Read koho Jeremi 52 Bible Online

Jeremi 52 - koho bible

Jeremi 52

¹Jedekia nggui hơđang sơbàn tòm tŭ khai neh bàr jơt dùl sơnam; at bồ jơt dùl sơnam tòm Jerusalem. Mè bơtau dê sơnđan la Hamutal, kòn ùr Jeremi dê, cau Lipna.

²Bơtau hơ̆ lơh bơta iơh di đap Yàng Jehôwa, kung be ală broă bơtau Jehôyakim neh lơh.

³Ngan, Jerusalem mơ Juda lơh Yàng Jehôwa in gơjrañ ngan, tian gơs Kơnràñ bơtrơh tơlik bol khai bơh di đap Kơnràñ. Jedekia bơtào tòmdră mơ bơtau Babilôn.

⁴Ngai jơt kơnhai jơt, nam dơ̆ sin rài bơtau Jedekia, gen Nebukatnessar, bơtau Babilôn, cèng jơh mpồl ling lòt tòmlơh mơ Jerusalem, bơtào sàl theng kơ̆ cê gơrwàng gùt dar gơ.

⁵Behơ̆ ƀòn kòl gơrwàng jơl tus di nam dơ̆ jơt dùl rài bơtau Jedekia.

⁶Ngai sin kơnhai poan, bơta jơgloh rung dờng tus tòm ƀòn, gen ò gơs phan sa làng bol tòm lơgar in.

⁷Dơrñang ƀòn kong phà tơrlah, jơh ală ling jak tòmlơh dô lik jơh bơh ƀòn tòm trồ mang, bơh di mpồng ơm digùl bàr nơm dơrñang, rềp di suơn bơtau; tòm tŭ cau Kalde ơm gơrwàng ƀòn, gen bol khai ntoat dô wèt hơ Araba.

⁸Mơya mpồl ling cau Kalde ting jat bơtau; bàn Jedekia tòm ƀlàng Jerikô, gen mpồl ling bơtau ntoat dô mơ lòi bơtau ơm is.

⁹Cau Kalde kup bơtau mơ lam tus hơ bơtau Babilôn, tòm Ripla tòm lơgar Hamat, tềng hơ̆ bơtau kong bơtau Babilôn cahrña.

¹⁰Bơtau Babilôn tơnchơt ală kòn klau Jedekia dê di đap mat khai, kung sồr tơnchơt jơh ală cau kwang at bồ Juda tòm Ripla.

¹¹Khai sồr kơlwĕ mat Jedekia dê, ai che sreng cap wơl. Bơtau Babilôn cèng Jedekia lòt hơ Babilôn, mơ jàm tòm hìu jàm jơl tus di tŭ khai chơt.

¹²Ngai jơt kơnhai pram, nam dơ̆ jơt sin rài Nebukatnessar, bơtau Babilôn, gen Nebujaradan, kwang at bồ ling sền gàr bơtau, mut tòm ƀòn Jerusalem.

¹³Khai chu hìu Yàng Jehôwa, gơlang bơtau, mơ jơh ală hìu ơm tòm Jerusalem. Ală hìu dờng cau màng ryŭ dê khai chu jơh.

¹⁴Jơh mpồl ling cau Kalde, neh lòt bal mơ cau kwang at bồ ling kơp gàr bơtau, phà tơrlah jơh ală dơrñang ƀòn gùt dar Jerusalem.

¹⁵Gơs pơnah ală cau rƀah ngan tòm làng bol, jơh ală cau gam wơl ơm tòm ƀòn, ală cau neh kong alah bơtau Babilôn, mơ ală cau chài rgơi lơh broă gam wơl, gen Nebujaradan, kwang at bồ ling gàr bơtau, kup cèng tơlik bơh lơgar.

¹⁶Mơya Nebujaradan, kwang at bồ ling gàr bơtau, neh lòi wơl ală cau rƀah ngan ơm wơl tòm lơgar, nàng tam ño mơ lơh sre.

¹⁷Cau Kalde phà tơnroh ală jrong kòng tòm hìu Yàng Jehôwa, jơl tus di mơnàng kòng, dàlềng kòng tòm hìu Yàng Jehôwa, mơ cèng jơh ală kòng hơ̆ hơ Babilôn.

¹⁸Ală glah, cơnhŏ dờng, pềs cơkap, thau ƀàk, cơnhŏ dềt, bal mơ jơh ală phan ngui mơ kòng tòm hìu duh khoai, bol khai kung cèng brê jơh.

¹⁹Cau kwang at bồ ling gàr bơtau kung cèng brê jơh ală mơngàn, phan ơn kơlhô, thau ƀàk, glah, jơng ồs đèng, cơnhŏ, mơ jơrlŭ, jơh phan lơi lơh mơ màh, jơh phan lơi lơh mơ priă.

²⁰Ai bàr nơm jrong kòng, dàlềng kòng, mơ jơt bàr nơm kơnrồ kòng ngui lơh mơnàng gơ, mơ bơtau Salômôn neh lơh hìu Yàng Jehôwa in, kòng ală phan hơ̆ dê ò rgơi kơr.

²¹Kòp nơm jrong jơnhoa jơt phàm tal, wil jơt bàr tal; mbơl poan nơm kòn tê, tòm dơlam brong gòi.

²²Hơđang bồ jrong gơs bơnap mơ kòng, jơnhoa pram tal, gùt dar bơnap gơs bơtơng mơ plai lừu mơ kòng lơm. Jrong đah ne kung gơs bơtơng mơ plai lừu tòm toh be jrong đah do.

²³Jơh poan gah gơs sin jơt prau nơm plai lừu, mơ jơh ală plai lừu ơn gùt dar bơtơng jơh ală la dô rhiang nơm.

²⁴Kwang at bồ ling kơp gàr bơtau kup Seraya, cau gơnoar dờng ơn phan duh khoai, Jephaniah cau gơnoar oh bal mơ pe nă cau kơp gàr mpồng hìu duh khoai.

²⁵Kung kup tòm ƀòn dô nă kwang at bồ ling, poh nă cau kwang ơm rềp lơh broă bal mơ bơtau, dô nă cau gơnoar cih cau kwang dờng at bồ ling, sền gàr tòm bơta sac rwah ling tòm lơgar, bal mơ prau jơt nă cau làng gơs mat tòm ƀòn.

²⁶Nebujaradan, kwang at bồ ling kơp gàr bơtau, cèng brê jơh ală cau hơ̆ bơtau Babilôn in, tòm Ripla.

²⁷Bơtau Babilôn sồr lơh mơ tơnchơt bol khai tòm Ripla, tiah Hamat. Behơ̆ gen cau Juda gơkòl kup cèng ngài bơh lơgar he.

²⁸Do la ntum khà làng bol mơ Nebukatnessar neh kup cèng ngài bơh di lơgar: Nam dơ̆ poh, pe rbô bàr jơt pe nă cau Juda.

²⁹Nam dơ̆ jơt phàm rài Nebukatnessar, bơh ƀòn Jerusalem kup cèng phàm rhiang pe jơt bàr nă cau.

³⁰Nam dơ̆ bàr jơt pe rài bơtau hơ̆, Nebujaradan, kwang at bồ ling kơp gàr bơtau, kup cèng poh rhiang poan jơt pram nă cau Juda. Jơh ală la poan rbô prau rhiang nă.

³¹Nam dơ̆ pe jơt poh, tơnơ̆ mơ tŭ bơtau Juda la Jehôyakin kòl kup, hơ̆ la nam dơ̆ sơnròp bơtau Babilôn la Ebinmerôdak pa nggui hơđang sơbàn, ngai bàr jơt pram kơnhai jơt bàr, bơtau do ai bơta nđàc Jehôyakin bơtau Juda in, mơ cèng tơlik bơh hìu jàm;

³²ai jơnau niam đơs mơ khai, mơ bơtào khai hơđang rlau mơ ală cau bơtau ndai ơm bal mơ khai tòm Babilôn.

³³Kung sồr tòmgơl ào ơm jàm, Jehôyakin geh nggui dô cơnòng bal mơ bơtau jơl jơh rài kis khai.

³⁴Jehôyakin gam kis kàr lơi, gen bơtau Babilôn ai phan ngui sa khai in sùm kòp ngai, jơl jơh rài kis khai dê.