Read koho Jeremi 5 Bible Online

Jeremi 5 - koho bible

Jeremi 5

¹Ntoat mơ lòt yơng tĕ làm ală gùng ƀòn dờng Jerusalem, Sền gùt dar mơ kah prap. Jòi tĕ tòm ală hìu dờng jơnum mơ sền, Dilah mê rgơi jòi bàn dô nă cau, lơh bơta song ring, jòi bơta song ngan, Gen Añ rơp toh glài Jerusalem in.

²Bulah bol khai đơs lah: “Ngan kung be Yàng Jehôwa kis gam sùm sùm! Mơya bol khai srat să ma blac!”

³Ơ Yàng Jehôwa, mat Kơnràñ ò di wèt sền bơta song ngan ơ? Kơnràñ neh pù lơh bol khai, Mơya bol khai ò gŏ jê sồt, Kơnràñ lơh tơnroh bol khai, Mơya bol khai kung ò bài dòp bơta bơto sồr. Bol khai lơh muh mat bol khai kră rlau mơ lŭ, bol khai ò bài rê wơl.

⁴Gen añ đơs: “Ală cau do mìng la cau rƀah, Bol khai ò gơs bơta git wă; Bơh bol khai ò git gùng dà Yàng Jehôwa dê, Bơta boh lam Yàng Tom Trồ bol khai dê.

⁵Lòi Añ lòt tus mơ ală cau pas sơm Mơ đơs mơ bol khai, ngan bol khai git loh gùng dà Yàng Jehôwa dê, Bơta boh lam Yàng Tom Trồ bol khai dê.” Mơya, bol khai jơh ală gơlơh be dơrpă yô, mơ bol khai neh gơltac ală che cap.

⁶Gen tàng dô nơm klìu triă tòm brê rơp tơnchơt bol khai, dô nơm so rhau bơh ƀlàng bràs rơp tơnroh bol khai, Dô nơm klìu sơmañ ơm kơp mòc tòmdră mơ ală ƀòn dờng bol khai dê, cau lơi lik lòt bơh tiah hơ̆, rơp kong crè rpot rpet! Bơh tồi glài bol khai dê oă ngan, bơta pơrlơ̆ dră bol khai dê la dờng ngan.

⁷Mbe Añ rgơi toh bol mê in taih? Ală kòn mê neh sang lòi Añ, mơ neh srat să bơh ală yàng ò di la yàng. Tòm tŭ Añ ròng siam bol khai in hòm lai, Ai bol khai gen tìs glài rềs àr bơrnàn, mơ pơjum tòm hìu ală cau dri tơlàr.

⁸Bol khai kung be dô nơm ơseh ròng lơmă pràn kơldang, Kòp nă hòi be ơseh jat bau ùr cau gơp ƀòn he dê.

⁹Añ rơp ò lơh glài bơh ală bơta hơ̆ ơ? mơ Añ rơp ò cèng bơta sal tê lơh glài, hơđang dô nơm lơgar behơ̆ ơ? Yàng Jehôwa đơs behơ̆.

¹⁰“Guh tĕ hơđang ală àr tòm ño khai dê mơ tơnroh; Mơya bañ lơh tơnroh jơh. Koh sang tĕ ală ntê gơ dê, Bơh bol khai ò gơrê bal mơ Yàng Jehôwa.

¹¹Bơh hìu Israel mơ hìu Juda jơh ală neh ò dòn song mơ Añ.” Yàng Jehôwa đơs behơ̆.

¹²Bol khai neh pơndang sang Yàng Jehôwa, Mơ đơs lah: “Kơnràñ rơp ò lơh bơta lơi! Bơta rung rài rơp ò tus hơđang bol he; mơ bol he rơp ò sền gŏ đào hala bơta jơgloh rung.”

¹³Ală cau gơnoar hwơr mìng la càl khồm lòt gan, bơh ò gơs jơnau Yàng ơm tòm bol khai; Ală bơta hơ̆ rơp lơh gơlik gơs bol khai in.

¹⁴Gen tàng, Jehôwa Yàng Tom Trồ Gơnap Gơnoar đơs be do: “Tài bơh bol khai neh đơs jơnau do, Tŭ do, Añ rơp lơh jơnau Añ jê kung be ồs tòm bơr mê, Làng bol do rơp kung be lòng, mơ ồs hơ̆ rơp sa pơrguc bol khai.”

¹⁵Yàng Jehôwa đơs: “Ơ hìu Israel, Añ rơp cèng dô làng bol bơh tiah ngài tus hơ mê, Hơ̆ la dô làng bol kong jai, Dô làng bol neh gơs bơh yau, Dô làng bol mơ jơnau đơs bol khai mê ò git, Bol khai đơs jơnau lơi bol mê kung ò wă wơng.

¹⁶Ding kam bol khai tòm toh kung be bơtô ƀồc pò tơlik; Jơh ală bol khai la ală cau ling jak tòmlơh.

¹⁷Bol khai rơp sa loan plai đo mơ ƀañ mê dê, Bol khai rơp sa kòn klau kòn ùr mê; Bol khai rơp sa mpồl belàt mơ mpồl kơnrồ mê, bol khai rơp sa chi ño mơ chi ƀal mê dê. Bol khai rơp ai đào tơnroh ală ƀòn dờng kơ̆ cê mê dê, la tiah mơ mê gơn kơnòm!”

¹⁸Yàng Jehôwa đơs: “Bulah behơ̆, tòm ală ngai hơ̆, Añ rơp ò tơnroh jơh bol mê.

¹⁹Gen tòm tŭ làng bol mê đơs lah: ‘Ñchi bơh tài Jehôwa Yàng Tom Trồ bol he dê neh lơh ală bơta do bol he in taih?’ gen mê pal yal bol khai in lah: ‘Kung be bol mê neh sang lòi Añ mơ duh broă ală yàng cau bơdìh tòm lơgar he mbe lơi, gen bol mê kung rơp duh broă ală làng bol bơdìh tòm dô nơm lơgar ò gơrê bal mơ bol mê behơ̆ sơl.’

²⁰Yal tơnggit tĕ ală jơnau do hìu Jakôp in; Yal tơlik tĕ gơtòm Juda lah:

²¹Iat tĕ bơta do, ơ làng bol tùl gơla mơ ò wă wơng, La làng bol gơs mat mơ ò gŏ, Gơs tồr mơ ò kơno.”

²²Yàng Jehôwa đơs: “Bol mê ò duh rngòt Añ, Bol mê ò rơm să di đap Añ ơ? Añ neh ai bràs lơh gơs nhàr dàlềng, Bơh gơnoar sồr gam sùm sùm, ò geh sơrlèt rlau. Ryà dàlềng bulah dờng, kung ò geh pha rlau; Bulah dàlềng nggồr ur ur, kung ò rgơi lòt rlau mơ gơ;

²³Mơya làng bol do gơs nùs kră kơldang mơ jak pơrlơ̆ dră, Jơh tơl nă dô pleh mơ lòt ngài.

²⁴Bol khai ò đơs tòm nùs lah: ‘Bol he duh rngòt tĕ Jehôwa Yàng Tom Trồ he Hơ̆ la Bơtau ai mìu jat kơnhai sơnam Ai mìu bồ sơnam mơ mìu lồi sơnam, Mơ prap gàr bol he in Prap lòi ală poh lơh nền kơnhai toès in.’

²⁵Broă iơh bơsak bol mê neh lơh ngài bơta hơ̆ mơ bol mê; Tồi glài bol mê kơryan bol mê geh lơngai.

²⁶Bơh digùl làng bol Añ jê gơs ală cau iơh; Bol khai kơp mòc kung be cau pơndòm sềm, Pơt dă nàng kup cau.

²⁷Hìu bol khai bềng bơta ma blac, Be wàng bềng sềm, Tài behơ̆ tàng bol khai gơlik gơs dờng mơ pas sơm.

²⁸Bol khai lơmă mơ gơlik dờng. Bol khai git ò gơs lơh nền nhàr bơta iơh bol khai dê. Bol khai ò cahrña song ring gơrê mơ kòn đòi, nàng geh kwơ! Bol khai ò dong tò bơta song ring ală cau siơ̆u siar in.”

²⁹Yàng Jehôwa đơs: “Añ rơp ò lơh glài bol khai bơh ală bơta hơ̆ ơ? Mơ Añ rơp ò cèng bơta sal tê hơđang dô nơm lơgar behơ̆ ơ?

³⁰Tòm lơgar do neh gơlik gơs dô bơta rngòt rngơt cù kìr ngan.

³¹Ală cau gơnoar hwơr đơs hwơr blac, Ală cau gơnoar ơn phan duh khoai jat jơnau gơnoar sồr cau gơnoar hwơr! Làng bol Añ kòñ gơs bơta behơ̆ sơl. Mơya ñchi bol mê rơp lơh tòm tŭ lồi dut tus taih?”