Read koho Ejekiel 46 Bible Online

Ejekiel 46 - koho bible

Ejekiel 46

¹Jehôwa Yàng Tom Trồ đơs be do: “Mpồng tòm ƀlàng dơlam wèt hơ đah mattơngai lik pal kal wơl tòm prau ngai lơh broă, mơya tòm ngai Saƀat mơ tòm ngai Dùl Lik pal pò gơ.

²Cau bơtau pal mut bơh mpồng ƀlàng rơng đah bơdìh, mơ khai pal ơm ntào di gah jrong mpồng. Ală cau gơnoar ơn phan duh khoai pal ơn phan ơn chu pơrguc khai dê bal mơ ală phan ơn bơta ring lơngai khai dê, khai pal cùn khoai di bơr mpồng dê. Gen khai rơp lik, mơya mpồng ò til jơl tus di mho.

³Làng bol tòm lơgar rơp cùn khoai dê gùng mut mpồng di đap Yàng Jehôwa tòm ală ngai Saƀat mơ ală ngai Dùl Lik.

⁴Phan ơn chu pơrguc mơ cau bơtau cèng tus ơn Yàng Jehôwa in tòm ngai Saƀat la prau nơm belàt kòn dam mơ dô nơm be dam, jơh ală phan hơ̆ pal ò gơs tềl sồt rmàñ.

⁵Phan ơn mơ kòi mbo ơn bal mơ be dam la dô epha, mơ phan ơn mơ kòi mbo ơn bal mơ ală belàt la oă kàr lơi jat nùs khai kòñ, bal mơ dô hin mơñà ơn bal mơ kòp epha.

⁶Tòm ngai Dùl Lik, khai pal ơn dô nơm kơnrồ dam gam dềt, prau nơm belàt kòn mơ dô nơm kơnrồ dam, jơh ală phan hơ̆ pal ò gơs tềl sồt rmàñ.

⁷Khai pal rcang gơs dô epha phan ơn mơ kòi mbo nàng ơn bal mơ kơnrồ dam, dô epha bal mơ be dam, mơ ơn bal mơ ală belàt kòn oă kàr lơi jat nùs khai kòñ bal mơ dô hin mơñà tòm pơnjat bal mơ kòp epha.

⁸Tòm tŭ cau bơtau mut, khai pal mut gan di ƀlàng rơng mpồng dê, mơ khai kung pal lik bơh dô nơm gùng hơ̆ sơl.

⁹Tòm tŭ làng bol tòm lơgar tus di đap Yàng Jehôwa tòm ală ngai pơjum sa neh lơh nền, cau lơi mut bơh mpồng đah đang nàng duh khoai gen pal lik bơh mpồng đah đơm; mơ cau lơi mut bơh mpồng đah đơm gen pal lik bơh mpồng đah đang. Bañ gơs cau lơi rê wơl bơh di mpồng mơ khai neh mut, mơya kòp nă pal lik bơh mpồng đah tòm toh mat gơ dê.

¹⁰Tòm tŭ bol khai mut cau bơtau pal mut bal mơ bol khai, mơ tòm tŭ bol khai lik gen bơtau pal lik bal mơ bol khai.

¹¹Tòm ală ngai pơjum sa mơ ală ngai wèr neh lơh nền, phan ơn mơ kòi mbo rơp la dô epha ơn bal mơ dô nơm kơnrồ dam, dô epha ơn bal mơ dô nơm be dam, mơ oă kàr lơi jat nùs cau kòñ tòm pơnjat bal mơ ală belàt kòn, bal mơ dô hin mơñà bal mơ kòp epha.

¹²Tòm tŭ cau bơtau rcang gơs dô nơm phan ơn jat nùs kòñ khai dê nàng ơn Yàng Jehôwa in, bulah la phan ơn chu pơrguc hala phan ơn ring lơngai, gen mpồng wèt hơ đah mattơngai lik pal pò khai in. Khai rơp ơn phan ơn chu pơrguc khai dê hala ală phan ơn ring lơngai khai dê kung be khai ơn tòm ngai Saƀat. Gen khai rơp lik, mơ tơnơ̆ mơ tŭ khai neh lik rau gen mpồng pal til wơl.”

¹³“Kòp ngai khai pal rcang gơs dô nơm belàt kòn tơl dô nam, ò gơs tềl sồt rmàñ lơi, nàng lơh gơs phan ơn chu pơrguc Yàng Jehôwa in; kòp àng drim mê pal rcang gơs behơ̆.

¹⁴Bal mơ phan ơn hơ̆, kòp drim mê kung pal rcang gơs phan ơn mơ kòi mbo, hơ̆ la dô pơnah prau epha dê, bal mơ dô pơnah pe hin mơñà nàng tơnsùh kơmbuh phe. Bơta ơn phan ơn mơ kòi mbo Yàng Jehôwa in la dô jơnau sồr gam sùm sùm.

¹⁵Behơ̆, belàt kòn mơ phan ơn mơ kòi mbo bal mơ mơñà rơp geh rcang gơs kòp àng drim lơh gơs dô nơm phan ơn chu pơrguc jat bơta òs mòng kòp ngai dê.”

¹⁶Do la jơnau đơs Jehôwa Yàng Tom Trồ dê: “Dilah cau bơtau ai dô nă kòn klau in tòm ală kòn klau khai dê phan ai gòi bơh di phan jơtài khai dê gen gơ kung rơp gơrê bal mơ ală kòn sau khai dê; gơ kung rơp la phan tòm bol khai dòp geh bơh mè bèp.

¹⁷Bulah behơ̆, dilah khai ai dô nă cau in tòm ală cau duh broă khai dê dô nơm phan ai gòi bơh di phan jơtài khai dê, cau duh broă hơ̆ rgơi prap gàr phan hơ̆ jơl tus di nam geh khat gơboh; gen gơ rơp rê wơl hơ cau bơtau. Phan jơtài cau bơtau dê gơrê bal mơ ală kòn klau khai dê lơm; phan jơtài hơ̆ gơrê bal mơ bol khai.

¹⁸Cau bơtau ò di ai phan lơi bơh tòm phan jơtài làng bol dê, ting bơtrơh bol khai bơh di phan tòm khai dê. Cau bơtau rơp ai ală kòn klau khai in phan jơtài bol khai dê tus bơh di phan tòm khai dê, tồ ò gơs cau lơi tòm làng bol Añ jê rơp kong roh gơnoar bơh di phan tòm khai dê.”

¹⁹Gen cau hơ̆ cèng añ lòt gan gùng mut di gah gùng mpồng dờng dê tus hơ ală ơdŭ sàng goh wèt hơ đah đang, la ală ơdŭ gơrê bal mơ ală cau gơnoar ơn phan duh khoai, mơ sơnio añ in dô bă tiah lồi dut đah mattơngai mut.

²⁰Khai đơs mơ añ lah: “Do la tiah mơ ală cau gơnoar ơn phan duh khoai rơp gơm phan ơn dòp git tồi glài mơ phan ơn tơwài glài, mơ buh phan ơn mơ kòi mbo, nàng ò càng cèng tus di ƀlàng bơdìh mơ lơh làng bol in sàng goh.”

²¹Lồc behơ̆ khai cèng añ tus di ƀlàng bơdìh mơ lam añ lòt gùt dar poan mum gơ dê, mơ añ sền gŏ di kòp nơm mum gơs dô nơm ƀlàng ndai tai.

²²Di poan mum ƀlàng bơdìh gơs ală ƀlàng gơs dơrñang gùt dar, poan jơt tal jòng ròt mơ pe jơt tal ơnàng, kòp nơm ƀlàng tòm poan mum gơs dờng ơnàng ndròm bal.

²³Gùt dar đah dơlam kòp mum tòm poan nơm mum hơ̆ gơs dô nơm dơrñang liah bơt mơ lŭ, gơs tiah sing ồs bơt gùt dar hơđơm dơrñang hơ̆.

²⁴Khai đơs mơ añ lah: “Hơ̆ la ală tiah trŭ gơm phan sa mơ ală cau duh broă tòm hìu duh khoai rơp gơm ală phan ơn làng bol dê.”