Read koho Ejekiel 3 Bible Online

Ejekiel 3 - koho bible

Ejekiel 3

¹Gen Kơnràñ đơs mơ añ lah: “Ơ kòn mơnus, sa tĕ phan ơm di đap mê, sa tĕ pồt sră do; lồc behơ̆ lòt tĕ đơs mơ hìu Israel.”

²Añ pò bơr añ jê mơ Kơnràñ ai añ in sa pồt sră hơ̆.

³Kơnràñ đơs mơ añ lah: “Ơ kòn mơnus, sa tĕ pồt sră do mơ Añ ai mê in mơ tơmbềng tĕ kơndul mê bơh gơ.” Behơ̆ añ neh sa gơ, mơ tòm bơr añ gơ lơngồt kung be dà lơwe.

⁴Kơnràñ đơs mơ añ lah: “Ơ kòn mơnus, tŭ do lòt tĕ tus hơ hìu Israel, mơ yal ală jơnau đơs Añ jê bol khai in.

⁵Mê ò di geh sồr lòt tus hơ dô nơm làng bol đơs jơnau kalke wă wơng mơ sap krơi is, mơya tus hơ hìu Israel;

⁶ò di tus hơ oă làng bol đơs jơnau kalke wă wơng mơ sap krơi is, la ală jơnau đơs mơ mê ò rgơi git wă. Ngan, dilah Añ neh sồr mê lòt tus hơ bol khai, bol khai neh iat mê.

⁷Mơya hìu Israel rơp ò bài iat mê tài bơh bol khai ò bài iat Añ, bơh jơh dô nơm hìu Israel neh kră nùs mơ kơldang bồ.

⁸Ne, Añ rơp lơh mê in gơs muh mat khin cha tòmdră mơ muh mat bol khai, mơ bìng liang kră tòmdră mơ bìng liang bol khai.

⁹Añ rơp lơh bìng liang mê dê gơlik kung be lŭ kră ngan, kră rlau mơ lŭ tơrneh. Bañ rngòt di bol khai hala rơm să tài bơh bol khai, bulah bol khai la dô nơm hìu jak tòmdră.”

¹⁰Kơnràñ đơs mơ añ lah: “Ơ kòn mơnus, iat tĕ nền nền mơ prap tĕ tòm nùs jơh ală jơnau Añ đơs mơ mê.

¹¹Tŭ do lòt tĕ tus hơ ală cau làng bol mê dê neh kong kup cèng pơrdô mơ đơs mơ bol khai. Đơs tĕ mơ bol khai lah: ‘Do la jơnau đơs Yàng Jehôwa Gơnap Gơnoar Hơđang Rlau Jơh dê.’ Bulah bol khai iat hala ò iat.”

¹²Tŭ hơ̆ Yàng Hwềng cèng tơngguh añ mơ añ kơno đah ngkòi añ gơs ntas nggồr dờng ngan tòm tŭ bơta gơklŏ Yàng Jehôwa dê gơguh bơh di tiah hơ̆;

¹³hơ̆ la ntas đar ală phan wìn kis dê gơ tàp đar do mơ đar ne, mơ ntas ală kong rơndeh di gah bol gơ, dô nơm ntas nggồr dờng ngan.

¹⁴Chòp Yàng Hwềng cèng añ guh mơ cèng añ tus tiah ndai, mơ añ lòt tòm bơta sràt bơtang mơ tòm bơta gơjrañ mañ tòm hwềng añ, gơs tê Yàng Jehôwa dê ơn hơđang añ pràn kơldang.

¹⁵Añ lòt tus hơ ală cau kong kup cèng pơrdô ơm tòm Tel Abip rềp di hiòng Kebar. Mơ tềng hơ̆ la tiah bol khai ơm, añ nggui digùl bol khai tòm poh ngai, dơrcul moat jrùng.

¹⁶Tòm tŭ neh lồi poh ngai hơ̆, gơs jơnau Yàng Jehôwa đơs mơ añ be do:

¹⁷“Ơ kòn mơnus, Añ neh lơh mê in gơlik gơs dô nă cau kơp gàr hìu Israel; behơ̆ iat tĕ jơnau Añ đơs mơ ai jơnau hơ̆ bơto pơhìn Añ jê bol khai in.

¹⁸Dilah Añ đơs mơ dô nă cau iơh bơsak lah: ‘Mê ngan rơp chơt,’ mơ mê ò bơto pơhìn khai hala đơs mơ khai nàng bơto kơryan khai bơh di ală gùng iơh khai dê tồ dong klàs bơta kis khai dê, gen cau iơh bơsak hơ̆ rơp chơt bơh tồi glài khai dê; mơ Añ rơp kup mê kong glài bơh mhàm cau hơ̆.

¹⁹Mơya, dilah mê neh bơto pơhìn cau iơh bơsak hơ̆, mơya khai ò pơrlac sang bơta iơh hala ală gùng tìs khai dê, gen khai rơp chơt bơh tồi glài khai dê; ai mê gen geh dong klàs să tòm he.

²⁰Kung behơ̆, dilah dô nă cau song ring pơrlac sang bơta song ring khai dê mơ lơh bơta iơh, mơ Añ ơn kai gơtup pừ di đap khai gen khai rơp chơt. Tài bơh mê ò bơto pơhìn khai gen khai rơp chơt bơh tồi glài khai dê. Ală bơta song ring mơ khai neh lơh rơp ò gam kah tai, mơ Añ rơp kòp mê gơs glài bơh mhàm khai dê.

²¹Mơya, dilah mê neh bơto pơhìn cau song ring bañ tìs glài mơ khai ò tìs glài, gen ngan khai rơp kis tài bơh neh iat jơnau bơto pơhìn; mơ mê gen geh dong klàs să tòm he.”

²²Tềng hơ̆, tê Yàng Jehôwa dê ơm hơđang añ, mơ Kơnràñ đơs mơ añ lah: “Ñă ntào tĕ mơ lòt tus tòm thòng, tềng hơ̆ Añ rơp đơs mơ mê.”

²³Behơ̆ añ ñă ntào mơ lik lòt tus hơ thòng. Ne, bơta gơklŏ Yàng Jehôwa dê gơs tềng hơ̆, kung be bơta gơklŏ añ neh gŏ di gah hiòng Kebar, mơ añ gơcup blup mat tòm ù.

²⁴Gen Yàng Hwềng mut tòm añ, yò añ ñă ntào. Kơnràñ đơs mơ añ mơ sồr lah: “Lòt tĕ mơ krơ̆ tĕ să mê tòm hìu mê dê.

²⁵Mơ mê, ơ kòn mơnus, mê rơp kong cau kơt mơ che; mê rơp kong cap nàng mê ò rgơi lik lòt digùl làng bol.

²⁶Añ rơp lơh lơmpiat mê dê gơđềt di dò mê dê nàng mê rơp ơm mŏ mŏ mơ ò rgơi lah pơrhơng bol khai; tài bơh bol khai la dô nơm hìu tòmdră.

²⁷Mơya tòm tŭ Añ đơs mơ mê, Añ rơp pò bơr mê, mơ mê rơp đơs mơ bol khai: ‘Do la jơnau đơs Jehôwa Yàng Tom Trồ dê: Cau lơi kòñ iat gen lòi khai iat; cau lơi ò bài iat gen lòi khai ò bài; bơh bol khai la dô nơm hìu tòmdră.’”