Read koho Ejekiel 25 Bible Online

Ejekiel 25 - koho bible

Ejekiel 25

¹Gơs jơnau Yàng Jehôwa đơs mơ añ lah:

²“Ơ kòn mơnus, wèt mat tĕ hơ làng bol Ammôn, mơ đơs hwơr tòmdră mơ bol khai.

³Đơs tĕ mơ cau Ammôn lah: ‘Iat tĕ jơnau Jehôwa Yàng Tom Trồ dê. Jehôwa Yàng Tom Trồ đơs be do: Tài bơh mê neh đơs lah: “Ha ha!” bơh tiah sàng goh Añ jê, tòm tŭ gơ neh gơkòl sền òsơp, mơ hơđang lơgar Israel tòm tŭ gơ kong lơh gơs tiah sang lòi srau gòi, mơ bơh cau Juda tòm tŭ khai neh kòl kup cèng pơrdô,

⁴gen tàng Añ rơp jào bol mê tòm tê làng bol đah mattơngai lik lơh gơs phan tòm. Bol khai rơp bơt hìu mơ sơntơp sàl bol khai dê digùl bol mê; bol khai rơp sa plai bol mê dê mơ hùc dà toh bol mê dê.

⁵Añ rơp lơh Raba in gơlik gơs ƀlàng ñhơt làkđa in, mơ lơh Ammôn in gơlik gơs tiah belàt in bic rlô. Gen bol mê rơp git Añ la Yàng Jehôwa.’

⁶Bơh Jehôwa Yàng Tom Trồ đơs be do: ‘Tài bơh bol mê neh tàp tê ntrơm jơng hòn chò mơ tơl jơh bơta iơh bơsak tòm nùs bol mê dê tòmdră mơ lơgar Israel,

⁷gen tàng Añ neh pò tê tòmdră mơ mê mơ jào phi mê lơh gơs phan tòmpìt sơmbrơt ală làng bol in. Añ rơp tơnlồi mê bơh di ală làng bol, rơp pơndut mê bơh di ală lơgar. Añ rơp tơnroh mê, mơ mê rơp git Añ la Yàng Jehôwa.’”

⁸Jehôwa Yàng Tom Trồ đơs be do: “Tài bơh Môap mơ Seir neh đơs lah: ‘Sền ne, hìu Juda neh gơlik gơs kung be jơh ală lơgar ndai,’

⁹gen tàng Añ rơp ràng tơlik wĕ Môap dê, rơp sơntòm bơh ală ƀòn dờng di nhàr lơgar, hơ̆ la ală ƀòn dờng Bet Jesimôt, Baal Meôn, mơ Kiriathaim, la bơta gơklŏ lơgar dê.

¹⁰Añ rơp jào phi Môap bal mơ làng bol Ammôn lơh gơs phan tòm làng bol đah mattơngai lik in, tồ làng bol Ammôn ò geh cih kah tai digùl ală làng bol;

¹¹mơ Añ rơp lơh gơlik gơs bơta cahrña hơđang Môap. Gen bol khai rơp git Añ la Yàng Jehôwa.”

¹²Jehôwa Yàng Tom Trồ đơs be do: “Tài bơh làng bol Edôm neh sal tê tòmdră di hìu Juda, mơ neh lơh bơta tràl sơrbil kơnjơ̆ bơh neh sal tê hơđang bol khai,

¹³gen tàng Jehôwa Yàng Tom Trồ đơs be do: ‘Añ rơp pò tê tòmdră mơ Edôm mơ tơnchơt ală kòn mơnus mơ ală phan poan jơng bol khai dê. Añ rơp lơh gơ in gơlik gơs tiah sang lòi srau gòi, mơ bơh Theman tus Dedan, bol khai rơp gơpừ bơh đào.

¹⁴Añ rơp tơmù bơta sal tê di Edôm bơh tê làng bol Israel Añ jê; mơ bol khai rơp lơh di Edôm jat be bơta gơjrañ mơ bơta gơjrañ dờng Añ jê; bol khai rơp git bơta sal tê Añ, Jehôwa Yàng Tom Trồ đơs behơ̆.’”

¹⁵Yàng Jehôwa đơs be do: “Tài bơh làng bol Philistin neh sal tê, lơh bơta sal wơl mơ nùs lac lèo, bơh bơta sò tơm yau òr mơ jòi tơnroh Juda,

¹⁶gen tàng Jehôwa Yàng Tom Trồ đơs be do: ‘Añ rơp pò tê tòmdră mơ làng bol Philistin, Añ rơp tơnchơt ală cau Keret mơ tơnroh jơh ală cau gam wơl ơm rò gah dàlềng.

¹⁷Añ rơp lơh gơlik gơs bơta sal tê kơnjơ̆ hơđang bol khai, mơ lơh glài bol khai tòm bơta gơjrañ dờng Añ jê. Gen bol khai rơp git Añ la Yàng Jehôwa, tòm tŭ Añ sal tê di bol khai.’”