Read koho Ejekiel 29 Bible Online

Ejekiel 29 - koho bible

Ejekiel 29

¹Tòm nam jơt, kơnhai jơt, ngai jơt bàr, gơs jơnau Yàng Jehôwa đơs mơ añ be do:

²“Ơ kòn mơnus, wèt tĕ mat mê tòmdră mơ Pharaôn, bơtau Ejiptơ, mơ đơs hwơr tĕ tòmdră mơ khai bal mơ jơh Ejiptơ.

³Đơs tĕ mơ yal lah: Jehôwa Yàng Tom Trồ đơs be do: ‘Ơ Pharaôn, bơtau Ejiptơ, Añ tòmdră mơ mê, mê la dô nơm phan poan jơng cù kìr bic rò digùl ală hiòng dà. Mê đơs lah: “Hiòng Nil gơrê bal mơ añ, añ neh lơh gơs gơ să tòm añ in.”

⁴Mơya Añ rơp ơn kơndàr tòm bàr đah kàng mê, mơ lơh ală ka tòm hiòng mê gơđềt di ngkàp mê dê. Añ rơp hwài tơngguh mê bơh di ală hiòng dà mê dê, bal mơ jơh ală ka gơđềt di ngkàp mê dê tai sơl.

⁵Añ rơp sơrbì mê tòm ƀlàng bràs, mê bal mơ jơh ală ka tòm ală hiòng dà mê dê. Mê rơp gơpừ hơđang ƀlàng dờng mơ rơp ò geh tơrgòm wơl hala dòñ wơl. Añ rơp lơh mê in gơlik gơs phan sa ală jơi phan poan jơng hơđang ù mơ jơi sềm par tòm pah gòi.

⁶Gen jơh làng bol ơm tòm Ejiptơ rơp git Añ la Yàng Jehôwa. Mê neh gơlik gơs gai jra mơ proh hìu Israel in.

⁷Tòm tŭ bol khai at mê mơ tê bol khai dê gen mê pă, mơ lơh gơcrè pơnì bol khai dê; tòm tŭ bol khai sơnđìng di mê gen mê pă mơ lơh jơng bol khai gơglih.’

⁸Gen tàng Jehôwa Yàng Tom Trồ đơs be do: ‘Añ rơp cèng đào tus hơđang mê, mơ tơnroh bơh tòm mê kòn mơnus mơ phan poan jơng.

⁹Ejiptơ rơp gơlik gơs tiah srau gòi mơ ngềt ngơt; gen bol khai rơp git Añ la Yàng Jehôwa. Tài bơh mê neh đơs lah: “Hiòng Nil gơrê bal mơ añ, añ neh lơh gơs gơ,”

¹⁰gen tàng, Añ tòmdră mơ mê tòmdră mơ ală croh dà mê dê, mơ Añ rơp lơh lơgar Ejiptơ gơlik gơs tiah tơrlah tơrling, tiah sang lòi srau gòi bơh Mikdôl tus Siene, ngài tus di nhàr lơgar Ethiôpi dê.

¹¹Ò gơs mpàng jơng kòn mơnus hala mpàng jơng phan poan jơng dê rơp lòt gan gơ, ò gơs cau lơi rơp ơm tềng hơ̆ tòm poan jơt sơnam.

¹²Añ rơp lơh lơgar Ejiptơ gơlik gơs dô nơm lơgar srau gòi ơm digùl ală lơgar srau gòi, mơ ală ƀòn dờng gơ dê rơp ơm srau gòi tòm poan jơt sơnam digùl ală ƀòn dờng tơrlah tơrling. Añ rơp lơh nrah nring cau Ejiptơ tòm ală làng bol, mơ rsìh bol khai tòm ală lơgar.

¹³Bulah behơ̆, Jehôwa Yàng Tom Trồ đơs be do: Tus di lồi poan jơt sơnam rau, Añ rơp pơjum tơrgòm làng bol Ejiptơ bơh di ală làng bol mơ bol khai neh nrah nring tòm hơ̆.

¹⁴Añ rơp cèng bol khai rê wơl bơh di tiah bol khai kong kup cèng pơrdô, mơ cèng bol khai rê wơl tòm Phatrôs, la lơgar tòm kơnhwàl bol khai dê. Tềng hơ̆, bol khai rơp gơlik gơs dô nơm lơgar dềt rhền lơbơn lơño.

¹⁵Gơ rơp la dô nơm lơgar bơtau dềt rhền lơbơn lơño rlau jơh tòm ală lơgar ndai, mơ gơ rơp ò gơs tŭ lơi geh bơtào tơngguh is gơ dê hơđang ală làng bol ndai tai. Añ rơp lơh gơ in dềt rlau jơh tòm ală lơgar bơtau, mơ rơp ò gơs tŭ lơi at bồ hơđang ală làng bol tai.

¹⁶Ejiptơ rơp ò tai gam la tòm ryas bơta gơn kơnòm làng bol Israel in, mơya la dô bơta tơngkah wơl bơh tồi glài bol khai dê, tòm tŭ bol khai wèt wơl hơ Ejiptơ nàng geh dong kòl. Gen bol khai rơp git Añ la Jehôwa Yàng Tom Trồ.’”

¹⁷Tòm nam bàr jơt poh, ngai dùl kơnhai dùl, gơs jơnau Yàng Jehôwa đơs mơ añ lah:

¹⁸“Ơ kòn mơnus, Nebukatnessar, bơtau Babilôn, neh kup mpồl ling khai dê lơh broă bòl glar ngan tòmdră mơ Tirơ. Kòp nơm bồ neh roh jơh sŏ, kòp nơm pơnì neh kong siar roh. Bulah behơ̆ khai mơ mpồl ling khai dê òhềt dòp geh phan lơi bơh Tirơ nàng tơm jền tơngai bơta bòl glar lik lòt tòmdră gơ.

¹⁹Gen tàng, Jehôwa Yàng Tom Trồ đơs be do: ‘Añ rơp jào phi Ejiptơ bơtau Babilôn in la Nebukatnessar, khai rơp tă cèng phan mơna gơ dê. Khai rơp tă ai mơ tòmpìt phan mơna lơgar dê nàng tơm jền tơngai mpồl ling khai in.

²⁰Añ neh ai Ejiptơ khai in lơh gơs phan tơm bơta bòl glar khai neh kong, tài bơh khai mơ mpồl ling khai dê neh lơh broă hơ̆ Añ in,’ Jehôwa Yàng Tom Trồ đơs behơ̆.

²¹Tòm ngai hơ̆, Añ rơp lơh hòn dô nơm ngke bơh hìu Israel, mơ Añ rơp pò lơmpiat mê digùl bol khai. Gen bol khai rơp git Añ la Yàng Jehôwa.”