Read koho Ejekiel 20 Bible Online

Ejekiel 20 - koho bible

Ejekiel 20

¹Tòm ngai jơt kơnhai pram nam dơ̆ poh, gơs dô êt nă cau kwang kra Israel dê lòt tus nàng hòi lùp Yàng Jehôwa, mơ nggui di đap añ.

²Mơ gơs jơnau Yàng Jehôwa đơs mơ añ lah:

³“Ơ kòn mơnus, đơs tĕ mơ ală cau kwang kra Israel dê mơ yal tĕ bol khai in lah: Jehôwa Yàng Tom Trồ đơs lah: ‘Ñchi bơh tài bol mê neh lòt tus nàng hòi lùp Añ taih?’ Jehôwa Yàng Tom Trồ đơs lah: ‘Di ngan kung be Añ kis, Añ rơp ò lòi bol mê hòi lùp Añ.’

⁴Ơ kòn mơnus, mê rơp cahrña bol khai, mê rơp cahrña bol khai ơ? Yal tĕ bol khai in git ală bơta cù kìr ồng pàng bol khai dê,

⁵mơ đơs mơ bol khai lah: Jehôwa Yàng Tom Trồ đơs be do: ‘Tòm ngai Añ sac rwah Israel, Añ srat să mơ jơi bơtiàn hìu Jakôp dê, mơ Añ yal tơlik să tòm Añ bol khai in git tòm lơgar Ejiptơ. Añ srat să mơ bol khai mơ đơs lah: Añ la Jehôwa Yàng Tom Trồ bol mê dê.’

⁶Tòm ngai hơ̆ Añ neh srat să ho nền mơ bol khai lah Añ rơp cèng bol khai lik klàs bơh di lơgar Ejiptơ nàng mut tòm dô nơm lơgar mơ Añ neh jòi bol khai in, hơ̆ la lơgar bềng lìu dà toh mơ dà lơwe, lơgar niam rlau mơ jơh ală lơgar ndai.

⁷Mơ Añ neh đơs mơ bol khai lah: ‘Kòp nă bol mê sang ngài tĕ ală rùp duh khoai cù kìr mơ bol mê tơnggòr sền, bañ lơh ƀơ̆ ƀơl să tòm he bơh ală rùp ràk Ejiptơ dê! Añ la Jehôwa Yàng Tom Trồ bol mê dê.’

⁸Mơya bol khai tòmdră mơ Añ, ò bài iat jơnau Añ; kung ò sang lòi ală rùp ràk Ejiptơ dê. Behơ̆ Añ đơs lah Añ rơp tuh bơta gơjrañ dờng Añ jê hơđang bol khai, mơ lơh wil tơl bơta gơjrañ mañ Añ jê tòmdră mơ bol khai tòm lơgar Ejiptơ.

⁹Mơya tài bơh sơnđan Añ mơ Añ neh lơh broă tồ ò kòl sền òsơp di đap mat ală làng bol mơ bol khai neh ơm digùl hơ̆, di đap ală làng bol hơ̆ Añ neh yal tơlik să tòm Añ cau Israel in bơh añ neh cèng bol khai lik klàs bơh di lơgar Ejiptơ.

¹⁰Gen tàng Añ neh lam bol khai lik bơh di lơgar Ejiptơ, mơ cèng bol khai mut tòm ƀlàng ngềt ngơt.

¹¹Añ neh ai bol khai in jơnau sồr Añ jê, mơ sơnio bol khai in git ală bơta boh lam Añ jê, bơh cau lơi lơh jat ală bơta hơ̆ gen rơp geh kis.

¹²Añ kung neh ai bol khai in ală ngai Saƀat Añ jê be dô nơm tềl digùl Añ mơ bol khai, nàng bol khai in git lah Añ la Yàng Jehôwa neh lơh bol khai in gơlik gơs sàng goh.

¹³Mơya hìu Israel tòmdră mơ Añ tòm ƀlàng ngềt ngơt; bol khai ò lơh jat jơnau sồr Añ jê, mơya sang lòi ală bơta sồr lam Añ jê, bulah cau lơi lơh jat gen rơp geh kis bơh gơ, mơ bol khai neh sền òsơp oă ngan di ală ngai Saƀat Añ jê. Behơ̆ Añ neh kơlôi Añ rơp tuh bơta gơjrañ dờng Añ jê hơđang bol khai tòm ƀlàng ngềt ngơt, nàng tơnroh bol khai.

¹⁴Mơya Añ neh lơh broă tài bơh sơnđan Añ mơ ò lòi kòl sền òsơp di đap ală làng bol neh gŏ Añ cèng bol khai lik klàs.

¹⁵Añ kung neh srat să mơ bol khai tòm ƀlàng ngềt ngơt lah Añ rơp ò cèng bol khai mut tòm ù tiah mơ Añ neh ho ai bol khai in, la ù tiah bềng dà toh mơ dà lơwe, ù tiah niam rlau mơ jơh ală ù tiah ndai;

¹⁶Tài bơh bol khai neh sang lòi ală bơta boh lam Añ jê, mơ ò lơh jat ală jơnau sồr Añ jê, mơ sền òsơp di ală ngai Saƀat Añ, bơh nùs bol khai wèt hơ ală rùp ràk bol khai dê.

¹⁷Bulah behơ̆, mat Añ neh wèt sền mơ nđàc pơlai bol khai, mơ Añ neh ò tơnroh bol khai hala pơndut bol khai tòm ƀlàng ngềt ngơt.

¹⁸Añ neh đơs mơ kòn sau bol khai dê tòm ƀlàng ngềt ngơt lah: ‘Bañ lơh jat ală bơta sồr lam ồng pàng bol mê dê hala prap gàr bơta boh lam bol khai dê, hala lơh ƀơ̆ ƀơl să tòm bol mê dê bơh ală rùp ràk bol khai dê.

¹⁹Añ la Jehôwa Yàng Tom Trồ bol mê dê, lơh jat tĕ ală lơh nền Añ jê mơ kơrhia tĕ prap gàr ală bơta sồr lam Añ jê.

²⁰Prap gàr tĕ sàng goh ală ngai Saƀat Añ jê nàng lơh gơs dô nơm tềl digùl Añ mơ bol mê. Gen bol mê rơp git Añ la Jehôwa Yàng Tom Trồ bol mê dê.’

²¹Mơya ală kòn sau pơrlơ̆ dră mơ Añ; bol khai neh ò lơh jat ală jơnau sồr Añ jê, bol khai neh ò kơrhia prap gàr ală bơta boh lam Añ jê, bơh cau lơi lơh jat gen kòp nă rơp geh kis; mơ bol khai sền òsơp di ală ngai Saƀat Añ jê. Gen Añ kơlôi Añ rơp tuh bơta gơjrañ dờng Añ jê hơđang bol khai, mơ lơh wil tơl bơta gơjrañ mañ Añ jê tòmdră mơ bol khai tòm ƀlàng ngềt ngơt.

²²Mơya Añ neh ruc wơl tê Añ jê, mơ tài bơh sơnđan Añ mơ Añ neh prap gàr gơ tồ ò kòl sền òsơp di đap ală làng bol neh gŏ Añ cèng bol khai lik klàs.

²³Añ kung neh pò tê srat să mơ bol khai tòm ƀlàng ngềt ngơt lah Añ rơp lơh bol khai in gơprah gơpring digùl ală làng bol mơ nrah nring tòm ală lơgar,

²⁴tài bơh bol khai neh ò lơh jat ală bơta sồr lam Añ jê, mơya neh sang lòi ală jơnau sồr Añ jê, mơ neh sền òsơp ală ngai Saƀat Añ jê, mơ mat bol khai neh wèt hơ ală rùp ràk ồng pàng bol khai dê.

²⁵Añ kung neh ai bol khai tòm ală bơta sồr lam ò niam mơ ală bơta boh lam mơ bơh hơ̆ bol khai ò rgơi kis.

²⁶Añ lơh bol khai gơlik ƀơ̆ ƀơl bơh ală phan pà bol khai dê, bol khai ơn jơh ală kòn tơnhoa lơh gơs phan ơn duh khoai, tồ Añ tơmbềng bol khai mơ bơta rngòt rngơt, nàng bol khai git Añ la Yàng Jehôwa.

²⁷Behơ̆ gen, ơ kòn mơnus, yal tĕ mơ hìu Israel, mơ đơs mơ bol khai lah: ‘Jehôwa Yàng Tom Trồ đơs be do: Ồng pàng bol mê kung neh lơh tràl sơrbil mơ Añ bơh bol khai neh pơrlơ̆ dră di Añ.

²⁸Tòm tŭ Añ neh cèng bol khai mut tòm lơgar mơ Añ neh srat să ho ai bol khai in, mơ bol khai neh gŏ dòr lơi jơnhoa hala tòm chi dờng lơi gơs oă nha, gen tềng hơ̆ bol khai ơn phan ơn duh khoai bol khai dê, ơn ală phan ơn lơh Añ in gơjrañ mañ, chu kơlhô ƀô bơlhu, mơ tuh tơlik phan ơn pơdơng hùc bol khai dê.

²⁹Gen Añ đơs mơ bol khai lah: “Tiah jơnhoa do mơ bol mê lòt tus hơ̆ la ñchi taih?”’” (Gơ geh sơnđan la Bama jơl tus di ngai do.)

³⁰“Behơ̆ gen, đơs tĕ mơ hìu Israel lah: ‘Jehôwa Yàng Tom Trồ đơs be do: Bol mê rơp lơh ƀơ̆ ƀơl is să tòm bol mê dê jat gùng ồng pàng bol mê neh lơh, mơ hàm kòñ ală rùp duh khoai cù kìr bol khai dê ơ?

³¹Tòm tŭ bol mê ơn phan ai gòi bol mê dê, ơn ală kòn klau bol mê chu tòm ồs, bol mê pơnjat lơh ƀơ̆ ƀơl să tòm bol mê dê bơh jơh ală rùp ràk bol mê dê jơl tus di ngai do. Ơ hìu Israel, Añ rơp lòi bol mê hòi lùp Añ ơ! Be Añ kis, Jehôwa Yàng Tom Trồ đơs behơ̆.

³²Gơs bơta lơi bol mê kơlôi tòm dơngoh rơp ò gơlik gơs, bol mê đơs lah: “Lòi bol hi gơlik ndròm be ală lơgar mơ ală làng bol tòm dunnia duh khoai chi mơ lŭ.”’

³³Jehôwa Yàng Tom Trồ đơs lah: ‘Di ngan kung be Añ kis, Añ rơp at bồ bol mê bơh tê gơnoar pràn mơ tơwòr tê pò tơlik bal mơ bơta gơjrañ dờng tuh tơlik.

³⁴Kung bơh tê gơnoar pràn mơ tơwòr tê pò tơlik bal mơ bơta gơjrañ dờng tuh tơlik mơ Añ rơp cèng bol mê lik klàs bơh di ală làng bol, mơ pơjum tơrgòm wơl bol mê bơh di ală lơgar mơ bol mê neh nrah nring.

³⁵Añ rơp cèng bol mê tus tòm ƀlàng ngềt ngơt ală làng bol dê, tềng hơ̆, Añ rơp cahrña bol mê mat tòm toh mơ mat.

³⁶Añ neh cahrña ồng pàng bol mê dê tòm ƀlàng ngềt ngơt lơgar Ejiptơ dê mbe lơi gen Añ kung rơp cahrña bol mê behơ̆ sơl,’ Jehôwa Yàng Tom Trồ đơs behơ̆.

³⁷Añ rơp lơh bol ê in pal ơm hơđơm gai gơnoar at bồ, mơ Añ rơp cèng tơmut bol mê tòm che bơrkoat jơnau bơta ho bal dê.

³⁸Añ rơp lơh goh bơta tòmdră bơh digùl bol mê, mơ ală cau tòmdră mơ sòdră di Añ. Añ rơp cèng bol khai lik bơh di lơgar mơ bol khai ơm ing, mơya bol khai rơp ò geh mut tòm lơgar Israel dê. Gen bol mê rơp git Añ la Yàng Jehôwa.

³⁹Ai mê, ơ hìu Israel, bơh bol mê gen Jehôwa Yàng Tom Trồ đơs be do: ‘Kòp nă bol mê lòt tĕ mơ duh tĕ broă ală rùp ràk bol mê dê! Tŭ do mơ tơnơ̆ mơ hơ̆ dilah bol mê ò iat Añ; mơya sơnđan sàng goh Añ jê rơp ò gơkòl lơh ƀơ̆ ƀơl, bơh ală phan ơn mơ bơh ală rùp ràk bol mê dê.’

⁴⁰Jehôwa Yàng Tom Trồ đơs lah: ‘Bơh hơđang mơnơm sàng goh Añ jê, mơnơm jơnhoa Israel dê, tềng hơ̆ jơh hìu Israel rơp duh broă Añ, mơ tềng hơ̆ Añ rơp dòp bol khai. Tềng hơ̆ Añ rơp lùp pơnah phan pal ơn bol mê dê mơ ală plai bồ sơnam ơn duh khoai bol mê dê, bal mơ jơh ală phan ơn sàng goh bol mê dê.

⁴¹Añ rơp dòp bol mê kung be kơlhô ƀô bơlhu tòm tŭ Añ cèng bol mê lik bơh di ală làng bol, mơ pơjum tơrgòm bol mê bơh di ală lơgar mơ bol mê neh kong nrah nring; mơ Añ rơp yal tơlik să tòm Añ sàng goh digùl bol mê mơ di đap ală làng bol.

⁴²Gen bol mê rơp git Añ la Yàng Jehôwa tòm tŭ Añ cèng bol mê mut tòm lơgar Israel dê, la lơgar mơ Añ neh pò tê srat să ho ai ồng pàng bol mê in.

⁴³Tềng hơ̆ bol mê rơp kah wơl bơta lơh lòt bal mơ jơh ală broă bơh hơ̆ bol mê neh lơh să tòm he in gơlik gơs ƀơ̆ ƀơl; mơ bol mê rơp cù kìr să tòm he bơh jơh ală bơta iơh mơ bol mê neh lơh.

⁴⁴Ơ hìu Israel, bol mê rơp git Añ la Yàng Jehôwa tòm tŭ Añ bơh sơnđan Añ mơ gơwèt hơ bol mê, ò di jat ală gùng dà ƀơ̆ iơh mơ broă lơh ồm lề bol mê dê, Jehôwa Yàng Tom Trồ đơs behơ̆.’”

⁴⁵Gơs jơnau Yàng Jehôwa tus mơ añ lah:

⁴⁶“Ơ kòn mơnus, wèt tĕ mat mê hơ đah đơm; bơto yal tĕ tòmdră mơ đah đơm, mơ đơs hwơr tĕ tòmdră mơ dơr brê tòm Negep.

⁴⁷Đơs tĕ mơ dơr brê Negep dê lah: ‘Iat tĕ jơnau đơs Yàng Jehôwa dê. Jehôwa Yàng Tom Trồ đơs be do: “Añ rơp ai ồs chu mê, gơ rơp sa loan jơh ală chi mê dê, chi tơlir niam bal mơ chi ro rañ. Lơmpiat ồs hơng rơp ò chơt, mơ kòp nơm muh mat bơh đah đơm tus đah đang rơp gơkòl ồs hơ̆ chu pơrguc.

⁴⁸Jơh ală poac să rơp gŏ hơ̆ la Añ, Yàng Jehôwa neh sing ồs hơ̆, gơ rơp ò chơt ò.”’”

⁴⁹Gen añ neh đơs lah: “Ơ Jehôwa Yàng Tom Trồ bol khai đơs mơ añ lah: ‘Khai ò di la cau neh ngui jơnau pơnhồr ò ơ?’”