Read koho Ejekiel 31 Bible Online

Ejekiel 31 - koho bible

Ejekiel 31

¹Tòm nam dơ̆ jơt dùl, ngai dùl kơnhai pe, gơs jơnau Yàng Jehôwa đơs mơ añ be do:

²“Ơ kòn mơnus, đơs tĕ mơ Pharaôn, bơtau Ejiptơ, bal mơ jơh làng bol khai dê lah: ‘Ñcau rgơi pơndròm mơ mê tòm bơta màng ryŭ taih?

³Ơn nùs kơlôi tĕ bơh Asiri, bơh lài gơ la dô đòm chi nho rề tòm Liban, gơs ală ntê hàng mơnĕ, mƀur jơm gòm jơh brê me; gơ jơnhoa ngan hơđang, cồng gơ ơm digùl ală mhwal.

⁴Ală hiòng dà ròng gơ, ală dà jrô lơh gơhòn dờng, ală hiòng dà hòr gùt dar tiah gơ neh geh tam, mơ ală croh dà gơ tus hơ jơh ală chi tòm ƀlàng.

⁵Behơ̆ gơhòn jơnhoa rlau mơ jơh ală chi tòm ƀlàng; ală ntê gơ gơlik oă mơ ală ntê gơ dê gơlik jòng, mơ gơcat sơnoan tài bơh dà tơngkah tơngkañ.

⁶Jơh ală jơi sềm par hơđang trồ lơh rsòn di ală ntê gơ, jơh ală jơi phan poan jơng tòm ƀlàng deh kòn hơđơm ală ntê gơ; jơh ală lơgar dờng ơm hơđơm mƀur gơ dê.

⁷Gơ la hàng mơnĕ tòm bơta ryŭ ryơm gơ dê bơh ală ntê jòng gơ dê, bơh ryas gơ sro jrô tòm tiah oă dà.

⁸Ală chi nho rề tòm suơn Yàng Tom Trồ dê ò lin rlau mơ gơ, ală chi nho kung ò ndròm bal mơ ală ntê gơ dê, ală chi tòm ƀlàng kung ò rgơi pơndròm mơ ală ntê gơ dê; ò gơs dô đòm chi lơi tòm suơn Yàng Tom Trồ dê be gơtòm bơta hàng mơnĕ.

⁹Añ neh lơh gơ in hàng mơnĕ bơh gơs oă ntê, gơ la bơta ƀoah pơrhiat jơh ală chi tòm Eden, hơ̆ la ală chi tòm suơn Yàng Tom Trồ dê.’

¹⁰Gen tàng Jehôwa Yàng Tom Trồ đơs be do: ‘Tài bơh gơ dờng jơnhoa, să gơ jơnhoa hơđang ală mhwal, mơ nùs gơ bơh gơ jòng să bơh bơta jơnhoa gơ dê,

¹¹Añ neh jào gơtòm tê cau at bồ ală lơgar dê nàng khai lơh di gơ di pal mơ bơta iơh bơsak gơ dê. Añ neh sang lòi gơ.

¹²Ală làng bol bơdìh bơh ală làng bol jàñ bơsak rlau jơh koh gơ mơ sang gơ. Ală ntê gơ gơdùh hơđang ală mơnơm mơ tòm jơh ală thòng; ală ntê gơ dê gơkòl dơrpă mơ sang lòi tòm jơh ală hiòng dà tòm lơgar. Jơh ală làng bol tòm ù lik bơh di mƀur gơ dê mơ sang lòi gơ.

¹³Jơh ală jơi sềm par hơđang trồ rơp hơđang tòm chi neh gơpừ, mơ jơh ală jơi phan brê ơm digùl ală ntê gơ dê.

¹⁴Behơ̆, bơh tŭ do ò gơs tòm chi lơi hòn di gah dà rgơi hòn dờng jơnhoa, hala ơn cồng gơ digùl ală mhwal, mơ ò gơs chi geh tuh oă dà behơ̆ rgơi guh tus hơ tiah jơnhoa behơ̆. Jơh ală bol gơ neh kòl jào bơta chơt in tòm tiah hơđơm plai ù, bal mơ kòn mơnus, bal mơ ală cau hơ̆ mù tòm trồm jrô.’

¹⁵Jehôwa Yàng Tom Trồ đơs be do: ‘Tòm ngai gơ mù tòm bơtô ƀồc, Añ neh bồr ală cìr jrô; Añ kơryan ală hiòng gơ dê, mơ bơt ală hiòng dà dờng gơ dê. Añ tơnsoh Liban in bơta ñìm rac bơh gơ, mơ jơh ală chi tòm ƀlàng rơp ro bơh gơ.

¹⁶Añ neh lơh ală làng bol in lơnggơr bơh ntas bơta gơpừ gơ dê, tòm tŭ Añ sơrbì gơ mù tòm bơtô ƀồc bal mơ jơh ală cau mù tòm bơtô. Gen jơh ală chi tòm Eden, ală chi geh sac rwah niam rlau jơh Liban dê, jơh ală chi geh tuh oă dà, geh pơndòm pơniang tòm plai ù hơđơm.

¹⁷Bol khai kung mù bal mơ gơtòm bơtô ƀồc hơ ală cau kong tơnchơt bơh đào bal mơ ală cau lơh dô bă bal mơ gơ, la ală cau kis tòm mƀur gơ dê digùl ală lơgar.’

¹⁸Chi lơi tòm ală chi tòm Eden la ndròm be mê tòm bơta gơklŏ mơ dờng ryŭ taih? Tŭ do, mê rơp kong cèng tơmù bal mơ ală chi Eden dê tus hơđơm plai ù; mê rơp bic digùl ală cau ò kong siat gơltau, bal mơ ală cau neh kong tơnchơt bơh đào. Hơ̆ la Pharaôn mơ jơh làng bol khai dê, Jehôwa Yàng Tom Trồ đơs behơ̆.”