Read koho Ejekiel 33 Bible Online

Ejekiel 33 - koho bible

Ejekiel 33

¹Gơs jơnau Yàng Jehôwa đơs mơ añ lah:

²“Ơ kòn mơnus, tòmbơhbơr tĕ mơ làng bol mê dê mơ đơs mơ bol khai lah: ‘Dilah Añ cèng đào tus hơđang dô nơm lơgar, mơ làng bol lơgar hơ̆ sac rwah dô nă cau tòm bol khai nàng lơh gơs cau drơng mang kơp gàr,

³mơ dilah cau kơp gàr gŏ đào tus hơđang lơgar gen khai uh kơlwòk nàng yal tơnggit lài làng bol in,

⁴gen dilah cau lơi kơno ntas kơlwòk mơ ò bài dòp bơta tơnggit lài, mơ tŭ đào tus tơnchơt khai, gen mhàm bol khai rơp gơtuh hơđang bồ bol khai dê.

⁵Tài bơh bol khai neh kơno ntas kơlwòk mơ ò bài dòp bơta tơnggit lài, behơ̆ mhàm bol khai dê rơp tuh hơđang bol khai. Dilah bol khai dòp bơta yal tơnggit lài gen bol khai neh dong klàs bơta kis să tòm bol khai dê.

⁶Mơya dilah cau drơng kơp gàr gŏ đào tus mơ ò uh kơlwòk nàng yal tơnggit lài làng bol in, mơ đào tus tơnroh bơta kis dô êt nă cau tòm bol khai, gen ală cau hơ̆ rơp kong chơt tài bơh tồi glài bol khai dê; mơya Añ rơp lùp mhàm bol khai tòm tê cau drơng kơp gàr.’

⁷Behơ̆ mê, ơ kòn mơnus, Añ neh bơtào mê lơh gơs cau drơng kơp gàr hìu Israel in; behơ̆ tòm tŭ mê kơno dô jơnau bơh di bơr Añ jê, mê rơp yal tơnggit lài bol khai in jơnau Añ jê.

⁸Dilah Añ đơs mơ cau iơh bơsak lah: ‘Ơ cau iơh bơsak, ngan mê rơp chơt!’ Mơ mê ò đơs nàng kơryan cau iơh bơsak pleh bơh ală gùng dà bol khai dê, gen cau iơh bơsak hơ̆ rơp chơt bơh tồi glài bol khai dê, mơya mhàm bol khai Añ rơp lùp di tê mê dê.

⁹Mơya dilah mê neh yal tơnggit lài cau iơh bơsak in nàng khai pleh bơh ală gùng dà bol khai dê, mơya bol khai ò pleh bơh gùng dà bol khai dê, gen cau iơh bơsak rơp chơt bơh tồi glài bol khai dê, ai mê rơp geh dong klàs bơta kis mê dê.”

¹⁰“Tŭ do, mê, ơ kòn mơnus, đơs tĕ mơ hìu Israel lah: ‘Bol mê đơs tĕ be do: Ală bơta lơh tìs mơ tồi glài bol hi dê klơn kơnjơ̆ hơđang bol hi, mơ bol hi siar roh tài bơh bol gơ. Behơ̆ gen mbe bol hi rgơi kis taih?’

¹¹Đơs tĕ mơ bol khai lah: ‘Jehôwa Yàng Tom Trồ đơs lah: Ngan be Añ kis sùm, Añ ò niam nùs tòm bơta chơt cau iơh bơsak dê, mơya Añ niam nùs gŏ bol khai pơrlac sang ală gùng dà bol khai dê mơ kis. Pơrlac sang tĕ! Pơrlac sang ală gùng dà iơh bơsak bol mê dê! Ñchi bơh tài bol mê kòñ chơt, ơ hìu Israel?’

¹²Mơ mê, ơ kòn mơnus, đơs tĕ mơ làng bol mê dê lah: Bơta song ring cau song ring dê rơp ò dong klàs khai tòm tŭ khai tìs glài, mơ bơta iơh bơsak cau iơh bơsak dê rơp ò lơh khai in gơtup pừ tòm tŭ khai pơrlac sang bơta iơh bol khai dê. Mơ cau song ring rơp ò geh kis kơnòm bơta song ring bol khai dê tòm tŭ bol khai tìs glài.

¹³Bulah Añ đơs mơ cau song ring lah di ngan bol khai rơp kis, mơya dilah bol khai kơnòm di bơta song ring bol khai dê mơ tìs glài, gen ò gơs dô bơta song ring lơi bol khai dê geh kah wơl; mơya bol khai rơp chơt bơh bơta tồi glài mơ bol khai neh tìs.

¹⁴Bulah Añ đơs mơ cau iơh bơsak lah: ‘Ngan, mê rơp chơt!’ Mơya dilah bol khai pơrlac sang tồi glài khai dê mơ lơh wil tơl bơta boh lam mơ bơta di;

¹⁵dilah bol khai tơm wơl phan cau ai bồ nàng càn jền khai dê, tơm wơl phan bol khai neh ntung kơñau, cơnđòa lòt jat ală bơta sồr lam bơta kis dê, mơ ò lơh bơta iơh bơsak, ngan bol khai rơp ò chơt mơya kis.

¹⁶Ò gơs dô nơm glài lơi bol khai neh tìs rơp gơkòl kah wơl tòmdră mơ bol khai; khai neh lơh bơta song ring mơ song ngan, ngan la bol khai rơp kis.

¹⁷Mơya làng bol mê dê đơs lah: ‘Gùng dà Yàng dê ò song ring.’ Mơya hơ̆ la gùng dà bol khai dê ò song ring!

¹⁸Tòm tŭ cau song ring pơrlac sang bơta song ring bol khai dê mơ lơh bơta iơh bơsak, gen bol khai rơp chơt bơh gơ.

¹⁹Mơ tòm tŭ cau iơh bơsak pơrlac sang bơta iơh bơsak bol khai dê mơ lơh wil tơl bơta boh lam mơ bơta song ring, bol khai rơp kis bơh neh lơh broă hơ̆.

²⁰Mơya bol mê đơs lah: ‘Gùng dà Yàng dê ò song!’ Ơ hìu Israel! Añ rơp cahrña ală bol mê jat ală gùng dà bol mê dê.”

²¹Nam dơ̆ jơt bàr tơnơ̆ mơ tŭ bol hi neh kong kup cèng pơrdô, ngai pram kơnhai jơt, dô nă cau neh dô klàs bơh di Jerusalem tus đơs mơ añ lah: “Ƀòn dờng neh tơrlah rau!”

²²Mơ tai, tòm mho ngai lài mơ tŭ cau dô klàs hơ̆ òhềt tus, gơs tê Yàng Jehôwa dê ơm hơđang añ; mơ Kơnràñ neh pò bơr añ di di tŭ cau dô klàs hơ̆ tus mơ añ tòm àng drim. Behơ̆ bơr añ neh geh pò, mơ añ ò gam kloat tai.

²³Gen gơs jơnau Yàng Jehôwa đơs mơ añ lah:

²⁴“Ơ kòn mơnus, ală cau ơm tòm tiah srau gòi tòm lơgar Israel dê gam đơs lah: ‘Abraham gơs mìng dô nă lơm mơya khai neh dòp geh lơgar lơh gơs sre brê. Mơya bol he gơs oă cau, gen di ngan la lơgar neh geh ai bol he in lơh gơs sre brê.’

²⁵Gen tàng, đơs tĕ mơ bol khai lah: ‘Jehôwa Yàng Tom Trồ đơs be do: Tài bơh bol mê sa poac gam mhàm, tơnggòr sền ală rùp ràk bol mê dê, mơ lơh gơtuh mhàm; gen bol mê rơp dòp geh lơgar ơ?

²⁶Bol mê kơnòm di đào bol mê dê, bol mê lơh ală bơta ƀơ̆ iơh, mơ kòp nă tòm bol mê lơh ƀơ̆ ƀơl bau ùr cau gơp ƀòn he dê; behơ̆ gen bol mê rơp dòp geh lơgar sơl ơ?’

²⁷Đơs tĕ bơta do mơ bol khai lah: Jehôwa Yàng Tom Trồ đơs be do: ‘Ngan be Añ kis, ală cau gam ơm tòm tiah sang lòi ngềt ngơt rơp gơpừ bơh đào, mơ ală cau ơm tòm ƀlàng gen Añ rơp jào phan brê in kap crè; mơ ai ală cau ơm tòm ală theng kơ̆ cê mơ tòm ală rgồng lŭ gen rơp chơt pluh.

²⁸Añ rơp lơh lơgar in gơlik tiah srau gòi, bơta pràn kơldang mơ bol khai jòng să rơp roh thit, mơ ală mơnơm Israel dê rơp gơlik gơs ngềt ngơt tian gơs ò gơs dô nă cau lơi lòt gan tềng hơ̆ tai.

²⁹Gen bol khai rơp git Añ la Yàng Jehôwa, tòm tŭ Añ neh lơh lơgar do gơlik tiah sang lòi srau gòi tài bơh jơh ală bơta iơh rmơh mơ bol khai neh lơh.’

³⁰Ai mê, ơ kòn mơnus, làng bol mê dê tòmbơhbơr bơh mê rò gah ală dơrñang ƀòn mơ di ală mpồng hìu ơm, cau do đơs mơ cau ne lah: ‘Tus tĕ nàng iat jơnau bơto yal tus bơh Yàng Jehôwa.’

³¹Bol khai tus mơ mê jat be bol khai òs tus; bol khai nggui di đap mê mơ iat ală jơnau mê dê, mơya bol khai ò bài lơh jat ală jơnau hơ̆. Bơr bol khai yal tơlik bơta dòn duh, mơ nùs bol khai ya hàm hà cồng nha ò song ring.

³²Ngan, bol khai mìng sền rmê kung be dô nă cau jak đơs chò bơkah tồr gơs ală jơnau kòñ gơboh, mơ kung be dô nă cau jak pĕ kơñi, bơh bol khai kơno ală jơnau mê dê mơya ò lơh jat ală jơnau hơ̆.

³³Tòm tŭ jơh ală bơta hơ̆ gơlik gơs, mơ nền cê ngan la gơ rơp gơlik gơs, gen bol khai rơp git la neh gơs dô nă cau gơnoar hwơr ơm digùl bol khai.”