl khai in behơ̆, lah:

²¹“Bol mê bal mơ ồng pàng, ală cau bơtau, ală kwang at bồ bol mê, mơ làng bol tòm lơgar neh chu kơlhô tòm ală ƀòn Juda mơ tòm ală gùng ƀòn dờng Jerusalem, Yàng Jehôwa ngan ò cih kah tòm dơngoh Kơnràñ ò ơ?

²²Yàng Jehôwa ò jai kong tai, bơh broă lơh iơh rmơh bol mê dê mơ bơta cù kìr mơ bol mê neh tìs, gen tàng lơgar bol mê neh gơlik gơs tiah lòi srau, ngềt ngơt mơ dô bơta srat sơntơm, ò gơs làng bol ơm jơl tus di ngai do.

²³Hơ̆ la tài bơh bol mê neh chu kơlhô mơ neh tìs glài tòmdră mơ Yàng Jehôwa, bơh bol mê ò dòn jat jơnau Yàng Jehôwa, mơ ò cơnđòa jat bơta boh lam, gơnoar sồr, mơ bơta bơto sồr Kơnràñ dê, gen tàng bơta rung rài do neh dùh bol mê in, kung be neh gơs jơl tus ngai do.”

²⁴Jeremi đơs jơh làng bol mơ jơh ală cau ùr in lah: “Ơ jơh làng bol Juda ơm tòm lơgar Ejiptơ, iat tĕ jơnau Yàng Jehôwa dê.

²⁵Yàng Jehôwa Gơnap Gơnoar, Yàng Tom Trồ Israel dê, đơs be do: Bol mê mơ bau ùr bol mê neh lơh jơh ală broă mơ bol mê đơs tơlik bơh bơr bol mê lah: ‘Ngan bol hi rơp lơh wil tơl jơnau he neh ho pơgon, chu kơlhô, mơ ơn phan ơn ưnngài yàng ùr hơđang trồ in.’ Behơ̆ bol mê kah prap kơ̆ jơnau ho pơgon bol mê dê mơ lơh wil tơl.

²⁶Gen tàng, ơ jơh làng bol Juda ơm tòm lơgar Ejiptơ, iat tĕ jơnau Yàng Jehôwa. Yàng Jehôwa đơs: Do Añ rơp ai sơnđan dờng Añ mơ srat să, rơp ò gơs dô nă cau Juda lơi tòm jơh lơgar Ejiptơ pò bơr đơs bơh sơnđan Añ tai mơ đơs lah: ‘Ngan kung be Yàng Jehôwa kis gam sùm sùm!’

²⁷Añ rơp drơng kơp nàng tơndùh bơta rung rài bol khai in mơ ò tơndùh bơta lơngai; kòp nă cau Juda ơm tòm lơgar Ejiptơ rơp kong tơnroh bơh pềs tà mơ jơgloh rung jơl tus neh tơnroh jơh.

²⁸Mìng dô êt cau geh klàs bơh pềs tà tòm lơgar Ejiptơ rê wơl hơ lơgar Juda; mơ jơh ală cau Juda gam wơl, la ală cau neh tus ơm tòm lơgar Ejiptơ rơp git jơnau cau lơi la tòm toh, jơnau Añ hala jơnau bol khai dê.

²⁹Yàng Jehôwa đơs: ‘Do la tềl sơnio mơ bol mê bơh hơ̆ git Añ rơp lơh glài bol mê tòm tiah do, nàng bol mê git lah jơnau Añ đơs tòmdră mơ bol mê ngan neh gơlik di ngan.’

³⁰Yàng Jehôwa đơs be do: ‘Do, Añ rơp phi Pharaôn Hôpra bơtau Ejiptơ, tòm tê cau sò tơm khai mơ cau jòi bơta kis khai, kung be Añ neh phi Jedekia bơtau Juda, tòm tê Nebukatnessar bơtau Babilôn, la cau sò tơm mơ jòi bơta kis khai.’”