Read koho Jeremi 45 Bible Online

Jeremi 45 - koho bible

Jeremi 45

¹Do la jơnau cau gơnoar hwơr Jeremi dê đơs mơ Baruk, kòn klau Neriya, tŭ khai cih ală jơnau do tòm dô dap sră bơh bơr Jeremi đơs tơlik, tòm nam dơ̆ poan rài Jehôyakim kòn klau Jôsia bơtau Juda:

²“Ơ Baruk! Jehôwa, Yàng Tom Trồ Israel dê, đơs mơ mê be do:

³Mê neh đơs: ‘Bòl glar añ in, bơh Yàng Jehôwa bơtơl bơta moat jrùng jê sồt añ in; añ lơgah lơgañ bơh bơta rơnđơh rơnđềng, ò geh rlô bòl!’”

⁴Mê đơs tĕ mơ khai lah: “Yàng Jehôwa đơs be do: ‘Ne, Añ rơp phà tơrlah jơh ală phan Añ neh bơtào, Añ dus sang jơh ală phan Añ neh tam, bơta hơ̆ gơlik gơs tòm làm jơh lơgar.

⁵Ai mê, mê gam jòi broă dờng he in ơ? Bañ jòi tai, bơh do, Añ rơp tơndùh bơta rung rài hơđang jơh ală jơi poac să in; ai mê, bulah mê lòt tiah lơi, Añ kung rơp sền gàr bơta kis mê be phan dòp geh bơh bơta tòmlơh.’” Yàng Jehôwa đơs behơ̆.