Read koho Jeremi 50 Bible Online

Jeremi 50 - koho bible

Jeremi 50

¹Do la jơnau Yàng Jehôwa đơs mơ gơnoar hwơr Jeremi bơh Babilôn, bơh lơgar cau Kalde dê:

²Yal tơnggit, yal tơlik tĕ ală lơgar in, Bơtào bồng bi; yal tơnggit tĕ, Bañ pồn gơ; đơs tĕ lah: “Babilôn neh kong alah; Bel bềng bơta ƀàssìl; Merôdak kong rngòt rngơt; Rùp gơ kong ƀàssìl ƀàsso, Rùp ràk gơ kong phà tơrlah!

³Bơh gơs dô làng bol tus bơh đah đang tòmdră mơ gơ, lơh lơgar gơ dê gơlik gơs ngềt ngơt, ò gơs làng bol ơm tai; cau mơ phan poan jơng rơp dô pleh jơh.”

⁴Yàng Jehôwa đơs: “Tòm ală ngai hơ̆ mơ tòm tŭ hơ̆, làng bol Israel mơ làng bol Juda dô bă bal rê wơl, lòt ndang ñìm ndang, jòi jat Jehôwa Yàng Tom Trồ bol khai dê.

⁵Bol khai wèt mat hơ Siôn, lùp còp bơh gơ, bol khai lòt tus ring lơngai mơ Yàng Jehôwa bơh dô bơta ho bal sùm sùm rơp ò tŭ lơi hŭi.

⁶Làng bol Añ jê ngan la dô mpồl belàt tìs nrah; ală cau ê lam bol gơ tìs gùng, wĕ bol gơ lòt ngài hơđang ală mơnơm, lòt bơh mơnơm tus di dòr, bol gơ hŭi mpồl bol gơ dê.

⁷Jơh ală cau lơi tìp bol gơ, gen sa loan bol gơ; ală cau sò tơm bol gơ đơs lah: ‘Bol he ò gơkòl glài, bơh bol khai neh tìs glài tòmdră mơ Yàng Jehôwa, la ƀlàng ñhơt ngan, Yàng Jehôwa la bơta gơn kơnòm ală ồng pàng bol khai dê.’

⁸Dô tĕ bơh Babilôn, lik klàs bơh lơgar cau Kalde, lòt tĕ kung be be dam lam bồ mpồl!

⁹Bơh do, Añ rơp bơtào bơh đah đang oă lơgar pràn, mơ tus tòmdră mơ Babilôn, ală làng bol hơ̆ rơp rcang tòmlơh mơ Babilôn, mơ bơh hơ̆ gơ kong tòmpìt ai. Kam bol khai pañ kung be kam cau ling jak tòmlơh, ò rê wơl tê gòi.

¹⁰Kalde rơp kong tòmpìt ai, jơh ală cau lơi tòmpìt ai gơ gen rơp geh hòm lai,” Yàng Jehôwa đơs behơ̆.

¹¹“Ơ cau phà kơñau sre brê Añ jê, Bulah bol mê hòn chò hừh hơh Ntoat sơnđoh kung be kơnrồ me pơrjă kòi, Ngkhih kung be ơseh dam;

¹²Gen tàng mè bol mê rơp kong ƀàssìl ƀàsso ngan, Cau deh bol mê kong sền òsơp. Ne, khai rơp gơlik gơs lồi dut tòm ală lơgar dê, Dô nơm ƀlàng ngềt ngơt, tiah ro rañ, tiah srau gòi.

¹³Bơh bơta gơjrañ dờng Yàng Jehôwa dê, gơ rơp ò gơs cau ơm tai, Mìng gơlik gơs tiah lòi srau lơm; Ală cau lòt gan rềp Babilôn rơp rngòt rngơt, Mơ dơñŏ tơnhial bơh ală bơta sồt rmàñ gơ dê.

¹⁴Rcang gơrwàng tĕ Babilôn Ơ ală cau la cau wàr àtak! Pañ tĕ gơ, bañ pơlai kam; Bơh gơ neh tìs glài tòmdră mơ Yàng Jehôwa.

¹⁵Hòi driau tĕ tòmdră mơ gơ jơh ală đah. Gơ neh kong alah, Ală theng gơ neh tơrlơm, Ală dơrñang gơ neh tơlup. Bơh do la bơta sal tê Yàng Jehôwa dê! Sal tê tĕ gơ; Lơh gơ in kung be gơ neh lơh.

¹⁶Tơnroh tĕ ală cau sih gar tòm Babilôn, Bal mơ cau at mơ̆ tòm kơnhai toès; Bơh rngòt đào cau tơnroh, gen tàng kòp nă rơp rê wơl hơ làng bol tòm he dê, kòp nă rơp rê wơl hơ lơgar tòm bol khai dê.

¹⁷Israel la dô mpồl belàt tìs nrah, gơkòl klìu triă ting jat. Lài ngan bơtau Asiri neh brồ kup sa loan gơ; lồi dut Nebukatnessar, bơtau Babilôn, neh kơnjah ntìng gơ.”

¹⁸Behơ̆ gen, Yàng Jehôwa Gơnap Gơnoar, Yàng Tom Trồ Israel dê đơs be do: “Behơ̆ tàng, Añ rơp lơh glài bơtau Babilôn mơ lơgar khai, kung be neh lơh glài bơtau Asiri.

¹⁹Añ rơp cèng Israel rê wơl tòm ƀlàng ñhơt khai dê. Khai rơp sa ñhơt hơđang Karmel mơ Basan, nùs khai rơp geh hòm lai hơđang ală dòr Epraim mơ Galaat.”

²⁰Yàng Jehôwa đơs: “Tòm ală ngai hơ̆ mơ tòm tŭ hơ̆, cau rơp jòi bơta iơh Israel dê, mơ rơp ò gơs dô nơm glài tai; jòi tồi glài Juda dê, mơ rơp ò gŏ dô nơm glài lơi tai ò; bơh Añ rơp toh glài ală cau tòm mpồl bol khai mơ Añ neh lòi wơl.”

²¹“Guh tĕ hơ lơgar Marathaim, Guh tĕ tòmdră mơ gơ; Mơ sò lơh làng bol Pekôt, Tơnroh jơh tus di cau lồi dut tòm bol khai, Mơ lơh jơh ală bơta Añ neh nting sồr mê!” Yàng Jehôwa đơs behơ̆.

²²“Jơnau driau tòmlơh nggồr tòm lơgar; Bơta tơnroh tơnrui dờng ngan.

²³Mbe lơi dô nơm mut pòng jơh làm ù, Neh kong dơrpă rau! Mbe Babilôn neh gơlik gơs rngòt rngơt! Digùl ală lơgar

²⁴Ơ Babilôn, mê neh pơt dă să tòm mê in, Mơ mê neh yar tòm dă! Mê neh gơkòl kup mơya mê ò git! Bơh mê neh pơrlòng mơ Yàng Jehôwa.

²⁵Yàng Jehôwa neh pò đam jàr phan tòmlơh Kơnràñ dê, Cèng tơlik phan tòmlơh bơta gơjrañ dê; Bơh Yàng, la Yàng Jehôwa Gơnap Gơnoar, Gơs dô nơm broă pal lơh tòm lơgar Kalde.

²⁶Bơh poan đah jơng trồ tus tĕ tòmdră mơ gơ; Pò tĕ ală đam jàr gơ dê, Rơndap gơ be gơnru kòi, mơ tơnroh jơh tĕ; Bañ lòi wơl dô êt lơi gơ in!

²⁷Tơnchơt tĕ ală kơnrồ dam gơ dê, Cèng bol gơ tus tòm tiah lơh poac! Bòl glar bol khai in, bơh ngai bol khai neh tus, Hơ̆ la ngai lơh glài bol khai!

²⁸Iat tĕ sap đơs ală cau ntoat dô, la sap ală cau neh dô klàs bơh lơgar Babilôn, nàng yal tơlik tòm Siôn bơta sal tê Yàng Jehôwa Yàng Tom Trồ bol he dê, sal tê bơh hìu duh khoai Kơnràñ dê.

²⁹Hòi tĕ jơh ală cau at àtak tòmlơh mơ Babilôn, kòp nă cau wàr sơna; bơtào sàl gùt dar gơ; bañ lòi dô nă cau lơi dô klàs! Tơm wơl tĕ khai in jat broă khai lơh, be ală bơta khai neh lơh, lơh tĕ khai in; bơh khai neh pơnhừ să mơ đơs tràl di Yàng Jehôwa, Bơtau Sàng Goh Israel dê.

³⁰Gen tàng, ală cau pơnu gơ rơp gơplơ̆ hơđang ală jơnum gùng ƀòn, mơ tòm ngai hơ̆, ală cau ling gơ dê rơp gơkòl tơnroh,” Yàng Jehôwa đơs behơ̆.

³¹Yàng, la Yàng Jehôwa Gơnap Gơnoar, đơs: “Ơ làng bol pơnhừ să ne! Añ tòmdră mơ mê; Bơh ngai mê neh tus, Hơ̆ la tŭ Añ rơp lơh glài mê.

³²Cau pơnhừ să rơp gơtup jơng, gơcồt, Ò gơs cau lơi yò tơngguh khai wơl. Añ rơp sing ồs tòm ală ƀòn dờng gơ, mơ Añ rơp chu ồs tòm ală ƀòn khai dê, mơ gơ rơp sa loan jơh ală bơta gùt dar khai.”

³³Yàng Jehôwa Gơnap Gơnoar đơs be do: “Làng bol Israel mơ Juda jơh tơl nă kong rồn bơklơn. Ală cau kup bol khai cèng gơs dĭ sơmbat kơ̆ bol khai, ò bài lòi bol khai in lòt.

³⁴Bơtau Dong tơwài bol khai la pràn kơldang, sơnđan Kơnràñ la Yàng Jehôwa Gơnap Gơnoar. Nền ngan, Kơnràñ rơp dong tò bol khai, nàng Kơnràñ ai jơh lơgar in geh rlô, mơya lơh bòl glar làng bol Babilôn.”

³⁵Yàng Jehôwa đơs: “Đào tòmdră mơ cau Kalde, mơ tòmdră mơ làng bol Babilôn, mơ tòmdră mơ ală kwang at bồ mơ ală cau jak chài gơ dê.

³⁶Dô nơm đào tòmdră mơ ală cau bơjơu, Bol khai rơp gơlik gơs cau tùl gơla! Dô nơm đào tòmdră mơ ală cau ling jak tòmlơh gơ dê, Tian gơs bol khai rơp kong tơnroh!

³⁷Dô nơm đào tòmdră mơ ală ơseh, mơ rơndeh ơseh, tòmdră mơ ală cau ling ală lơgar ndai ơm digùl gơ, Tian gơs bol khai rơp gơlik kung be ală cau ùr! Dô nơm đào tòmdră ală đam jàr gơ dê, gen tànggơ kong tòmpìt kơñau!

³⁸Bơta rañ rsơh tòmdră mơ ală hiòng dà, bol gơ rơp kong soat jơh! Bơh gơ la dô lơgar ală rùp ràk dê, Bol khai bơh rùp ràk mơ gơlik lu sơnrang.

³⁹Gen tàng, ală phan poan jơng tòm brê rơp ơm tòm ƀlàng ngềt ngơt bal mơ so brê, ală sềm làkđa kung ơm tềng hơ̆, gơ rơp ò gơs kòn mơnus hala làng bol ơm tòm jơh ală rài.”

⁴⁰Yàng Jehôwa đơs: “Be tòm tŭ Yàng Tom Trồ sơrbì Sôdôm mơ Gômôrơ mơ ală ƀòn cau ơm rềp mơ bol khai, behơ̆ rơp ò gơs dô nă cau rơp ơm tềng hơ̆, hala ò gơs dô nă kòn mơnus lơi tus ơm tềng hơ̆.

⁴¹Ne, dô làng bol tus bơh đah đang; dô lơgar dờng mơ oă cau bơtau, bơh ală tiah ngài ngan plai ù dê geh chồl tus.

⁴²Bol khai at àtak mơ tà, bol khai jàñ bơsak ò gơs nùs nđàc sơngit. Sap bol khai kung be dàlềng nggồr; Bol khai hào ơseh mơ tus, ơm jat tap sèng rcang nàng tòmlơh. Ơ, kòn ùr Babilôn.

⁴³Bơtau Babilôn neh kơno yal tơnggit behơ̆, gen tê khai gơlik òsô; bơta jê sồt sơmbat khai tian gơs khai jê sồt be cau ùr jê deh.

⁴⁴Kung be klìu triă guh bơh ală brê Jordan tòmdră mơ ală ƀlàng ñhơt gam sùm. Añ rơp lơh cau Kalde nisơna in dô klàs, mơ bơtào cau mơ Añ neh sac rwah nàng at bồ bol khai. Bơh ñcau tòm toh kung be Añ taih? Ñcau neh lơh nền tŭ tơngai Añ in taih? Ñcau la cau ê belàt rgơi ntào di đap Añ taih?”

⁴⁵Behơ̆ iat tĕ bơta rơndap Yàng Jehôwa neh rcang tòmdră mơ Babilôn, mơ tơnggume broă Kơnràñ neh bơtào tòmdră mơ lơgar cau Kalde. Ngan, ală kòn dềt tòm mpồl bol khai neh kong hwài lòt, ƀlàng ñhơt bol khai dê gơlik gơs tiah ngềt ngơt!

⁴⁶Kơno jơnau Babilôn gơkòl kup, ù tiah gơlơnggơr, mơ sap driau geh kơno digùl ală lơgar.