Read koho Ejekiel 42 Bible Online

Ejekiel 42 - koho bible

Ejekiel 42

¹Gen cau hơ̆ lam añ hơ đah ƀlàng bơdìh đah đang dê mơ cèng añ tus hơ ală ơdŭ tòm toh di ƀlàng hìu duh khoai dê mơ tòm toh di đap hìu bơt đah đang dê.

²Hìu gơs mpồng wèt hơ đah đang jòng ròt pram jơt met mơ ơnàng bàr jơt pram met.

³Tòmtìp mơ pơnah jơt met gơrê bal mơ ƀlàng dơlam mơ dô pơnah tòm toh di đap mơnàng geh lă mơ lŭ gơrê mơ ƀlàng bơdìh dê, la ƀlàng jơng hìu gơs pe tap.

⁴Di đap ală ơdŭ gơs dô nơm gùng lòt ơnàng pram met, mơ đah dơlam gơs dô nơm gùng ơnàng nggùl met, ală mpồng gơwèt hơ đah đang.

⁵Ală ơdŭ hơđang gen wềt rlau mơ ală ơdŭ hơđơm mơ ală ơdŭ digùl, tài bơh ală ƀlàng jơng hìu neh geh oă tiah rlau.

⁶Ală ơdŭ tòm tap pe ò gơs jrong be tòm ƀlàng jơng gùng gơs, gen tàng ală ơdŭ hơđang mơ ală ơdŭ digùl pal tơmut tòm dơlam mơ hat rlau mơ ală ơdŭ di tap hơđơm.

⁷Gơs dô nơm dơrñang bơdìh rò gah ală ơdŭ mơ ƀlàng bơdìh, gơ lòt di đap ală ơdŭ was bàr jơt pram met.

⁸Đah jòng ală ơdŭ di gah ƀlàng bơdìh jòng ròt la bàr jơt pram met, ai ală ơdŭ tòm toh di đap hìu duh khoai gen jòng pram jơt met.

⁹Hơđơm ală ơdŭ hơ̆, đah mattơngai lik gơs dô nơm mpồng nàng cau in mut bơh di ƀlàng bơdìh.

¹⁰Kung gơs ală ơdŭ rò gah đah jòng ròt dơrñang ƀlàng bơdìh đah mattơngai lik, di ƀlàng mơ tòm toh mơ hìu duh khoai.

¹¹Gơs dô nơm gùng đah hơđap ală ơdŭ hơ̆ kung be đah hơđap ală ơdŭ wèt hơ đah đang; jơh ală ơdŭ hơ̆ gơs đah jòng mơ đah ơnàng ndròm bal, ală gùng mut mơ gùng lik gơs rnoas gơ ndròm bal.

¹²Ală mpồng ơdŭ đah đơm kung ndròm bal behơ̆ sơl. Di bơr gùng gơs dô nơm mpồng nàng cau in mut, tòm toh mơ dơrñang đah mattơngai lik.

¹³Gen cau hơ̆ đơs mơ añ; “Ală ơdŭ đah đang mơ đah đơm di đap ƀlàng hìu duh khoai dê la ală ơdŭ sàng goh, la tiah ală cau gơnoar ơn phan duh khoai tus rềp hơ Yàng Jehôwa rơp sa ală phan ơn duh khoai sàng goh rlau jơh. Tềng hơ̆ bol khai rơp ơn ală phan ơn duh khoai sàng goh rlau jơh, hơ̆ la ală phan ơn duh khoai mơ kòi mbo, ală phan ơn duh khoai tơwài glài bơta gơtup tìs mơ ală phan ơn duh khoai tơwài glài, bơh tiah hơ̆ la tiah sàng goh.

¹⁴Tòm tŭ cau gơnoar ơn phan duh khoai mut tòm ală tiah sàng goh, bol khai ò geh lik bơh tềng hơ̆ nàng lòt tòm ƀlàng bơdìh; dilah bol khai òhềt hồ jơh ală ồi ào mơ bol khai neh soh tòm tŭ duh broă, bơh ală ồi ào hơ̆ la sàng goh. Bol khai pal soh ală ồi ào ndai lài mơ tŭ bol khai lòt tus rềp di ală tiah lòi làng bol in.”

¹⁵Tòm tŭ khai neh sir was ală tiah đah dơlam hìu duh khoai rau, khai lam añ lik lòt bơh mpồng dờng đah mattơngai lik mơ was tiah gùt dar tềng hơ̆.

¹⁶Khai ai gai was nàng was đah mattơngai lik, mơ was gùt dar hìu duh khoai, jòng bàr rhiang pram jơt met.

¹⁷Khai ai gai was nàng was đah đang, bàr rhiang pram jơt met.

¹⁸Khai ai gai was nàng was đah đơm, bàr rhiang pram jơt met.

¹⁹Gen khai wèt hơ đah mattơngai mut, ai gai was nàng was, bàr rhiang pram jơt met.

²⁰Behơ̆ khai was tiah hơ̆ jơh poan đah dơrñang gùt dar hìu duh khoai, đah jòng bàr rhiang pram jơt met, đah ơnàng bàr rhiang pram jơt met. Dơrñang do lòi nàng cah is tiah sàng goh mơ tiah òs.