Read koho Ejekiel 12 Bible Online

Ejekiel 12 - koho bible

Ejekiel 12

¹Gơs jơnau Yàng Jehôwa đơs mơ añ lah:

²“Ơ kòn mơnus, mê ơm digùl dô nơm làng bol jak tòmdră. Bol khai gơs mat nàng sền mơya ò gŏ, gơs tồr nàng iat mơya ò kơno, bơh bol khai la dô nơm làng bol jak tòmdră.

³Behơ̆ gen, ơ kòn mơnus, mê rcang tĕ phan mơna ơn tòm kơldung nàng kong kup cèng mơ digùl ngai di đap bol khai, mê lik tĕ mơ lòt bơh di tiah mê ơm tus hơ dô bă tiah ndai di đap mat bol khai. Digơlan bol khai rơp git wă bulah bol khai la dô nơm làng bol jak tòmdră.

⁴Di digùl ngai, di đap bol khai, cèng tơlik tĕ ală kơldung phan mơna mơ mê neh dap nàng kong kup cèng lòt. Gen tòm trồ mho, tòm tŭ bol khai rmê sền, mê lik lòt tĕ kung be ală cau kong kup cèng pơrdô.

⁵Tòm tŭ bol khai rmê sền, mê phàt tĕ dô nơm trồm di dơrñang hìu, lồc behơ̆ cèng tơlik tĕ phan mơna mê dê gan di trồm hơ̆.

⁶Mê ơn tĕ ală phan hơ̆ hơđang pơnì mê dê di đap mat bol khai rmê sền, àñ tĕ mơ lòt tòm tŭ trồ mho, mòr mang. Mê jơm tĕ muh mat nàng mê ò rgơi gŏ lơgar, bơh Añ neh ngui mê lơh gơs dô nơm tềl sơnio hìu Israel in.”

⁷Behơ̆ añ neh lơh jat jơnau Yàng neh sồr. Tòm trồ ngai, añ dap ală phan mơna añ jê nàng kong kup cèng lòt. Gen tòm trồ mho, añ ai tê tòm phàt bluh dơrñang hìu. Añ cèng tơlik bơh di hìu ală phan mơna añ jê tòm tŭ trồ mho, mòr mang, añ àñ ală phan hơ̆ hơđang ngkòi añ jê di đap mat bol khai.

⁸Tòm àng drim ngai hìng gơs jơnau Yàng Jehôwa đơs mơ añ lah:

⁹“Ơ kòn mơnus, hìu Israel la hìu jak tòmdră hơ̆ ò lùp mê lah: ‘Ñchi mê lơh behơ̆ taih’ ò ơ?

¹⁰Ho wơl tĕ bol khai in lah: ‘Jehôwa Yàng Tom Trồ đơs be do: Jơnau bơto do la gơwèt hơ cau bơtau tòm Jerusalem bal mơ jơh hìu Israel ơm tòm hơ̆.’

¹¹Mê đơs tĕ mơ bol khai lah: ‘Añ la dô nơm tềl sơnio bol mê in: Bơta añ neh lơh, gen kung rơp lơh behơ̆ bol khai in; bol khai rơp kong kup cèng pơrdô tòm lơgar ndai.’

¹²Cau bơtau digùl bol khai rơp ơn ală phan khai dê hơđang pơnì khai mơ lik lòt tòm tŭ trồ mho, mòr mang, mơ dô nơm trồm rơp phàt tòm dơrñang nàng khai lòt gan. Khai rơp jơm muh mat khai dê nàng khai in ò rgơi sền gŏ lơgar.

¹³Añ rơp dang bơtơng Añ jê nàng kup khai, mơ khai rơp yar dă Añ jê. Añ rơp cèng khai tus hơ Babilôn, la lơgar cau Kalde, mơya khai rơp ò gŏ lơgar hơ̆, mơ khai rơp chơt tềng hơ̆.

¹⁴Añ rơp rsìh tòm ală càl jơh ală cau ơm gùt dar khai la mpồl cau kwang at bồ bal mơ khai, mơ ală mpồl ling khai dê, mơ Añ rơp tă đào mơ ting jat bol khai.

¹⁵Tòm tŭ Añ lơh gơprah bol khai digùl ală làng bol, mơ rsìh bol khai tòm ală lơgar, bol khai rơp git Añ la Yàng Jehôwa.

¹⁶Mơya Añ rơp lòi wơl dô êt tòm bol khai klàs bơh di pềs tà, jơgloh rung, mơ kòp jê pluh plàng, nàng digùl ală làng bol mơ bol khai rơp tus, bol khai rơp đal git jơh ală bơta cù kìr mơ bol khai neh lơh. Gen bol khai rơp git lah Añ la Yàng Jehôwa.”

¹⁷Gơs jơnau Yàng Jehôwa đơs mơ añ be do:

¹⁸“Ơ kòn mơnus, rơm să tĕ tòm tŭ mê sa phan sa mê dê, kìr rngòt tĕ tòm tŭ mê hùc dà mê dê.

¹⁹Đơs tĕ mơ làng bol tòm lơgar lah: Do la jơnau Jehôwa Yàng Tom Trồ đơs bơh ală cau ơm tòm Jerusalem mơ ơm tòm lơgar Israel: ‘Bol khai rơp sa phan sa bol khai dê tòm bơta rngòt rngơt, mơ hùc dà bol khai dê tòm bơta kơlôi rngòt, bơh ală phan hơđang lơgar bol khai dê rơp gơkòl tă cèng jơh tài bơh bơta iơh bơsak jơh ală làng bol ơm tòm hơ̆.

²⁰Ală ƀòn dờng gơs cau ơm rơp kòl sang lòi srau gòi, mơ ù tiah rơp kong sang lòi ngềt ngơt. Gen bol mê rơp git lah Añ la Yàng Jehôwa.’”

²¹Gơs jơnau Yàng Jehôwa đơs mơ añ lah:

²²“Ơ kòn mơnus, jơnau pơnđik mơ bol mê đơs tòm lơgar Israel lah: ‘Ală ngai kư̆ lòt rlau mơ ală bơta gơtơnggŏ ò gơlik tus’ la ñchi jơnau gơtha taih?

²³Đơs tĕ mơ bol khai lah: ‘Yàng Jehôwa đơs be do: Añ rơp pơndut jơnau đơs pơnđik hơ̆, mơ bol khai ò đơs tai tòm Israel.’ Đơs tĕ mơ bol khai lah: ‘Ală ngai neh tus rềp tòm tŭ kòp bơta gơtơnggŏ rơp gơlik gơs di ngan.’

²⁴Bơh rơp ò tai gơs bơta gơtơnggŏ ma blac, hala jơnau đơs hwơr rơmhòc tòm hìu Israel.

²⁵Mơya Añ la Yàng Jehôwa, Añ rơp đơs jơnau lơi Añ đơs, mơ jơnau hơ̆ rơp gơlik gơs di ngan, ò òbat nyà. Mơya tòm ală ngai bol mê dê, ơ làng bol jak tòmdră, Añ rơp lơh gơlik gơs di ngan ală jơnau Añ đơs, Yàng Jehôwa đơs behơ̆.”

²⁶Gơs jơnau Yàng Jehôwa đơs mơ añ be do:

²⁷“Ơ kòn mơnus, hìu Israel đơs lah: ‘Bơta gơtơnggŏ mơ khai neh gŏ la bơh jŏ ngai lài òr, mơ jơnau đơs hwơr khai dê la bơh tŭ tơngai gam ngài.’

²⁸Gen tàng đơs tĕ mơ bol khai lah: ‘Yàng Jehôwa đơs lah: Ò gơs jơnau lơi Añ đơs rơp òbat tus, mơya jơnau lơi Añ đơs rơp gơlik gơs di ngan,’ Yàng Jehôwa đơs behơ̆.”