Read koho Ejekiel 1 Bible Online

Ejekiel 1 - koho bible

Ejekiel 1

¹Tòm nam dơ̆ pe jơt, ngai pram kơnhai poan, tòm tŭ añ ơm digùl ală cau kong kup cèng pơrdô, di gah hiòng Kebar, ală tap trồ pò tơlik mơ añ gŏ ală bơta gơtơnggŏ Yàng Tom Trồ dê.

²Tòm ngai pram kơnhai hơ̆, hơ̆ la nam dơ̆ pram tơnơ̆ mơ tŭ bơtau Jehôyakin kong kup cèng pơrdô,

³gơs jơnau Yàng Jehôwa đơs mơ cau gơnoar ơn phan duh khoai Ejekiel, kòn klau Buji, di gah hiòng Kebar tòm lơgar cau Babilôn. Tềng hơ̆ tê Yàng Jehôwa dê ơm hơđang khai.

⁴Añ rmê sền mơ gŏ dô ròs càl rbut tus bơh đah đang, dô puk mhwal dờng gơs ồs puhlèp, mơ gơs bơta àng gơcrà ngan gòm gơrwàng gùt dar. Digùl ồs gơlơh be lòs neh ồs sa hơng,

⁵mơ digùl ồs gơlơh kung be poan nơm phan wìn kis. Rùp să ală phan hơ̆ sền gŏ kung be dô nă kòn mơnus,

⁶mơya kòp nơm phan hơ̆ gơs poan nơm muh mat mơ poan nơm đar.

⁷Ală jơng bol gơ song, mpàng jơng kung be mpàng jơng kơnrồ dam mơ sền gơlơh kung be kòng ồs sa àng lơr.

⁸Hơđơm ală đar di gah poan đah gơ dê gen bol gơ gơs ală tê kòn mơnus dê. Jơh poan nơm bol gơ gơs ală muh mat mơ ală đar,

⁹mơ ală đar bol gơ dê gơtòmcik bal. Kòp nơm phan wìn kis lòt song hơđap, bol gơ ò wơlke tòm tŭ lòt.

¹⁰Muh mat bol gơ sền gŏ be do: kòp nơm tòm poan nơm hơ̆ gơs muh mat kòn mơnus dê, mơ di gah ma bol gơ dê gơs muh mat klìu triă; đah kiau bol gơ dê gơs muh mat kơnrồ; kung gơs muh mat klàng bung dê sơl.

¹¹Ală muh mat bol gơ dê la behơ̆. Ală đar bol gơ dê gơ pò hơđang; kòp nơm gơs bàr nơm đar, dô nơm đar gơtòmcik mơ đar dô nơm phan wìn kis ndai di gah do mơ gah ne bol gơ dê, ai bàr nơm đar jơm gòm să gơ dê.

¹²Kòp nơm lòt song hơđap. Hwềng chồl lòt tiah lơi gen bol gơ lòt tềng hơ̆, ò wơlke tòm tŭ bol gơ lòt.

¹³Rùp să ală phan wìn kis hơ̆ gơlơh kung be ồs rnga mơ kung be ală sơmpòl ồs. Ồs gơguh hơđap mơ gơruc wơl digùl ală phan wìn kis hơ̆, ồs àng gơcrà mơ gơs puhlèp gơlik bơh ồs.

¹⁴Ală phan wìn kis hơ̆ lòt mhar hơđap mơ ruc wơl đah ngkòi kung be puhlèp.

¹⁵Tòm tŭ añ ơm sền di ală phan wìn kis hơ̆ gen añ gŏ dô nơm kong rơndeh hơđang ù di gah kòp nơm phan wìn kis gơs poan nơm muh mat gơ dê.

¹⁶Rùp mơ să ală kong rơndeh hơ̆ la be do: bol gơ gơcrà kung be lŭ màng tơlir, mơ jơh poan nơm kong gơlơh ndròm bal. Rùp să gơ dê gơlơh be kong rơndeh do gơrsò tòm kong rơndeh ne.

¹⁷Tòm tŭ bol gơ lòt gen gơ rgơi lòt đah lơi di lơm tòm poan đah bol gơwèt mat hơ hơ̆; ală kong rơndeh ò pơrlac wơl tòm tŭ ală phan wìn kis lòt.

¹⁸Kong rơndeh wil jơnhoa mơ gơlơh kìr rngòt ngan; mơ jơh poan nơm dơwàng kong rơndeh dê gơs bềng ală mat gùt dar.

¹⁹Tŭ phan wìn kis lòt gen ală kong rơndeh di gah gơ kung lòt; mơ tòm tŭ ală phan wìn kis guh bơh di ù gen ală kong rơndeh kung guh bơh di ù sơl.

²⁰Tiah lơi hwềng lòt gen bol gơ kung lòt tềng hơ̆; mơ ală kong rơndeh kung guh bal mơ bol gơ, tài bơh hwềng ală phan wìn kis dê ơm tòm ală kong rơndeh.

²¹Tŭ ală phan wìn kis lòt, bol gơ kung lòt; tòm tŭ ală phan wìn kis ơm dơh wơl, bol gơ kung ơm dơh wơl; mơ tòm tŭ ală phan wìn kis guh bơh di ù, gen ală kong rơndeh kung guh bal mơ bol gơ, tài bơh hwềng ală phan wìn kis dê ơm tòm ală kong rơndeh.

²²Hơđang bồ ală phan wìn kis gơs dô nơm dơwàng àng gơcrà be krơh gơlă hơđang bồ bol gơ.

²³Hơđơm dơwàng àng hơ̆, ală đar bol gơ pò song, đar do song hơ đar ne, kòp nơm gơs bàr nơm đar jơm gòm să gơ.

²⁴Tòm tŭ ală phan wìn kis lòt, añ kơno ntas ală đar bol gơ dê, ntas kung be dà dờng nggồr, kung be ntơr Bơtau Gơnap Gơnoar Dờng dê, mơ kung be ntas nggồr dô mpồl ling dê. Tòm tŭ bol gơ ơm dơh wơl, bol gơtơmù đar bol gơ dê.

²⁵Mơ gơs ntas sap đơs bơh hơđang dơwàng hơđang bồ bol gơ dê; tòm tŭ gơ ơm dơh wơl gơtơmù ală pơnđar bol gơ dê.

²⁶Mơ đah hơđang dơwàng hơđang bồ bol gơ dê gơs gơlơh kung be dô nơm sơbàn mơ lŭ màng tơlir trồ; mơ hơđang sơbàn gơs gơlơh kung be dô nă kòn mơnus.

²⁷Añ sền gŏ bơh di but tus hơđang cau hơ̆ gơlơh be kòng àng gơcrà, gơlơh kung be ồs hơng, mơ bơh di but tus hơđơm cau hơ̆ gơlơh kung be ồs; mơ gơs bơta àng gơcrà gùt dar.

²⁸Bơta àng gơcrà gùt dar cau hơ̆ la tòm toh kung be dô nơm bơrlangkang tòm mhwal tòm ngai gơs mìu. Hơ̆ la bơta ràng tơlik bơh bơta gơklŏ Yàng Jehôwa dê. Tòm tŭ añ sền gŏ bơta hơ̆, añ tơmbic să blup mat tòm ù, mơ añ kơno sap dô Bơtau đơs mơ añ.