Read koho Ejekiel 21 Bible Online

Ejekiel 21 - koho bible

Ejekiel 21

¹Gơs jơnau Yàng Jehôwa đơs mơ añ be do:

²“Ơ kòn mơnus, wèt tĕ mat mê hơ Jerusalem mơ bơto tòmdră mơ tiah sàng goh. Đơs hwơr tĕ tòmdră mơ lơgar Israel,

³mơ đơs mơ ù tiah Jerusalem lah: ‘Yàng Jehôwa đơs be do: Añ tus nàng tòmdră mơ mê. Añ rơp tă đào Añ jê bơh di sơmprồm nàng tơnroh bơh di mê ală cau song ring mơ ală cau iơh bơsak.

⁴Tài bơh Añ rơp tơnroh ală cau song ring mơ ală cau iơh bơsak, gen đào Añ rơp tă bơh di sơmprồm gơ dê tòmdră mơ jơh ală poac să bơh đah đơm tus đah đang.

⁵Gen jơh tơl nă cau rơp git Añ Yàng Jehôwa, neh tă đào Añ jê bơh di sơmprồm gơ dê; gơ rơp ò mut wơl tai ò.’

⁶Gen tàng, ơ kòn mơnus, pơt wòl tĕ mơ nùs lề lac! Rac ròc tĕ di đap bol khai mơ bơta sràt bơtang.

⁷Mơ tòm tŭ bol khai đơs mơ mê lah: ‘Ñchi bơh tài mê rac ròc taih?’ Gen mê rơp ho lah: ‘Hơ̆ la tài bơh neh kơno jơnau yal. Kòp nơm nùs rơp lề lac, kòp nơm tê rơp lơbơn lơño, kòp nơm hwềng soàn rơp bòl glar òsô, kòp nơm gơltang rơp gơlik be dà. Ne, gơ rơp tus, mơ rơp gơlik gơs di ngan,’ Jehôwa Yàng Tom Trồ đơs behơ̆!”

⁸Mơ gơs jơnau Yàng Jehôwa đơs mơ añ lah:

⁹“Ơ kòn mơnus, đơs hwơr tĕ, lah: ‘Yàng Jehôwa đơs be do: Dô nơm đào, dô nơm đào, tồl sồt mơ tho goh;

¹⁰Tồl sồt nàng sreh tơnchơt, tho goh nàng gơcrà kung be puhlèp! Mbe bol he rgơi hòn chò taih? Bơh mê kòn klau añ neh sền òsơp gai mơng mơ ală bơta lơh glài tơmàl.

¹¹Đào neh geh ai nàng geh tho goh, nàng geh sơmbat kơ̆ mơ tê; gơ neh geh tồl sồt mơ tho goh, nàng ơn tòm tê cau sreh tơnchơt.

¹²Ơ kòn mơnus, driau nggà tĕ mơ ñìm rac, bơh hơ̆ la bơta tòmdră mơ làng bol Añ jê, tòmdră mơ jơh ală cau kwang at bồ Israel dê, bol khai kòl jào phi đào in bal mơ làng bol Añ jê. Behơ̆ tàng, tur tĕ ntơh bol mê dê!

¹³Kơlôi sơwì tĕ: Ñchi bơta rơp gơlik gơs, dilah bol mê sền òsơp dê gai mơng, ală bơta hơ̆ rơp ò gơlik tus sơl ơ? Jehôwa Yàng Tom Trồ đơs behơ̆.’

¹⁴Ai mê, ơ kòn mơnus, đơs hwơr tĕ mơ tàp tê. Lòi tĕ đào sreh bàr dơ̆, pe dơ̆. Hơ̆ la đào sreh tơnchơt, dô ngkơr đào sreh tơnchơt dờng ngan, gơrwàng gùt dar bol khai.

¹⁵Gen tàng ală nùs lề lac, mơ gơs oă cau rơp gơpừ. Añ neh ơn đào sreh tơnchơt di jơh ală mpồng mut tòm ƀòn bol khai dê. Ơ hơh! Đào neh tiar gơcrà be puhlèp, gơ neh cau at nàng sreh tơnchơt.

¹⁶Ơ đào, sreh tĕ đah ma, mơ sreh tĕ đah kiau, sreh tĕ gah lơi mat đào wèt.

¹⁷Añ kung rơp tàp tê, Añ rơp lơh hừh bơta gơjrañ dờng Añ jê. Să tòm Añ la Yàng Jehôwa đơs behơ̆.”

¹⁸Gen gơs jơnau Yàng Jehôwa dê tus mơ añ lah:

¹⁹“Ơ kòn mơnus, lơh tĕ tềl sơnio bàr nơm gùng nàng đào bơtau Babilôn dê lòt jat, bàr nơm gùng hơ̆ rơp sơntòm bơh di dô nơm lơgar. Sơntơp tĕ jrong lơh tềl di ală sơnah gùng lam tus hơ ƀòn dờng.

²⁰Lơh tĕ tềl sơnio gùng nàng lam đào lòt tus tòmdră mơ Rabba cau Ammôn dê, mơ dô gùng ndai tòmdră mơ Juda mơ ƀòn dờng kơ̆ cê Jerusalem.

²¹Bơh cau bơtau Babilôn rơp ơm dơh wơl di tiah jơnum ală gùng hơ̆ dê, di sơnah bàr nơm gùng hơ̆ nàng sền dà. Bơtau hơ̆ rơp ai kam tă khà; khai rơp hòi lùp ală yàng rùp ràk khai dê, khai rơp sền sơwì klòm ală phan ơn.

²²Tòm tê ma khai dê rơp tă khà bơh Jerusalem, tềng hơ̆ khai rơp rơndap ală rơndeh tơm tơrlah dơrñang ƀòn, ai jơnau sồr sreh tơnchơt, ai jơnau driau dờng tòmlơh, rơndap ală rơndeh tơm tơrlah ală mpồng ƀòn, bơt ală dơrñang gơrwàng gùt dar ƀòn dờng.

²³Mơya gơwèt mơ khai gơlơh kung be la dô bơta sền dà ma blac gơwèt hơ ală cau neh srat să ho nền dòn song mơ cau bơtau, mơya cau bơtau rơp tơngkah wơl bol khai in bơh bơta tìs glài bol khai dê mơ kup cèng pơrdô bol khai.

²⁴Gen tàng, Jehôwa Yàng Tom Trồ đơs be do: ‘Tài bơh bol mê neh tơngkah wơl bơta tìs glài bol mê dê bơh bơta tòmdră loh làng behơ̆, yal tơlik ală bơta tồi glài bol mê dê tòm ală broă bol mê neh lơh, tài bơh bol mê neh lơh bơta hơ̆ gen bol mê rơp kong kup cèng.

²⁵Ơ ală cau kwang at bồ ƀơ̆ ƀơl mơ iơh bơsak Israel dê, ngai bol mê dê neh tus, tŭ tơngai kong lơh glài neh di rau.’

²⁶Jehôwa Yàng Tom Trồ đơs be do: ‘Hồ tĕ chèo pùt bồ, tă tĕ sơgơn bơtau. Ală bơta rơp ò gam wơl be lài òr! Cau liah hơđơm rơp geh yò tơngguh hơđang mơ cau neh geh yò hơđang rơp kong tơnliah hơđơm.

²⁷Dô gơnru tơrlah tơrling! Dô gơnru tơrlah tơrling! Añ rơp lơh gơ in gơlik gơs dô gơnru tơrlah tơrling! Gơ rơp ò geh bơt wơl tai jơl tus di tŭ tus Bơtau mơ khai gơrê bal dô bă di pal; Añ rơp jào gơ Bơtau hơ̆ in.’

²⁸Ai mê, ơ kòn mơnus, đơs hwơr tĕ mơ lah: ‘Bơh kòn sau Ammôn mơ jơnau tràl sơrbil bol khai dê, gen Jehôwa Yàng Tom Trồ đơs be do: Dô nơm đào, dô nơm đào, neh tă tơlik nàng sreh tơnchơt; neh tồl nàng sa loan, mơ gơcrà be puhlèp!

²⁹Bulah gơs ală bơta gơtơnggŏ ma blac bơh broă bol mê, mơ bơta sền dà đơs blac bơh bol mê, gơ rơp ơn di ngko ală cau iơh bơsak rơp kong sreh chơt, ngai bol khai neh tus, tŭ tơngai lơh glài neh di rau.

³⁰Srồm tĕ đào tòm sơmprồm gơ dê. Tòm tiah mơ bol mê neh geh crơng gơs, tòm lơgar ồng pàng bol mê dê, añ rơp cahrña bol mê.

³¹Añ rơp tuh bơta gơjrañ dờng Añ jê hơđang bol mê mơ khồm ồs bơta gơjrañ Añ jê hơđang bol mê, Añ rơp jào phi bol mê tòm tê ală cau iơh rmơh ngan, jak chài tòm bơta tơnroh.

³²Bol mê rơp gơlik gơs kung be lòng sing ồs, mhàm bol mê rơp tuh tòm lơgar bol mê dê, rơp ò gơs cau lơi kah wơl bol mê; bơh Añ la Yàng Jehôwa neh đơs behơ̆.’”