Read koho Ejekiel 38 Bible Online

Ejekiel 38 - koho bible

Ejekiel 38

¹Gơs jơnau Yàng Jehôwa đơs mơ añ lah:

²“Ơ kòn mơnus, wèt tĕ mat mê tòmdră mơ Gok ơm tòm lơgar Magok, la bơtau Rôs, Mesek mơ Tubal dê, mơ đơs hwơr tĕ tòmdră mơ khai

³mơ đơs lah: Jehôwa Yàng Tom Trồ đơs be do: ‘Ơ Gok bơtau dờng Mesek mơ Tubal dê, Añ tòmdră mơ mê

⁴Añ rơp pơrlac mê gùt dar, mơ ơn ală gai kơlnĕ lòs tòm kàng mê, mơ rơp lam mê lik bal mơ jơh mpồl ling mê dê, hơ̆ la ală ơseh bal mơ cau hào ơseh gơs tơl jơh ală phan ngui tòmlơh, bal mơ dô mpồl ling gal ngan at ală khèl dờng khèl dềt, jơh tơl nă bol khai hu hi đào bol khai dê.

⁵Persia, Kus, mơ Put rơp ơm bal mơ bol khai, jơh tơl nă gơs khèl mơ sơgơn lòs.

⁶Gômer bal mơ jơh ală mpồl ling khai dê, Bet Tôgama ơm ngài đah đang bal mơ jơh ală mpồl ling khai dê, hơ̆ la oă làng bol bal mơ mê.

⁷Rcang sir tĕ; rcang lài tĕ, mê bal mơ jơh ală mpồl pơjum gùt dar mê, mê at bồ tĕ bol khai.

⁸Tơnơ̆ mơ oă ngai, mê rơp geh hòi mut tòm mpồl ling. Tòm ală nam rơp tus mê rơp tòmpìt ai dô nơm lơgar pa geh bơt bơtào wơl tơnơ̆ mơ bơta tòmlơh, làng bol gơ dê neh geh pơjum tơrgòm bơh digùl oă làng bol tus hơđang ală mơnơm Israel dê, la tiah neh jŏ rau sang lòi ngềt ngơt. Bol khai neh geh cèng lik bơh di ală làng bol, mơ tŭ do jơh tơl nă bol khai ơm lơngap lơngai.

⁹Mê mơ jơh ală mpồl ling mê dê, mơ mpồl oă làng bol bal mơ mê rơp guh mơ lòt hơđap kung be càl rbut; mê rơp kung be dô puk mhwal jơm gòm jơh lơgar.’”

¹⁰Jehôwa Yàng Tom Trồ đơs be do: “Tòm ngai hơ̆, gơs ală bơta kơlôi sơnơng tus tòm dơngoh mê, mơ mê rơp bơtào lơh nền dô nơm kai gơrmơ̆i iơh rmơh.

¹¹Mê rơp đơs lah: ‘Añ rơp guh tòmdră mơ lơgar ală ƀòn ò gơs dơrñang; añ rơp brồ lơh dô nơm làng bol ơm ring lơngai, jơh tơl nă bol khai ơm tòm ală tiah ò gơs dơrñang, ò gơs mpồng mơ gai kal mpồng.

¹²Añ rơp tòmpìt ai ală phan tòmpìt geh, tòmdră mơ ală tiah srau gòi mơ tŭ do gơs làng bol ơm, mơ jơh ală cau pơjum tơrgòm wơl bơh di ală làng bol, bol khai jòi jat ală phan poan jơng mơ phan mơna, mơ bol khai ơm digùl plai ù.’

¹³Seba mơ Dedan mơ ală cau kă bro Tarsi dê bal mơ jơh ală ƀòn dềt bol khai dê, rơp đơs mơ mê lah: ‘Mê neh tus nàng phà kup sơl ơ? Mê neh pơjum mpồl ling mê dê nàng tòmpìt, nàng tă cèng priă mơ màh, nàng kơñau ală phan poan jơng mơ phan mơna, mơ ai oă phan phà kup sơl ơ?’

¹⁴Behơ̆ gen, ơ kòn mơnus, đơs hwơr tĕ mơ đơs mơ Gok lah: Jehôwa Yàng Tom Trồ đơs be do: ‘Tòm ngai hơ̆, tòm tŭ làng bol Israel Añ jê ơm lơngap lơngai, mê ò git sơl ơ?

¹⁵Mê rơp tus bơh di tiah mê dê ơm ngài đah đang, mê bal mơ oă làng bol ơm mơ mê, jơh tơl nă bol khai hào ơseh, dô mpồl bol oă, dô mpồl ling pràn ngan.

¹⁶Mê rơp lòt tus tòmdră mơ làng bol Israel Añ jê, kung be dô puk mhwal jơm gòm lơgar. Tòm ală ngai rơp tus, Ơ Gok, Añ rơp cèng mê tus tòmdră mơ lơgar Añ jê, tồ ală làng bol rgơi git Añ tòm tŭ Añ ràng tơlik să tòm Añ sàng goh bơh mê di đap mat bol khai.’”

¹⁷“Jehôwa Yàng Tom Trồ đơs be do: ‘Mê ò di la cau mơ Añ neh đơs tòm ală ngai lài òr kơnòm di cau duh broă Añ jê la ală cau gơnoar hwơr Israel dê, la ală cau tòm tŭ hơ̆ neh đơs hwơr tòm jŏ nam lah Añ rơp cèng mê tus tòmdră mơ bol khai ơ?

¹⁸Tòm ngai hơ̆, tòm tŭ Gok brồ lơh lơgar Israel gen bơta gơjrañ dờng Añ jê rơp gơhào khuh.’ Jehôwa Yàng Tom Trồ đơs behơ̆.

¹⁹‘Tòm bơta ƀoah gơjrañ mơ bơta gơjrañ dờng duh hơng Añ jê, Añ yal loh lah: tòm ngai hơ̆ rơp gơs lơnggơr ù dờng ngan tòm lơgar Israel.

²⁰Ală ka tòm dàlềng, ală sềm hơđang trồ, ală jơi phan poan jơng tòm ƀlàng, jơh ală kòn mơnus ơm hơđang plai ù rơp rơm să tòm tŭ Añ tơlik să. Ală mơnơm rơp kòl sơrbì, ală pơnai lŭ dờng rơp bơcah lề, mơ jơh ală dơrñang rơp tơrlah jơh.’

²¹Jehôwa Yàng Tom Trồ đơs lah: ‘Añ rơp hòi đào tus tòmdră mơ Gok hơđang jơh ală mơnơm Añ jê. Kòp nă rơp tơrwơl đào tòmdră mơ oh mi he.

²²Añ rơp ngui bơta kòp jê pluh plàng mơ bơta gơhòr mhàm nàng cahrña tòmdră mơ khai; Añ rơp dùh mìu dờng, mìu piar, mơ ồs siau sa roh hơđang khai, hơđang ală mpồl ling khai dê, mơ hơđang ală làng bol lòt bal mơ khai.

²³Behơ̆, Añ rơp ràng tơlik bơta dờng ngan mơ bơta sàng goh Añ jê, mơ Añ rơp tơnggit să tòm Añ di đap mat oă lơgar. Gen bol khai rơp git Añ la Yàng Jehôwa.’”