Read koho Ñìm Rac 4 Bible Online

Ñìm Rac 4 - koho bible

Ñìm Rac 4

¹Mbe lơi màh gơlik lu li, mbe lơi màh ngan neh gơtòmgơl! Ală pơnai lŭ sàng goh ơm nrah nring tòm ală bơr gùng!

²Ală kòn sau kas màng Siôn dê, kwơ màng kung be màh ngan, mbe lơh bol khai kong sền òsơp kung be ală gri lơh mơ ù kơnàng la broă lơh bơh tê cau chài mòn ù dê!

³Bulah ală so rhau kung ai toh tơmpô kòn he; Mơya làng bol añ jê gơlik gơs jàñ bơsak kung be sềm làkđa ơm tòm ƀlàng ngềt ngơt.

⁴Lơmpiat kòn se gơđềt tòm dò, rnồng khai tơhìr dà. Kòn dềt dan phan sa, mơya ò gơs cau lơi ai bol khai in dô êt lơi.

⁵Ală cau mòng sa bơkah roh rui tòm ală gùng. Ală cau geh ròng dờng tòm bài dà gur, ơm tram să tòm gơnru bùh.

⁶Bơta tồi glài làng bol añ jê dờng rlau mơ bơta tồi glài Sôdôm dê, La ƀòn kong tơrlah tơrling tòm dô ơthoa, ò gơs dô nơm tê lơi ơn hơđang gơ.

⁷Ală cau kwang at bồ gơ goh rlau mơ piar, bò rlau mơ dà toh. Să jan bò pơrhê rlau mơ bơkào lŭ tòm dàlềng, sŏ bol khai be lŭ màng tơlir.

⁸Ngai do muh mat bol khai jù rlau mơ chah; ò gơs cau lơi đal git bol khai tòm gùng ƀòn dờng; Gơltau bol khai gơgòm ntìng bol khai dê; ro rañ gơlik be dô gơl lòng.

⁹Ală cau kong tơnchơt bơh đào lơngai rlau mơ cau chơt jơgloh; Bơta kis cau dê rhòi rhòi roh thit, be ƀlàng sre neh roh jơh ală phan gơlik bơh gơ.

¹⁰Tê bơta nđàc sơngit ală cau ùr dê, gơm sin ală kòn tòm he dê, Lơh gơs phan sa bol khai in tòm bơta tơrlah tơrlơm làng bol añ jê.

¹¹Yàng Jehôwa neh lơh bềng tơl bơta gơjrañ Kơnràñ dê, mơ tuh tơlik bơta gơjrañ dờng duh hơng Kơnràñ dê; Kơnràñ neh sing ồs tòm Siôn, chu pơrguc mơnàng gơ.

¹²Ală cau bơtau hơđang ù ò bài dòn, hala ală làng bol ơm hơđang plai ù kung ò dòn, Cau sò tơm mơ cau tòmdră rgơi mut tòm ală mpồng ƀòn dờng Jerusalem.

¹³Hơ̆ la tài bơh tồi glài ală cau gơnoar hwơr khai dê, mơ bơta iơh bơsak ală cau gơnoar ơn phan duh khoai khai dê. Bol khai neh lơh gơtuh mhàm ală cau song ring digùl ƀòn dờng khai dê.

¹⁴Bol khai be cau jơngo mat lòt yơng rò gùng lơh ƀơ̆ ƀơl bơh mhàm, Tian gơs ò gơs cau lơi rgơi ƀư di ào jrùh bol khai dê.

¹⁵Cau driau dờng di bol khai lah: “Lik tĕ ngài, ò goh!” “Lik tĕ ngài! Lik tĕ ngài! Bañ ƀư!” Behơ̆ bol khai gơlik gơs cau dô pleh mơ lòt nrah nring, làng bol tòm ală lơgar driau lah: “Bol khai rơp ò ơm tơn tềng do tai.”

¹⁶Să tòm Yàng Jehôwa neh lơh nrah nring bol khai, Kơnràñ ò wèt sền bol khai tai; ò gam gơs bơta ki ngàm di cau gơnoar ơn phan duh khoai, kung ò nđàc di ală cau kra sơl.

¹⁷Mat bol hi lơgah lơgañ gơn bơta dong kòl ò kwơ! Bol hi kơp gơn ngac ngar hơ dô làng bol ò rgơi dong klàs.

¹⁸Bol khai sền rmê di cơnđòa bol hi dê, tian gơs bol hi ò rgơi lòt jơng tòm ală gùng bol hi dê. Bơta lồi dut bol hi dê neh tus! Ngai bol hi neh tơl! Bơta lồi dut bol hi neh tus!

¹⁹Ală cau ting jat bol hi sơrbac rlau mơ klàng bung hơđang trồ jòng, Ting jat bol hi hơđang ală mơnơm, kơp mòc bol hi tòm ƀlàng ngềt ngơt.

²⁰Cau kong bong mơñà Yàng Jehôwa dê, hơ̆ la nhơm tă bơta kis bol hi dê, neh kong yar tòm dă bol khai dê rau, Bơh ñcau, bol he òs đơs lah: “Hơđơm mƀur Kơnràñ dê bol hi rơp ơm kis digùl ală lơgar.”

²¹Ơ kòn ùr Edôm, ơm tòm lơgar Us; hòn chò hừh hơh tĕ, Mơngàn kung rơp jun tus hơ ai, ai rơp bơñul mơ ơm kuh lòi rồ.

²²Ơ kòn ùr Siôn, bơta lơh glài ai neh tơl, Kơnràñ rơp ò phi ai kong kup cèng gơs dĭ tai! Ơ kòn ùr Edôm, Kơnràñ rơp lơh glài ai; Kơnràñ rơp ràng tơlik tồi glài ai dê!