Read koho Ejekiel 22 Bible Online

Ejekiel 22 - koho bible

Ejekiel 22

¹Gơs jơnau Yàng Jehôwa đơs mơ añ lah:

²“Ơ kòn mơnus, mê rơp cahrña ơ? Mê rơp cahrña ƀòn dờng bềng mhàm do ơ? Gen yal tĕ gơ in git jơh ală broă lơh cù kìr gơ dê.

³Mê rơp đơs lah: ‘Jehôwa Yàng Tom Trồ đơs be do: Dô nơm ƀòn dờng tuh hơđang să tòm gơ bơta lơh gơtuh mhàm, tŭ tơngai gơ dê neh tus rau, mòn ală rùp ràk lơh ƀơ̆ ƀơl is să tòm gơ.

⁴Ai neh gơlik gơs tồi glài bơh lơh gơtuh mhàm, mơ ai neh gơlik gơs ƀơ̆ ƀơl bơh ală rùp ràk mơ ai neh lơh gơs. Ai neh tơnlồi ală ngai ai dê mơ pơndut ală nam ai dê. Gen tàng Añ neh lơh ai in gơlik gơs tềl ƀàssìl ƀàsso ală làng bol in mơ bơta ñŏ tơnhial jơh ală lơgar in.

⁵Jơh ală cau ơm rềp bal mơ ală cau ơm ngài bơh ai rơp dơñŏ tơnhial ai, ai ò gam tiơng pơnro tai, bềng lìu bơta sơlồng sơlàng.

⁶Sền tĕ: mbe kòp nă ală cau kwang at bồ Israel dê ơm tòm ai ngui gơnoar khai dê nàng lơh gơtuh mhàm.

⁷Digùl ai, cau neh sền òsơp di mè bèp, digùl ai cau neh rồn bơklơn cau lơgar ndai; digùl ai cau gơwèt ò niam mơ cau kòn đòi bal mơ cau ùr bơnrau.

⁸Ai neh sền òsơp di ală phan sàng goh Añ jê, mơ lơh ƀơ̆ ƀơl ală ngai Saƀat Añ jê.

⁹Digùl ai gơs ală cau lơh cơng blac lơh gơtuh mhàm; digùl ai gơs ală cau ñô sa tòm ală hìu bơmồng hơđang mơnơm mơ tìs glài rềs àr.

¹⁰Digùl ai gơs ală cau ò jơm bơta ơm kuh lòi rồ bèp bol khai dê; digùl ai gơs ală cau bơklơn ală cau ùr gŏ să òs kơnhai.

¹¹Digùl ai, dô nă cau klau do tìs glài ƀơ̆ iơh mơ bau ùr cau gơp ƀòn khai dê, dô nă cau klau ne lơh bơta ƀàssìl ƀàsso mơ ƀan khai dê, mơ dô nă cau klau ndai tai lơh tìs mơ bi ùr khai dê, la kòn ùr bèp tòm khai dê.

¹²Digùl ai, cau dòp ală phan loă nàng lơh gơtuh mhàm; ai ai cau càn jền mơ sa cồng kơnjơ̆ ngan, mơ ai kơnòm di bơta sa kơrlơm cau ơm rềp mơ he mơ dòp cồng nha ò song ring. Mơ ai neh hŭi Añ, Jehôwa Yàng Tom Trồ đơs behơ̆.

¹³Sền ne, Añ rơp pah tê Añ bơh bơta sa cồng ò song ring ai neh lơh, mơ bơh mhàm ai neh lơh gơtuh digùl ai.

¹⁴Bơta khin cha ai dê rơp ơm kơ̆ hala tê ai dê rgơi gam pràn tòm ngai Añ cahrña ai sơl? Añ, Yàng Jehôwa, neh đơs behơ̆ mơ Añ rơp lơh bơta hơ̆.

¹⁵Añ rơp lơh ai in gơprah gơpring digùl ală làng bol, mơ Añ rơp rsìh ai tòm ală lơgar; mơ pơndut tơnlồi bơta ƀơ̆ ƀơl ai dê.

¹⁶Tòm tŭ ai neh gơlik ƀơ̆ iơh di đap mat ală làng bol gen ai rơp git Añ la Yàng Jehôwa.’”

¹⁷Gơs jơnau Yàng Jehôwa đơs mơ añ lah:

¹⁸“Ơ kòn mơnus, hìu Israel neh gơlik gơs Añ in kung be ală nsồ nsiă gam wơl; jơh ală bol khai kung be kòng, sơlo, lòs, mơ trà gam wơl tòm bơnhă ồs, bol khai la è priă.

¹⁹Gen tàng Yàng Jehôwa đơs be do: ‘Tài bơh bol mê jơh tơl nă neh gơlik gơs nsồ nsiă, gen tàng Añ rơp pơjum bol mê tòm Jerusalem.

²⁰Kung be cau tơrgòm wơl priă, kòng, lòs, trà, mơ sơlo tòm bơnhă ồs mơ puh ồs hơng nàng ryă tơnlề gơ mbe lơi, gen kung behơ̆, Añ rơp tơrgòm bol mê tòm bơta gơjrañ mơ bơta gơjrañ dờng Añ jê, mơ ơn bol mê tòm dơlam nàng ryă tơnlề bol mê.

²¹Añ rơp tơrgòm bol mê mơ Añ rơp khồm ồs bơta gơjrañ dờng Añ jê hơđang bol mê, gen bol mê rơp lề lac tòm gơ.

²²Be priă lề lac tòm bơnhă ồs gen bol mê kung rơp lề lac tòm gùl ƀòn dờng hơ̆, mơ bol mê rơp git lah Añ, Yàng Jehôwa, neh tuh bơta gơjrañ dờng Añ jê hơđang bol mê.’”

²³Gen gơs tai jơnau Yàng Jehôwa đơs mơ añ lah:

²⁴“Ơ kòn mơnus, đơs tĕ mơ lơgar lah: ‘Ai la lơgar ò geh rào goh hala geh mìu tòm ngai gơjrañ dờng.

²⁵Ală cau gơnoar hwơr gơ dê neh bơyai bơtào kai gơrmơ̆i kung be klìu triă ơluh ơhùm kap crè phan kup geh gơ dê; bol khai crè sa làng bol, tòmpìt ai ală đam jàr mơ ală phan màng, lơh gơlik gơs oă cau ùr bơnrau tòm gơ.

²⁶Ală cau gơnoar ơn phan duh khoai gơ dê sang lòi bơta boh lam Añ jê mơ lơh ƀơ̆ ƀơl ală phan sàng goh Añ jê; bol khai ò cah is phan lơi la sàng goh mơ phan lơi la phan òs; bol khai kung ò bơto gơs bơta krơi is digùl phan ƀơ̆ ƀơl mơ phan sàng goh; mơ bol khai ñềm mat wèt ò kơlôi rcang hơ bơta prap gàr ală ngai Saƀat Añ jê, tian gơs lơh Añ in gơkòl sền òsơp digùl bol khai.

²⁷Ală kwang at bồ bol khai dê la kung be so rhao kap crè phan kup geh, bol khai lơh gơtuh mhàm mơ tơnchơt làng bol nàng dòp geh cồng nha ò song ring.

²⁸Ală cau gơnoar hwơr gơ dê pih bò ală broă lơh hơ̆ bol khai in kơnòm di ală bơta gơtơnggŏ roh lơm mơ bơta sền dà ma blac bol khai in mơ đơs lah: “Do la jơnau đơs Jehôwa Yàng Tom Trồ dê,” tòm tŭ Yàng Jehôwa ò đơs behơ̆.

²⁹Làng bol tòm lơgar òs sa kơrlơm mơ tìs glài ntung kơñau, bol khai rồn bơklơn cau rƀah lơòi mơ cau siơ̆u siar, mơ lơh ò di ò niam gơwèt mơ cau ơm tòp, ò lơh bơta song ring bol khai in.

³⁰Añ neh jòi dô nă cau tòm gùl bol khai nàng bơt bơtào wơl dơrñang, ala mat làng bol mơ ntào di đap Añ tòm tiah pah digùl tồ Añ in ò tơnroh gơ; mơya Añ ò jòi bàn dô nă cau lơi.

³¹Gen tàng Añ tuh bơta gơjrañ dờng añ jê hơđang bol khai, ngui ồs bơta gơjrañ Añ jê nàng sa roh bol khai, tuh wơl hơđang bồ bol khai jơh ală bơta bol khai neh lơh, Jehôwa Yàng Tom Trồ đơs behơ̆.’”