Read koho Ejekiel 14 Bible Online

Ejekiel 14 - koho bible

Ejekiel 14

¹Ngan gơs bàr pe nă cau kwang kra Israel dê tus mơ añ mơ nggui di đap añ.

²Gen gơs jơnau Yàng Jehôwa đơs mơ añ lah:

³“Ơ kòn mơnus, ală cau do cèng rùp ràk bol khai dê tơmut tòm nùs bol khai, mơ ơn ală phan lơh gơtup tìs iơh rmơh di đap bol khai. Behơ̆ Añ pal lòi să tòm Añ bol khai in hòi lùp jơnau lơi sơl ơ?

⁴Gen tàng đơs tĕ mơ bol khai mơ yal bol khai in lah: ‘Jehôwa Yàng Tom Trồ đơs be do: “Gơs cau lơi tòm hìu Israel cèng ală rùp ràk tơmut tòm nùs khai dê, mơ ơn di đap khai phan lơh gơtup tìs iơh rmơh lồc behơ̆ lòt tus hơ dô nă cau gơnoar hwơr, gen Añ, la Yàng Jehôwa, să tòm Añ rơp ho wơl khai in tòm toh kung be bơta duh khoai rùp ràk dờng khai dê,

⁵nàng Añ rơp tơrgòm prap wơl nùs làng bol Israel dê, bơh bol khai neh lòt ngài bơh Añ mơ duh khoai rùp ràk.”’

⁶Behơ̆ gen, đơs tĕ mơ hìu Israel lah: ‘Jehôwa Yàng Tom Trồ đơs be do: “Gơjrañ sang glài tĕ! Pơrlac ngài tĕ muh mat bol mê bơh di ală rùp ràk bol mê dê, wèt tĕ muh mat bol mê ngài bơh ală broă lơh cù kìr bol mê dê.

⁷Dilah gơs cau Israel lơi hala cau làng bơdìh lơi ơm tòm Israel cah is să tòm khai bơh di Añ, cèng rùp ràk tơmut tòm nùs khai dê, mơ ơn dô nơm phan lơh gơtup tìs di đap khai, lồc behơ̆ lòt tus hơ cau gơnoar hwơr nàng hòi lùp Añ, gen Añ, Yàng Jehôwa, să tòm Añ rơp ho wơl khai in.

⁸Añ rơp wèt mat tòmdră mơ cau hơ̆, lơh khai in gơlik gơs dô nơm krơh ƀơ̆ mơ dô bơta cau dơñŏ tơnhial. Añ rơp tă sang khai bơh digùl làng bol Añ jê. Gen bol mê rơp git Añ la Yàng Jehôwa.

⁹Dilah cau gơnoar hwơr gơkòl pơrlồm ơniai mơ đơs dô jơnau, gen Añ, Yàng Jehôwa neh lòi cau gơnoar hwơr hơ̆ gơkòl pơrlồm ơniai, mơ Añ rơp pò tê tòmdră mơ khai, mơ tơnroh khai bơh digùl làng bol Israel Añ jê.

¹⁰Jơh bàr nă bol khai rơp kong lơh nền glài, cau gơnoar hwơr rơp kong lơh nền glài kung be cau lùp khai.

¹¹Gen làng bol Israel rơp ò tai lòt tìs nrah bơh di Añ, kung ò tai lơh ƀơ̆ ƀơl să tòm bol khai bơh jơh ală bơta tồi glài bol khai dê. Bol khai rơp lơh gơs làng bol Añ jê, mơ Añ rơp lơh gơs Yàng Tom Trồ bol khai dê, Jehôwa Yàng Tom Trồ đơs behơ̆.”’”

¹²Gơs jơnau Yàng Jehôwa đơs mơ añ lah:

¹³“Ơ kòn mơnus, dilah dô nơm lơgar tìs glài mơ Añ tài bơh ò dòn song, mơ Añ pò tê tòmdră mơ gơ, pơndut phan sa gơ dê, dùh bơta jơgloh rung hơđang gơ, mơ tơnroh ală kòn mơnus bal mơ ală phan poan jơng,

¹⁴bulah tòm lơgar hơ̆ gơs pe nă cau do la Nôe, Daniel, mơ Jop, bol khai kung mìng rgơi dong klàs să tòm bol khai bơh bơta song ring bol khai dê,” Jehôwa Yàng Tom Trồ đơs behơ̆.

¹⁵“Hala dilah Añ sồr phan poan jơng tòm brê tus tòm làm lơgar, nàng tơnroh lơgar, lơh gơ in gơlik gơs tiah srau gòi mơ ò gơs cau lơi lòt gan, tài bơh ală phan poan jơng,

¹⁶bulah tòm lơgar gơs pe nă cau hơ̆, Jehôwa Yàng Tom Trồ đơs, kung be Añ kis, bol khai kung ò rgơi dong klàs ală kòn klau hala ală kòn ùr bol khai dê. Mìng să tòm bol khai geh dong klàs lơm, mơya lơgar rơp kong sang lòi ngềt ngơt.

¹⁷Hala dilah Añ sồr đào tus hơđang lơgar, mơ đơs lah: ‘Lòi tĕ pềs đào lòt gan lơgar, mơ Añ tơnchơt ală kòn mơnus mơ ală phan poan jơng bol khai dê,’

¹⁸gen bulah tòm lơgar gơs pe nă cau hơ̆, kung be Añ kis Jehôwa Yàng Tom Trồ đơs lah, bol khai kung ò rgơi dong klàs ală kòn klau hala ală kòn ùr bol khai dê. Mìng să tòm bol khai geh dong klàs lơm.

¹⁹Hala dilah Añ sồr bơta kòp jê pluh plàng tus tòm lơgar hơ̆, mơ Añ tuh bơta gơjrañ dờng Añ jê hơđang gơ mơ lơh gơtuh mhàm, nàng tơnchơt ală kòn mơnus bal mơ ală phan poan jơng bol khai dê,

²⁰gen Jehôwa Yàng Tom Trồ đơs lah, ngan kung be Añ kis, bulah tòm lơgar hơ̆ gơs Nôe, Daniel mơ Jop, bol khai kung ò rgơi dong klàs kòn klau hala kòn ùr bol khai dê, mìng rgơi dong klàs să tòm bol khai lơm, bơh bơta song ring bol khai dê.

²¹Bơh Jehôwa Yàng Tom Trồ đơs lah: ‘Tơ ài lah Añ rơp ngui poan bơta cahrña lơh glài kơnjơ̆ hơđang Jerusalem, hơ̆ la đào, jơgloh rung, phan poan jơng tòm brê, mơ pluh plàng nàng tơnchơt jơh kòn mơnus bal mơ phan poan jơng gơ dê.

²²Bulah behơ̆ kung gơs dô êt nă cau gam kis, hơ̆ la ală kòn klau mơ ală kòn ùr rơp geh tă tơlik bơh hơ̆, bol khai rơp lòt tus hơ mê, mơ tòm tŭ mê gŏ gùng dà bol khai dê mơ broă lơh bol khai dê, gen mê rơp geh pơndòm pơniang gơwèt hơ bơta rung rài mơ Añ neh tơndùh hơđang Jerusalem, bơh jơh ală bơta Añ neh tơndùh hơđang gơ.

²³Mê rơp geh pơndòm pơniang tòm tŭ mê gŏ gùng dà mơ bơta lơh lòt bol khai dê, bơh mê rơp git lah Añ neh ò lơh bơta lơi ò bồ gơ in ò,’” Jehôwa Yàng Tom Trồ đơs behơ̆.