Read koho Ejekiel 37 Bible Online

Ejekiel 37 - koho bible

Ejekiel 37

¹Tê Yàng Jehôwa dê ơm hơđang añ, mơ Hwềng Yàng Jehôwa dê cèng añ lik, mơ ơn añ digùl dô nơm thòng gơs bềng ală ntìng.

²Kơnràñ lam añ lòt gùt dar ală ntìng hơ̆; gơs oă ngan ntìng tòm thòng hơ̆, mơ ală ntìng hơ̆ neh ro ngan.

³Kơnràñ lùp añ lah: “Ơ kòn mơnus, ală ntìng do rgơi kis sơl?” Añ đơs lah: “Ơ Jehôwa Yàng Tom Trồ, Kơnràñ git.”

⁴Gen Kơnràñ đơs mơ añ lah: “Đơs hwơr tĕ mơ ală ntìng do mơ đơs mơ bol gơ lah: ‘Ơ ală ntìng ro, iat tĕ jơnau Yàng Jehôwa dê.’

⁵Jehôwa Yàng Tom Trồ đơs mơ ală ntìng do lah: ‘Añ rơp ai nhơm tă mut tòm bol mê, mơ bol mê rơp kis.

⁶Añ rơp ơn ară tòm bol mê, mơ lơh gơs poac tus hơđang bol mê mơ gòm bol mê mơ gơltau. Añ rơp ơn nhơm tă tòm bol mê, mơ bol mê rơp kis. Gen bol mê rơp git Añ la Yàng Jehôwa.’”

⁷Behơ̆ añ đơs hwơr jat be añ neh geh sồr; mơ tòm tŭ añ đơs hwơr, gen nisơna gơs ntas nggồr, mơ ală ntìng gơ pơjum bal, ntìng do gơtòmcrap mơ ntìng ne.

⁸Añ rmê sền mơ gŏ ală ară mơ poac gơlik gơs hơđang ală ntìng hơ̆, mơ gơs gơltau gòm bol gơ, mơya ò gơs nhơm tă tòm bol gơ.

⁹Gen Kơnràñ đơs mơ añ lah: “Ơ kòn mơnus, đơs hwơr tĕ mơ nhơm tă; đơs hwơr tĕ mơ gơ lah: Jehôwa Yàng Tom Trồ đơs be do: Ơ nhơm tă, tus tĕ bơh poan đah càl, mơ khồm hơđang ală cau kong tơnchơt do tồ bol khai in geh kis.”

¹⁰Behơ̆ añ đơs hwơr jat be Kơnràñ neh sồr añ, mơ nhơm tă mut tòm bol khai; bol khai geh kis, ntào hơđang jơng bol khai dê, lơh gơs dô mpồl cau dờng ngan.

¹¹Gen Kơnràñ đơs mơ añ lah: “Ơ kòn mơnus, ală ntìng do la jơh dô nơm hìu Israel. Bol khai đơs lah: ‘Ntìng bol hi dê neh ro rañ, bơta gơn kơnòm bol hi dê neh roh, bol hi neh kong tơnroh jơh!’

¹²Behơ̆, đơs hwơr tĕ mơ đơs mơ bol khai lah: ‘Jehôwa Yàng Tom Trồ đơs lah: Ơ làng bol Añ jê, Añ rơp pò ală bơtô ƀồc bol mê dê, mơ cèng tơngguh bol mê bơh di tiah hơ̆; Añ rơp cèng bol mê rê wơl tòm lơgar Israel.

¹³Gen bol mê rơp git Añ la Yàng Jehôwa, tòm tŭ Añ neh pò ală bơtô ƀồc bol mê dê mơ cèng tơngguh bol mê bơh di ală bơtô ƀồc bol mê dê, ơ làng bol Añ jê.

¹⁴Añ rơp ơn Hwềng Añ tòm bol mê mơ bol mê rơp kis. Añ rơp ơn bol mê tòm ù tòm bol mê dê. Gen bol mê rơp git Añ la Yàng Jehôwa neh đơs mơ rơp lơh, Yàng Jehôwa đơs behơ̆.’”

¹⁵Gơs jơnau Yàng Jehôwa đơs mơ añ lah:

¹⁶“Ơ kòn mơnus, ai tĕ dô nơm gai mơ cih hơđang gơ lah: ‘Bơh Juda mơ Israel gơtòmklac mơ gơ.’ Gen ai tĕ dô nơm gai ndai mơ cih hơđang gơ lah: ‘Bơh Jôsep, gai Epraim mơ jơh hìu Israel ring lơngai mơ gơ.’

¹⁷Crap tĕ bal bàr nơm gai hơ̆ lơh gơs dô bă bal nàng gơlik gơs dô nơm gai tòm tê mê.

¹⁸Tòm tŭ làng bol mê dê lùp mê lah: ‘Ồng ò yal tơlik bol hi in jơnau gơtha ală bơta do ơ?’

¹⁹Đơs tĕ mơ bol khai lah: Jehôwa Yàng Tom Trồ đơs be do: ‘Añ rơp tă gai Jôsep dê bơh di tê Epraim mơ bơh di ală jơi bơtiàn Israel gơs dô bă bal mơ gơ, mơ Añ rơp ơn gai Juda hơđang gơ, mơ lơh gơlik gơs mìng dô nơm gai lơm, nàng bol khai rơp gơlik gơs dô nơm gai tòm tê Añ.’

²⁰Yơr tĕ di đap mat bol khai ală gai mê neh cih hơđang,

²¹mơ đơs mơ bol khai lah: Jehôwa Yàng Tom Trồ đơs be do: ‘Añ rơp tă tơlik kòn sau Israel bơh digùl ală lơgar mơ bol khai neh lòt tus. Añ rơp pơjum tơrgòm bol khai bơh di jơh ală tiah gùt dar, mơ cèng bol khai rê wơl tòm lơgar tòm bol khai dê.

²²Añ rơp lơh bol khai in gơlik gơs mìng dô làng bol tòm lơgar, hơđang ală mơnơm Israel dê; dô nă bơtau rơp la bơtau hơđang jơh tơl nă bol khai. Bol khai rơp ò tŭ lơi gơs bàr nơm làng bol tai hala gơkòl cah is tòm bàr nơm lơgar.

²³Bol khai rơp ò tŭ lơi lơh ƀơ̆ ƀơl is să tòm bol khai dê bơh ală rùp ràk mơ bơta lơi lơh bol khai in gơlik ngkòr ngkàc, hala bơh dô nơm tồi glài lơi bol khai dê, bơh Añ rơp dong tă bol khai klàs bơh di jơh ală bơta bol khai neh tìs glài, mơ Añ rơp lơh goh bol khai. Bol khai rơp lơh gơs làng bol Añ jê mơ Añ rơp lơh gơs Yàng Tom Trồ bol khai dê.

²⁴Cau duh broă Añ jê la Dabit rơp lơh gơs bơtau at bồ hơđang bol khai mơ jơh tơl nă bol khai rơp gơs mìng dô nă cau ê lơm. Bol khai rơp cơnđòa lòt jat ală bơta boh lam Añ jê mơ kơrhia prap gàr ală bơta sồr lam Añ jê.

²⁵Bol khai rơp ơm tòm lơgar mơ Añ neh ai cau duh broă Añ jê la Jakôp, la lơgar mơ ồng pàng bol mê neh ơm. Bol khai, kòn sau bol khai, mơ kòn sau kòn sau bol khai dê rơp ơm tềng hơ̆ jơl sùm sùm; cau duh broă Añ jê la Dabit rơp gơs bơtau bol khai dê jơl sùm sùm.

²⁶Añ rơp bơt bơtào dô bơta ho bal ring lơngai mơ bol khai; hơ̆ rơp la dô bơta ho bal gam sùm sùm. Añ rơp ai lơngai bol khai in mơ lơh khà làng bol bol khai dê gơbơtơl oă ngan. Añ rơp ơn hìu duh khoai Añ jê digùl bol khai gam sùm sùm.

²⁷Tiah ơm sùm Añ jê rơp gơs digùl bol khai; Añ rơp gơs Yàng Tom Trồ bol khai dê, bol khai rơp gơs làng bol Añ jê.

²⁸Gen ală làng bol rơp git Añ la Yàng Jehôwa neh lơh làng bol Israel in gơlik gơs sàng goh, tòm tŭ hìu duh khoai Añ jê rơp ơm digùl bol khai gam sùm sùm.’”