Read koho Jeremi 48 Bible Online

Jeremi 48 - koho bible

Jeremi 48

¹Bơh Môap, Yàng Jehôwa Mpồl Ling, Yàng Tom Trồ Israel dê, đơs be do: “Bòl glar Nebô in, tài bơh neh gơlik gơs tiah lòi srau! Kiriataim pal kong bơta ƀàssìl, mơ gơkòl phà kup; Misgap kong tuh tơlup mơ sền òsơp.

²Bơta tiơng pơnro Môap dê ò gam tai, Tòm Hesbôn, cau jòi kai lơh iơh gơ mơ đơs lah: ‘Tus tĕ, tơnroh Môap, nàng gơ ò geh kòp la dô nơm lơgar tai!’ Ơ Metmen, mê kung rơp gơlik gơs kloat; Đào rơp ting jat mê.

³Gơs jơnau hòi driau bơh Hôrônaim lah: ‘Bơta tơrlah tơrlơm mơ bơta roh gơprah dờng ngan!’

⁴‘Môap neh kòl tơnroh rau!’ Ală kòn dềt gơ ñìm nggà!

⁵Bol khai guh kơh Luhit, bol khai ñìm rac sràt bơtang ngan; bơh mù dòr Hôrônaim, bol khai kơno sap pơt wòl jê sồt moat jrùng.

⁶Dô pleh tĕ! Dong klàs bơta kis he! Kung be dô nơm alàng brê tòm ƀlàng bràs!

⁷Ngan behơ̆, bơh mê neh gơn kơnòm di pràn tòm mê dê mơ phan màng mê dê, Gen mê kung rơp kong tòmpìt ai, Kemôs rơp kong cèng pơrdô Bal mơ ală cau gơnoar ơn phan duh khoai mơ ală kwang bàng gơ.

⁸Cau tơnroh rơp mut tòm ală ƀòn, mơ ò gơs ƀòn lơi geh pleh klàs; Thòng rơp kong roh rui, Ƀlàng ring kong phà tơnroh, Be Yàng Jehôwa neh đơs.

⁹Ai tĕ boh Môap in, Ngan khai rơp gơpừ; Ală ƀòn gơ rơp gơlik ngềt ngơt, Ò gơs cau ơm.

¹⁰Pal srat sơntơm cau lơi lơh broă Yàng Jehôwa dô bă ma blac! Pal srat sơntơm cau lơi ò prap đào he bơh lơh gơtuh mhàm!

¹¹Môap ơm lơngai lơngò bơh tŭ gam kơnòm să, Kung be tơrnòm neh soat, Òhềt tuh bơh gri do tus hơ gri ne, Kung òhềt kong kup cèng pơrdô; Gen tànggơ gam bơkah, mơ ƀô gơ òhềt roh.”

¹²Gen tàng Yàng Jehôwa đơs: “Do, ngan ngai rơp tus, Tŭ Añ rơp sồr ală cau tuh kơnềng tus hơ khai, nàng tuh kơnềng khai, Lơh gri gơ soh gòi, Mơ jan bơcah rpot rpet ală gri.

¹³Môap rơp kong ƀàssìl bơh ală rùp ràk Kemôs, Kung be hìu Israel neh kong ƀàssìl Bơh Betel bol khai gơn kơnòm.

¹⁴Mbe bol mê rgơi đơs lah: ‘Bol hi la cau khin cha, la cau pràn kơldang tòm tiah tòmlơh’?

¹⁵Môap kong phà tơnroh, ală ƀòn kong tòmpìt ai; cau pơnu jak rlau jơh gơ dê kong tơnchơt,” Bơtau, sơnđan Kơnràñ la Yàng Jehôwa Gơnap Gơnoar, đơs behơ̆.

¹⁶“Bơta tơnroh Môap dê mòr tus; Bơta rung rài gơ tus mhar.

¹⁷Ơ bol mê la cau ơm rềp gơ, ñìm rac tĕ bơh gơ! Jơh ală bol mê la cau git sơnđan gơ, Đơs tĕ lah: ‘Gai gơnoar pràn neh pă, gai jra bơta gơklŏ neh pă!’

¹⁸Ơ kòn ùr ơm tòm Dibôn! Mù tĕ bơh sơbàn gơklŏ, Nggui tòm tiah ro rañ. Bơh cau tơnroh Môap guh tòmdră mơ ai, Phà tơrlah theng kơ̆ cê ai dê.

¹⁹Ơ làng bol Arôe! Ơm tĕ di gah gùng mơ sền. Lùp tĕ cau klau ntoat dô mơ cau ùr lik klàs, lah: ‘Ñchi broă gơlik gơs taih?’

²⁰Môap kong ƀàssìl ƀàsso, bơh gơ neh lề lac. Pơt wòl tĕ! Ai jơnau hòi driau tĕ di gah hiòng Arnôn! Yal tơlik tĕ tòm tiah Arnôn lah Môap neh kong phà tơnroh.

²¹Bơta lơh glài neh dùh hơđang tiah kơh mơnơm, hơđang Hôlôn, Jasa, Mephaat,

²²Dibôn, Nebô, Betdiplathaim,

²³Kiriataim, Begamul, Betmeôn,

²⁴Keriôt, Bôjrah, mơ hơđang jơh ală ƀòn tòm lơgar Môap, tiah rềp mơ ngài.”

²⁵Yàng Jehôwa đơs: “Ngke Môap dê neh kong koh rau, tơwòr tê gơ dê neh pă.

²⁶Lơh tĕ gơ in bơñul, bơh gơ neh yò tơngguh să he nàng tòmdră mơ Yàng Jehôwa. Môap rơp tram să tòm bơta gơtuh hă, kung lơh gơs kai cau in dơñŏ tơnhial.

²⁷Ai ngan neh òs dơñŏ tơnhial Israel. Kơlôi lah khai neh ò gơkòl kup digùl cau ntung kơñau, mơya tŭ lơi ai đơs bơh khai gen ai rtơs bồ!

²⁸Ơ làng bol Môap, Sang lòi tĕ ală ƀòn, mơ lòt ơm tòm trồm lŭ; Kung be sềm ntòp Lơh rsòn hơđang bơr cìr jrô.

²⁹Bol he neh kơno Môap jòng să Gơ pơnhừ să ò git nđò, Bơta jòng să, pơnhừ să, sền òsơp Nùs yò tơngguh lơh be dờng gơ dê.”

³⁰Yàng Jehôwa đơs: “Añ git bơta lac lèo gơ dê bơta jòng să gơ dê la ma blac. Broă lơh gơ la ma blac.

³¹Gen tàng Añ ñìm rac ròc bơh Môap, Bơh làng bol Môap mơ Añ hòi driau. Bơh làng bol Kirheres mơ Añ pơt wòl.

³²Ơ chi ño Sipma, Añ ñìm mê in rlau mơ ñìm bơh Jajer ală ntê mê dê gơ pơgan tus hơ dàlềng Tus di dàlềng Jajer; Cau tơnroh neh tus Tòmpìt plai tòm kơnhai prang mơ kơnhai pic ño mê,

³³Bơta chò hòp mơ hòn chò tă ngài, Tòm sre mơ ù tiah niam Môap dê; Añ neh pơndut tơrnòm bơh cơnòng pat ño; Bol khai rơp ò driau chò mơ pat ño tai; Bơta driau dờng bol khai dê ò di la driau chò.

³⁴Jơnau ñìm rac bơh Hesbôn kơno tus Eleale jơl tus hơ Jahas, bơh Joar jơl tus Hôrônaim mơ tus Eglat Selisia. Bơh ală gùng dà hòr tơm Nimrim gen kung neh soat ro jơh.”

³⁵Yàng Jehôwa đơs: “Añ rơp tă tơlik bơh Môap cau ơn phan ơn hơđang tiah jòng, mơ cau chu kơlhô ală yàng bol khai dê.

³⁶Behơ̆ gen, nùs Añ bơh Môap gơlik sap moat jrùng kung be sap uh kơwào; nùs Añ gơlik sap moat jrùng bơh làng bol Kirheres kung be sap kơwào uh; bơh ală bơta pas gơs bol khai jòi geh neh roh jơh rau.

³⁷Kòp nơm bồ neh koah jơh, kòp sơnò tềp gen koh jơh; kòp nơm tê gen kong tềl reh, kòp nơm but soh ƀào sơnò kiat.

³⁸Hơđang ală rkàng hìu cau Môap mơ tòm ală hìu dờng gơ dê, mìng la ală bơta ñìm rac lơm, bơh Añ neh pòng bơcah Môap kung be gri ò gơs cau kòñ gơboh,” Yàng Jehôwa đơs behơ̆.

³⁹“Ne, gơ neh lề lac mbe lơi! Bol khai pơt wòl mbe lơi! Môap wơlke dô bă ƀàssìl ƀàsso mbe lơi! Môap rơp gơlik gơs bơta dơñŏ tơnhial Mơ bơta rngòt rngơt jơh ală cau ơm gùt dar in.”

⁴⁰Yàng Jehôwa đơs be do: “Ne, cau sò tơm par kung be sềm klàng bung, Pò pơnđar tòmdră mơ Môap.

⁴¹Keriôt kong alah, Ală theng kơ̆ cê kong tòmpìt rau; Tòm ngai hơ̆, nùs ală cau pràn kơldang Môap dê Gơlik gơs kung be nùs cau ùr jê deh.

⁴²Môap rơp kong tơnroh, ò gam la dô làng bol tai, tài bơh gơ neh pơnhừ să tòmdră mơ Yàng Jehôwa.”

⁴³Yàng Jehôwa đơs: “Ơ làng bol Môap! Bơta rngòt rngơt, cìr jrô, dă pơt ơm gơn mê.

⁴⁴Cau lơi dô pleh bơh bơta rngòt rngơt Rơp dùh tòm trồm tơrluh, Cau lơi guh klàs bơh trồm jrô rơp gơkòl di dă pơt. Bơh Añ neh lơh sơnam lơh glài Tus hơđang Môap.” Yàng Jehôwa đơs behơ̆.

⁴⁵“Cau dô pleh jơh pràn rau Gen pồn să hơđơm mƀur Hesbôn, Mơya gơs ồs gơlik bơh Hesbôn, Lơmpiat ồs bơh digùl Sihôn, Chu pơrguc bìng liang Môap, Mơ ntìng bồ cau đơs sơrdă sơrdơu dê.

⁴⁶Ơ Môap, bòl glar mê in! Làng bol Kemôs kong tơnroh rau! Ală kòn klau bol mê kong kup cèng lơh dĭ Mơ kòn ùr bol mê kong kup cèng pơrdô ngài.

⁴⁷Mơya, tus di ală ngai lồi dut, Añ rơp cèng ală cau kong kup cèng gơs dĭ rê wơl.” Yàng Jehôwa đơs behơ̆. Jơnau cahrña bơh Môap tus tềng do lơm.