Read koho Ejekiel 24 Bible Online

Ejekiel 24 - koho bible

Ejekiel 24

¹Nam dơ̆ sin, kơnhai jơt ngai jơt, gơs jơnau Yàng Jehôwa đơs mơ añ lah:

²“Ơ kòn mơnus, cih tĕ sơnđan ngai do dê, ngan ngai do. Bơtau Babilôn neh gơrwàng ƀòn dờng Jerusalem ngan tòm ngai do.

³Yal tĕ mơ hìu jak tòmdră in dô jơnau đơs pơnhồr mơ đơs mơ bol khai do la jơnau đơs Jehôwa Yàng Tom Trồ dê: ‘Ơn tĕ glah hơđang bơnhă ồs, ơn tĕ hơđang mơ tuh dà tòm hơ̆.

⁴Ơn tĕ ală pet poac tòm glah, jơh ală pet poac niam, bơnô mơ pơnì. Tơmbềng tĕ gơ mơ ală ntìng neh sac rwah;

⁵Sac rwah tĕ dô nơm niam rlau jơh tòm mpồl. Dap tĕ lòng hơđơm glah; gơm ală pet poac, mơ ryă ală ntìng tòm hơ̆.’

⁶Gen tàng do la jơnau đơs Jehôwa Yàng Tom Trồ dê: ‘Bòl glar ngan ƀòn dờng bềng mhàm, bòl glar ngan glah tŭ do neh gơs è sa, mơ è sa hơ̆ òhềt tho goh! Tă tơlik jơh tĕ dơ̆ dô pet dô pet, ò càng sac rwah.

⁷Bơh mhàm mơ khai neh lơh gơhòr gam ơm tòm dơlam gơ; Khai neh ơn gơ hơđang dô pơnai lŭ mpòl; khai ò tuh gơtòm ù nàng bồr gơ mơ ù.

⁸Nàng tơngguh bơta gơjrañ dờng Añ jê, mơ bơta sal tê, Añ neh ơn mhàm mơ khai neh lơh gơtuh hơđang dô pơnai lŭ mpòl, tian gơs gơ ò rgơi jơm ndơp tai.’

⁹Gen tàng, Jehôwa Yàng Tom Trồ đơs be do: ‘Bòl glar ngan ƀòn dờng bềng mhàm! Añ kung rơp dap gơnru dờng oă lòng.

¹⁰Behơ̆, dap tĕ lòng mơ sing tĕ ồs. Gơm sin tĕ poac, bơcă tĕ mơ ală kơmbuh gơm biap, mơ lòi tĕ ală ntìng ồs sa.

¹¹Ơn tĕ glah gòi hơđang ồs rnga jơl tus di tŭ ồs sa duh ngan mơ gơ hơng gơcrà nàng ală phan ƀơ̆ ƀơl gơlề lac jơh mơ ală è sa gơ kong ồs sa jơh.

¹²Ngan bơta kơlôi rcang la ò kwơ; è sa lơut ngan ò rgơi tă, ơn tòm ồs bal mơ è sa gơ dê.

¹³Tòm tŭ Añ neh kòñ rào ai bơh bơta tồi glài rềs àr dri tơlàr ai dê, mơya ai ò gơs goh bơh di ală bơta ƀơ̆ ƀơl ai dê, ai rơp ò tai geh lơh goh jơl tus di tŭ lơi Añ neh rài bơta gơjrañ dờng Añ jê gơwèt mơ ai.

¹⁴Añ la Yàng Jehôwa neh đơs; tŭ jơ neh tus, Añ rơp lơh broă. Añ rơp ò nđàc sơngit, Añ rơp ò ruc wơl; Añ rơp ò gơn tai. Jat be ală gùng dà ai dê mơ broă ai neh lơh, Añ rơp cahrña ai,’ Jehôwa Yàng Tom Trồ đơs behơ̆.”

¹⁵Gơs jơnau Yàng Jehôwa đơs mơ añ lah:

¹⁶“Ơ kòn mơnus, do, nisơna Añ rơp tă bơh di mê bơta mơ mat mê kòñ gơboh; mê rơp ò moat jrùng mơ ñìm ƀồc, rơp ò lòi dà mat gơhòr.

¹⁷Rac ròc òm mơya ò di dờng jơnau, ò ñìm bơh cau chơt in. Pùt chèo di bồ mê mơ jă khŏ di jơng; bañ cang sơnò tềp hala sa piang lă cau còp iang.”

¹⁸Behơ̆ tòm àng drim añ neh đơs mơ làng bol; tus di mho gen bau ùr añ chơt. Drim ngai hìng añ lơh jat tòm toh be jơnau Yàng neh sồr añ.

¹⁹Gen làng bol lùp añ lah: “Ồng rơp ò yal bol hi in jơnau gơtha bơh broă do gơwèt mơ bol hi ơ?”

²⁰Behơ̆ añ đơs mơ bol khai lah: “Gơs jơnau Yàng Jehôwa đơs mơ añ lah:

²¹‘Đơs tĕ mơ hìu Israel: Jehôwa Yàng Tom Trồ đơs be do: Do, Añ rơp lơh ngkòr ngkàc tiah sàng goh Añ jê, bơta jòng să bơh gơnoar pràn mê dê, mat mê gơboh gơbài, la bơta nùs mê hàm kòñ. Ală kòn klau kòn ùr bol mê dê mơ bol mê neh lòi wơl bơh ngkòi rơp gơpừ bơh đào.

²²Mơ bol mê rơp lơh kung be añ neh lơh; bol mê rơp ò jơm bơr đah đang, kung ò sa phan cau cèng còp iang.

²³Bol mê rơp kư̆ lòi tơn chèo neh pùt hơđang bồ mơ gơltau jă neh jă di jơng bol mê dê. Bol mê rơp ò rac ròc hala ñìm, mơya bol mê rơp siar roh tài bơh tồi glài bol mê dê mơ rơnđơh bal mơ gơp.

²⁴Ejekiel rơp la dô nơm tềl sơnio bol mê in, bol mê rơp lơh tòm toh kung be khai neh lơh. Tòm tŭ ală bơta do gơlik tus, bol mê rơp git Añ la Jehôwa Yàng Tom Trồ.’

²⁵Ai mê, ơ kòn mơnus, tòm ngai Añ tă tơlik bơh di bol khai tiah kơ̆ cê, bơta hòn chò mơ bơta gơklŏ bol khai dê, bơta mat bol khai hàm kòñ, bơta nùs bol khai kòñ gơboh, bal mơ ală kòn klau mơ ală kòn ùr bol khai dê sơl

²⁶tòm ngai hơ̆ rơp gơs dô nă cau ntoat tus yal jơnau neh gơlik gơs bol mê in.

²⁷Tòm ngai hơ̆, bơr mê rơp gơ pò; bol mê rơp đơs bal mơ khai mơ ò ơm mŏ mŏ tai. Behơ̆ mê rơp gơlik gơs dô nơm tềl sơnio bol khai in, mơ bol khai rơp git Añ la Yàng Jehôwa.”