Read koho Ejekiel 39 Bible Online

Ejekiel 39 - koho bible

Ejekiel 39

¹“Ơ kòn mơnus, đơs hwơr tĕ tòmdră mơ Gok mơ đơs lah: Jehôwa Yàng Tom Trồ đơs be do: ‘Ơ Gok, bơtau Rôs, Mesek mơ Tubal dê, Añ tòmdră mơ mê.

²Añ rơp pơrlac mê gùt dar mơ hwài mê lòt, Añ rơp cèng mê tus bơh di tiah ngài ngan đah đang, mơ sồr mê tòmdră mơ ală mơnơm Israel dê.

³Gen Añ rơp tă tơlik àtak bơh di tê kiau mê, mơ tơndùh ală kam bơh di tê ma mê dê.

⁴Mê rơp gơpừ hơđang ală mơnơm Israel dê, mê bal mơ jơh ală mpồl ling mê dê, mơ jơh ală làng bol lòt jat mê tai sơl. Añ rơp phi mê lơh gơs phan sa jơh ală jơi sềm sa poac mơ jơi phan poan jơng tòm brê.

⁵Mê rơp gơpừ tòm ƀlàng sre be Añ neh đơs,’ Jehôwa Yàng Tom Trồ đơs behơ̆.

⁶‘Añ rơp tơndùh ồs hơđang Magok, mơ hơđang ală cau ơm lơngap lơngai di gah dàlềng; mơ bol khai rơp git Añ la Yàng Jehôwa.

⁷Sơnđan sàng goh Añ jê rơp geh tơnggit digùl làng bol Israel Añ jê, mơ Añ rơp ò lòi sơnđan sàng goh Añ jê gơkòl cau sền òsơp tai, mơ ală lơgar rơp git Añ la Yàng Jehôwa, Bơtau Sàng Goh tòm Israel.

⁸Gơ neh tus rau! Gơ neh gơlik gơs rau, Jehôwa Yàng Tom Trồ đơs behơ̆. Ngai do la ngai mơ Añ neh đơs bơh bơta hơ̆.

⁹Gen ală cau ơm tòm ală ƀòn dờng Israel dê rơp lik lòt mơ ai ală phan tòmlơh sing ồs mơ chu pơrguc gơ, ală khèl dờng mơ khèl dềt, ală àtak mơ ală kam, ală gai lồng mơ ală tà. Bol khai ai ală phan hơ̆ sing ồs tòm poh nam.

¹⁰Bol khai rơp ò càng jòi lòng tòm ƀlàng hala koh lòng tòm brê, tài bơh bol khai ngui phan tòmlơh nàng sing ồs; bol khai rơp phà sơmbrơt ală cau neh phà sơmbrơt bol khai, mơ tòmpìt ai ală cau neh tòmpìt ai bơh di bol khai, Jehôwa Yàng Tom Trồ đơs behơ̆.’”

¹¹“‘Tòm ngai hơ̆, Añ rơp ai Gok in dô bă tiah tơp ƀồc tòm Israel, tòm thòng ală cau lòt gùng hơ đah mattơngai lik tus hơ dàlềng. Tiah tơp ƀồc hơ̆ rơp kơryan ală cau lòt gùng tài bơh Gok mơ jơh ală mpồl làng bol khai dê rơp tơp tềng hơ̆. Behơ̆ gơ rơp geh sơnđan la Thòng Hamon Gok dê

¹²Tòm poh kơnhai, hìu Israel rơp tơp ƀồc bol khai tồ lơh sàng goh tòm lơgar.

¹³Jơh làng bol tòm lơgar rơp tơp ƀồc bol khai; mơ gơ rơp cèng bol khai in bơta màng ryŭ tòm ngai mơ Añ ràng tơlik bơta gơklŏ Añ jê, Jehôwa Yàng Tom Trồ đơs behơ̆.

¹⁴Bol khai rơp ơn is ală cau klau nàng lòt gan sùm hơđang ù mơ nàng tơp ală cau sò tơm gam wơl hơđang ù, tồ lơh goh gơ in; tòm poh kơnhai, bol khai rơp lơh broă sơwì sền bol khai dê.

¹⁵Tòm tŭ ală cau jòi sền lòt làm lơgar, cau lơi gŏ dô nơm ntìng cau pal ơn dô nơm tềl tềng hơ̆, jơl tus di tŭ ală cau tơp ƀồc neh tơp gơtòm thòng Hamon Gok dê.

¹⁶(Tềng hơ̆ kung gơs dô nơm ƀòn dờng sơnđan la Hamonah sơl). Bol khai rơp lơh goh ù tiah la behơ̆.’

¹⁷Ai mê, ơ kòn mơnus, Jehôwa Yàng Tom Trồ đơs be do: ‘Đơs tĕ mơ jơh ală jơi sềm mơ jơh ală jơi phan poan jơng tòm brê lah: Pơjum tơrgòm bal tĕ mơ tus bơh jơh ală đah gùt dar, tus hơ phan ơn mơ Añ rcang yò sa bol mê in, hơ̆ la dô nơm phan ơn yò sa dờng hơđang ală mơnơm Israel dê. Tềng hơ̆ bol mê rơp sa poac mơ hùc mhàm.

¹⁸Bol mê rơp sa poac ală cau pràn kơldang dê, hùc mhàm ală cau kwang bơtau tòm plai ù kung be bol khai la ală belàt dam mơ belàt kòn, be dam mơ kơnrồ dam, jơh ală la phan poan jơng lơmă Basan dê.

¹⁹Bol mê rơp sa dơngi jơl tus di tŭ bol mê hòm lai mơ hùc mhàm jơl tus di tŭ bol mê bơñul, tòm bơta yò sa phan pơdơng mơ añ neh rcang bol mê in.

²⁰Mơ di cơnòng sa Añ jê bol mê rơp sa hòm bơh ală ơseh mơ ală cau hào ơseh, tơl ală sèng cau ling tòmlơh mơ ală sèng cau ling,’ Jehôwa Yàng Tom Trồ đơs behơ̆.”

²¹“Añ rơp ràng tơlik bơta gơklŏ Añ jê digùl ală lơgar; mơ jơh ală lơgar rơp gŏ bơta cahrña Añ neh lơh gơlik gơs, mơ tê Añ jê neh ơn hơđang bol khai.

²²Hìu Israel rơp git Añ la Jehôwa Yàng Tom Trồ bol khai dê, bơh ngai hơ̆ tus di ală ngai rơp tus.

²³Mơ ală làng bol rơp git la hìu Israel neh kong kup cèng pơrdô la tài bơh tồi glài bol khai dê, tài bơh khai ò dòn song mơ Añ. Behơ̆ Añ pồn mat Añ bơh di bol khai, mơ Añ neh jào bol khai tòm tê ală cau sò tơm bol khai dê, mơ jơh tơl nă bol khai neh gơpừ bơh đào.

²⁴Añ neh lơh gơwèt mơ bol khai jat be bơta ƀơ̆ ƀơl mơ tồi glài bol khai dê, mơ Añ neh pồn ndơp mat Añ bơh di bol khai.”

²⁵Gen tàng, Jehôwa Yàng Tom Trồ đơs be do: “Tŭ do Añ rơp cèng Jakôp rê wơl bơh di tiah kong kup cèng pơrdô; Añ rơp nđàc sơngit di jơh hìu Israel, mơ Añ rơp ƀoah pơrhiat bơh sơnđan sàng goh Añ jê.

²⁶Bol khai rơp hŭi bơta ƀàssìl ƀàsso bol khai dê mơ jơh ală bơta ò dòn song mơ bol khai neh gơwèt mơ Añ tòm tŭ bol khai ơm lơngap lơngai tòm lơgar bol khai dê, ò gơs cau lơi lơh bol khai in rngòt rngơt.

²⁷Tòm tŭ Añ neh cèng bol khai rê wơl bơh digùl ală làng bol mơ neh pơjum tơrgòm bol khai bơh di ală lơgar ală cau sò tơm bol khai dê, mơ bơh di bol khai Añ neh ràng tơlik bơta sàng goh Añ jê di đap oă lơgar.

²⁸Gen bol khai rơp git Añ la Jehôwa Yàng Tom Trồ bol khai dê, tài bơh Añ neh cèng pơrdô bol khai tơmut digùl ală lơgar, mơ Añ rơp pơjum tơrgòm bol khai tòm lơgar tòm bol khai dê. Añ rơp ò sang lòi dô nă cau lơi tòm bol khai bơh ngkòi.

²⁹Añ rơp ò tŭ lơi pồn mat Añ tai bơh di bol khai, tòm tŭ Añ rơp tuh Hwềng Añ hơđang hìu Israel, Jehôwa Yàng Tom Trồ đơs behơ̆.”