Read koho Jeremi 51 Bible Online

Jeremi 51 - koho bible

Jeremi 51

¹Yàng Jehôwa đơs be do: “Ne, Añ rơp chồl dô nơm càl tơnroh guh tòmdră mơ Babilôn, Tòmdră mơ ală cau ơm tòm Lep Kamai.

²Añ rơp sồr ală cau puh làn tus hơ Babilôn, Mơ bol khai rơp puh lơh gơprah lơgar gơ; Bol khai rơp lơh ù tiah gơ ơm soh gòi, Tòm tŭ bol khai tus tòmdră mơ gơ bơh poan đah.

³Bañ lòi cau pañ àtak thàn wàr àtak mơ bañ lòi cau thàn soh ào lòs Bañ pơlai ală cau pơnu Babilôn dê; Tơnroh tĕ jơh ală mpồl ling gơ.

⁴Bol khai rơp gơpừ kong tơnchơt tòm lơgar cau Kalde, Mơ kong sồt tòm ală gùng ƀòn dờng gơ.

⁵Israel mơ Juda ò kòl sang lòi, Bơh Yàng Tom Trồ bol khai, la Yàng Jehôwa Gơnap Gơnoar; Bulah lơgar bol khai bềng tồi glài iơh bơsak, di đap Bơtau Sàng Goh Israel dê.

⁶Dô tĕ bơh digùl Babilôn, Kòp nă dong klàs tĕ bơta kis he dê! Bañ tài bơh tồi glài gơ mơ kong chơt roh. Bơh do la tŭ tơngai sal tê Yàng Jehôwa dê, Kơnràñ tơm wơl gơ in di pal.

⁷Babilôn la dô nơm mơngàn màh tòm tê Yàng Jehôwa, Lơh jơh ală lơgar tòm plai ù in bơñul; Ală lơgar neh ñô tơrnòm gơ, Tài bơh hơ̆ tàng ală lơgar gơlik lu sơnrang.

⁸Babilôn nisơna kong tuh tơlup mơ bơcah lề lac. Ñìm rac tĕ bơh gơ! Ai tĕ sơnơm ƀô sơm bơta jê sồt gơ; Digơlan gơ rơp geh sơmbòi

⁹‘Bol he jơh nùs sơmbòi Babilôn in, Mơya gơ ò geh bòi. Sang lòi tĕ gơ, Kòp nă rê wơl tĕ hơ lơgar tòm he dê; Bơh bơta cahrña gơguh tus hơđang trồ Gơguh tus hơ ală tap trồ.’

¹⁰‘Yàng Jehôwa neh ràng tơlik bơta song ring bol he dê. Tus tĕ, yal tơnggit tòm Siôn Broă lơh Jehôwa Yàng Tom Trồ bol he dê.’

¹¹Mòn sơmplàñ tĕ kam, tơmbềng tĕ ding kam! Yàng Jehôwa neh chồl nùs ală cau bơtau tòm Medi, bơh Kơnràñ neh lơh nền tơnroh Babilôn. Bơh do la bơta sal tê Yàng Jehôwa dê, Kơnràñ sal tê bơh hìu duh khoai Kơnràñ dê.

¹²Bơtào tĕ bồng bi Tòmdră mơ ală dơrñang Babilôn dê! Bơt tiah kơp gàr tĕ, bơtào tiah ală cau ling kơp gàr, rơndap ling kơp mòc! Bơh Yàng Jehôwa neh rơndap nền mơ neh lơh gơs Bơta Kơnràñ neh đơs bơh làng bol Babilôn.

¹³Ơ ƀòn ơm di gah hiòng dờng, Pas sơm bơh gơs phan mơna Bơta lồi dut mê dê neh tus, tơngai kis mê dê neh gơkòl koh!

¹⁴Yàng Jehôwa Gơnap Gơnoar neh ai să he mơ srat să lah: ‘Añ ngan rơp lơh mê in bềng mpồl ling, gal be srah nting; rơp driau bơta pha lin hơđang mê.’

¹⁵Să tòm Kơnràñ la Bơtau neh ai gơnap gơnoar Kơnràñ dê crơng gơs plai ù, Ai bơta jak chài Kơnràñ lơh gơs lơgar dunnia, Ai bơta àng loh Kơnràñ lì ơnàng ală tap trồ.

¹⁶Tòm tŭ Kơnràñ ai jơnau đơs, ală dà tòm ală tap trồ nggồr. Kơnràñ lơh kơnhồl dà guh bơh ală tiah lồi plai ù, Lơh puhlèp jat mìu, Bơh tòm đam Kơnràñ tơlik càl.

¹⁷Kòp nă cau tùl gơla mơ ò gơs bơta git wă; Ală cau chài lơh màh cèng ƀàssìl ƀàsso bơh rùp ràk bol khai dê; Bơh rùp tŏ khai dê la ma blac, Ò gơs nhơm tă tòm dơlam gơ.

¹⁸Ală rùp ràk la ò kwơ, la dô nơm broă blac pơrlồm; Tus ngai cahrña, bol gơ rơp kong tơnroh jơh.

¹⁹Mơya sre brê Jakôp dê gen ò di be bol khai, Bơh să tòm Kơnràñ la Bơtau neh crơng gơs ală phan, Ai Israel la jơi bơtiàn sre brê Kơnràñ dê. Sơnđan Kơnràñ la Yàng Jehôwa Mpồl Ling.”

²⁰“Mê la mut mơ phan tòmlơh Añ in; Añ rơp ngui mê phà tơrlah ală làng bol Mơ tơnroh ală lơgar.

²¹Añ rơp ngui mê phà tơrlah ală ơseh mơ ală cau hào gơ; Añ rơp ngui mê phà tơrlah rơndeh tòmlơh mơ cau hào rơndeh.

²²Añ rơp ngui mê phà tơnlề cau klau mơ cau ùr, Cau kra mơ kơnòm să; Añ rơp ngui mê phà tơnlề klau pơnu mơ ơruh dềt.

²³Añ rơp ngui mê phà tơrlah cau ê belàt mơ mpồl bol khai dê, Cau troă sre mơ ală kơnrồ bol khai dê. Añ rơp ngui mê phà tơrlah ală kwang đơng mơ ală kwang dong kòl.”

²⁴“Mơya di đap bol mê, Añ rơp tơm wơl Babilôn mơ jơh làng bol Kalde in bơh jơh ală bơta iơh mơ bol khai neh lơh tòm Siôn,” Yàng Jehôwa đơs behơ̆.

²⁵Yàng Jehôwa đơs: “Ơ mơnơm bơta tơnroh ne, Añ tòmdră mơ mê, La cau neh tơnroh jơh dunnia! Añ rơp pò tê Añ tòmdră mơ mê, rơp pơrlă mê dùh bơh hơđang lŭ klềr, Lơh mê in gơlik gơs mơnơm kong chu.

²⁶Cau rơp ò ai lŭ bơh di mê lơh mum hìu hala lŭ lơh mơnàng, Mơya mê rơp la tiah lòi srau jơl sùm sùm,” Yàng Jehôwa đơs behơ̆.

²⁷“Bơtào tĕ bồng bi tòm lơgar; Uh kơlwòk tòm ală lơgar; Rcang sir ală làng bol tòmlơh mơ gơ! Pơjum tĕ ală lơgar Ararat, Mini, Askena, tus lơh gơ! Bơtào tĕ dô nă kwang at bồ mpồl ling! Cèng tĕ ală ơseh guh kung be srah nting!

²⁸Rcang sir tĕ ală lơgar tòmlơh mơ gơ, Hơ̆ la ală bơtau Medi, ală kwang đơng bol khai dê mơ ală kwang dong kòl mơ ală lơgar mơ ală cau hơ̆ at bồ!

²⁹Ù tiah lơnggơr mơ jê sồt, bơh nùs kòñ Yàng Jehôwa tòmdră mơ Babilôn geh ntào kơ̆, Nàng lơh tiah Babilôn in ngềt ngơt, Ò gơs làng bol ơm.

³⁰Ală cau ling jak tòmlơh Babilôn dê ơm ò tòmlơh tai, bol khai ơm wơl tòm ală theng kìng crŭ; bơta pràn bol khai dê neh roh jơh, bol khai gơlik gơs be ală cau ùr. Ală hìu ơm kong chu tòm ồs, Kai mpồng neh kong tơrpă.

³¹Ling jun sră do tìp mơ ling jun sră ne, Cau kong sồr do tìp cau kong sồr ne Yal bơtau Babilôn in git lah ƀòn dờng bơtau hơ̆ dê neh gơkòl tòmpìt jơh hir,

³²Ală tiah hào plung gơkòl tòmpìt ai, Ală bŏ proh gơkòl chu mơ ồs, Mơ ală ling neh rngòt rngơt.”

³³Bơh Yàng Jehôwa Gơnap Gơnoar, Yàng Tom Trồ Israel dê, đơs: “Kòn ùr Babilôn tòm toh be làn pơrjă kòi Tus di kơnhai pơrjă kòi; Gam dô êt jŏ tai, Kơnhai toès gơ dê rơp tus.”

³⁴“Nebukatnessar, bơtau Babilôn, neh loan añ, Khai neh tơnlề añ; Khai neh lơh bol hi gơlik gri soh gòi; Khai neh loan bol hi be dô nơm bơs dờng; Khai lơh hòm kơndul khai mơ phan bơkah bol hi dê; Khai bơtrơh tơlik bol hi.”

³⁵Làng bol Siôn rơp đơs lah: “Dan să jan kong gơcrè añ jê geh sal tê hơđang Babilôn!” Jerusalem rơp đơs lah: “Dan mhàm bol he tuh hơđang làng bol Kalde!”

³⁶Gen tàng Yàng Jehôwa đơs: “Ne, Añ rơp dong tò mê, Sal tê ala mê in; Añ rơp lơh soat dàlềng gơ Mơ lơh soat ală croh dà gơ dê.

³⁷Babilôn rơp gơlik gơs gơnru tơrlah tơrlơm, Trồm so rhau ơm, Tiah ƀơ̆ iơh mơ bơrsèl tơnhial, Ò gơs làng bol ơm tai.

³⁸Bol khai rơp dô bă bal ơluh ơhùm kung be klìu triă brồ dam, Ơhùm kung be klìu triă kòn.

³⁹Tòm tŭ bol khai duh trơàl, Añ rơp yò phan ñô bol khai in ñô, jơl tus hừh nùs, Mơ bol khai bic tơn jơl sùm sùm, mơ ò tŭ lơi kah rngal wơl;” Yàng Jehôwa đơs behơ̆.

⁴⁰“Añ rơp cèng bol khai mù be belàt tus tiah lơh poac, be ală belàt dam, mơ ală be dam sơl.

⁴¹Ngan Sesak neh kong alah, bơta jòng ro jơh plai ù neh kong tòmpìt! Mbe Babilôn neh gơlik dô nơm phan cù kìr rngòt rngơt digùl ală lơgar!

⁴²Dàlềng guh ngŏ bam Babilôn, gơ neh kong bồr mơ ală ryà dà dờng.

⁴³Ală ƀòn gơ neh gơlik bơta rngòt rngơt, Gơlik tiah ro rañ, ngềt ngơt, Ò gơs làng bol ơm, Ò gơs cau lơi lòt gan.

⁴⁴Añ rơp lơh glài Bel tòm Babilôn, Rơp tă phan khai neh loan lik bơh bơr khai dê; Ală lơgar rơp ò ràn tus mơ khai tai. Dơrñang theng Babilôn kung rơp tơrlah tơrlơm!

⁴⁵Ơ làng bol Añ, lik lòt tĕ bơh digùl gơ, Kòp nă pal dong is să he, Klàs bơh bơta gơjrañ dờng Yàng Jehôwa dê!

⁴⁶Bol mê bañ gơplơ̆ nùs, bañ rngòt rngơt Bơh ală jơnau pơnro tòm lơgar. Bơh dô nam dô jơnau pơnro tus, Nam tơnơ̆ kung gơs jơnau pơnro ndai; Pơnro bơta rhung rhang tòm lơgar, Cau at bồ tòmdră mơ cau at bồ.

⁴⁷Dô bă nền cê ngan, ală ngai rơp tus, Añ rơp lơh glài ală rùp ràk Babilôn dê; Jơh lơgar gơ rơp kong ƀàssìl ƀàsso; Ală cau kong tơnchơt rơp gơpừ digùl gơ.

⁴⁸Tŭ hơ̆, ală tap trồ, ù, mơ jơh ală phan hơđang ù, Rơp driau chò bơh Babilôn; Bơh ală cau tơnroh bơh đah đang tus tơnroh gơ,” Yàng Jehôwa đơs behơ̆.

⁴⁹Babilôn pal kong tơrlah tài bơh neh tơnchơt cau Israel, Be ală cau hơđang ù neh kong chơt, tài bơh Babilôn.

⁵⁰Bol mê la cau neh pleh klàs bơh đào, Lòt tĕ, bañ dơh wơl! Bơh tiah ngài, pal kah tĕ Yàng Jehôwa, Mơ kơlôi sơnơng tĕ bơh Jerusalem!

⁵¹Bol he ƀàssìl bơh neh kơno bơta dơñŏ tơnhial; Bơta ƀàssìl jơm muh mat bol he; Bơh cau bơdìh neh tus mut Tòm tiah sàng goh hìu Yàng Jehôwa dê.

⁵²Gen tàng, Yàng Jehôwa đơs: “Ală ngai rơp tus nền cê ngan, Añ rơp lơh glài ală rùp ràk Babilôn dê; tòm làm jơh lơgar gơ dê, Ală cau kong sồt rơp rơnđơh.

⁵³Bulah Babilôn rơp guh tus hơđang trồ, Bulah khai lơh theng jơnhoa ngan mơ kơ̆ cê, Bơh di Añ ală cau tơnroh rơp tus brồ lơh hơđang gơ,” Yàng Jehôwa đơs behơ̆.

⁵⁴“Iat tĕ! Jơnau ñìm rac tus bơh Babilôn Bơta tơnroh dờng bơh lơgar Kalde!

⁵⁵Bơh Yàng Jehôwa lơh Babilôn in gơlik ngềt ngơt, Lơh roh sap nggồr nggàc gơ dê. Ală ryà bol khai dê gơhào be dà dờng; Sap driau bol khai nggồr mpong.

⁵⁶Tài bơh cau tơnroh neh tus tòmdră mơ khai Tòmdră mơ Babilôn. Ală cau pràn kơldang gơ dê kong kup, Àtak bol khai dê neh pă; Bơh Yàng Jehôwa la Yàng Tom Trồ sal wơl, Kơnràñ rơp tơm wơl wil tơl.

⁵⁷Bơtau, sơnđan Kơnràñ la Yàng Jehôwa Gơnap Gơnoar, đơs: Añ rơp lơh ală kwang dờng, ală cau jak chài gơ dê bơñul kung behơ̆ sơl ală kwang đơng, ală kwang dong kòl, bal mơ ală ling jak tòmlơh gơ dê, Bol khai rơp bic jơl sùm sùm Ò tŭ lơi kah rngal wơl tai.”

⁵⁸Yàng Jehôwa Gơnap Gơnoar đơs be do: “Dơrñang theng Babilôn bulah kơ̆ cê ngan, Rơp kòl pơnring tus di ù, Mpồng gơ dê bulah jơnhoa ngan, Rơp kong ồs sa jơh, Behơ̆ gen, ală làng bol kong bòl glar mơ ò geh ñchi lơi, Ală lơgar lơh broă ồs in, mơ gơkòl lơgah lơgañ.”

⁵⁹Do la jơnau cau gơnoar hwơr Jeremi nting sồr Seraya, kòn klau Neriya, sau klau Mahaseyah, tòm tŭ khai lòt bal mơ Jedekia bơtau Juda tus hơ lơgar Babilôn tòm nam dơ̆ poan rài bơtau hơ̆. Tŭ hơ̆ Seraya la kwang at bồ tòm gơlang bơtau.

⁶⁰Jeremi cih tòm sră jơh ală bơta rung rài pal gơlik tus Babilôn in, hơ̆ la ală jơnau neh geh cih bơh Babilôn.

⁶¹Jeremi đơs mơ Seraya lah: “Tòm tŭ mê neh tus hơ Babilôn, kah sền wơl jơh ală jơnau do.

⁶²Mơ mê đơs tĕ: ‘Khoai Yàng Jehôwa, să tòm Kơnràñ neh khơm lah rơp tơnroh tiah do, nàng ò gơs jơi kòn mơnus hala jơi phan poan jơng kis tòm hơ̆, mơ gơ rơp gơlik gơs tiah sang lòi ngềt ngơt sùm sùm.’

⁶³Tòm tŭ mê neh sền sră do sir rau, gen kơt tĕ dô nơm lŭ di gơ mơ sơrbì gơ tus digùl hiòng Ơphrat,

⁶⁴mơ đơs tĕ lah: ‘Babilôn rơp gơkram behơ̆! Gơ rơp ò bơtào guh wơl, tài bơh bơta rung rài mơ Añ rơp tơndùh hơđang gơ.’” Jơnau Jeremi tus tềng do la jơh.