Read koho Ejekiel 9 Bible Online

Ejekiel 9 - koho bible

Ejekiel 9

¹Gen añ kơno jơnau Kơnràñ driau dờng lah: “Sồr tĕ ală cau ling sền gàr ƀòn dờng tus hơ do, kòp nă pal at phan tòmlơh tòm tê khai dê.”

²Mơ gơs prau nă tus bơh mpồng dờng đah đang, kòp nă at phan tòmlơh tòm tê. Tòm bol khai gơs dô nă cau soh ào che dơmài, di ngkòi àñ ding gai cih, bol khai mut mơ ntào di gah cơnòng duh khoai mơ kòng.

³Tŭ hơ̆ bơta gơklŏ Yàng Tom Trồ Israel dê guh bơh hơđang ceruƀim la tiah gơ òs ơm mơ lòt tus di mpồng hìu duh khoai. Gen Yàng Jehôwa hòi cau soh ào bài che dơmài la cau gơs dô nơm ding ơn gai cih kơt di but,

⁴mơ đơs mơ khai lah: “Lòt làm tĕ tòm ƀòn dờng Jerusalem mơ lơh dô nơm tềl hơđang bìng liang ală cau ñìm rac mơ pơt wòl bơh ală bơta cù kìr neh lơh gơs tềng hơ̆.”

⁵Lồc behơ̆ Kơnràñ đơs mơ ală cau ne tòm tŭ añ ơm iat lah: “Lòt jat tĕ khai tòm làm jơh ƀòn dờng mơ sreh tơnchơt, mat mê rơp ò càng pơlai mơ nđàc sơngit.

⁶Sreh tơnchơt tĕ ală cau kra, cau pơnu mơ cau ơruh, cau ùr mơ cau kơnòm, mơya bañ ƀư di dô nă cau lơi neh gơs tềl di bìng liang. Rơp sơntòm tĕ bơh di tiah sàng goh añ jê.” Behơ̆ ală cau hơ̆ rơp sơntòm bơh di ală cau kra ơm di đap hìu duh khoai.

⁷Gen Kơnràñ đơs mơ bol khai lah: “Lơh ƀơ̆ ƀơl tĕ hìu duh khoai, lơh tĕ bềng lìu ƀồc chơt tòm ală rơng hìu! Lơh tĕ!” Behơ̆ bol khai lik lòt mơ rơp sơntòm bơta tơnchơt tòm ƀòn dờng.

⁸Tòm tŭ bol khai sreh tơnchơt cau mơ lòi añ ơm is dô nă, añ blup mat tòm ù mơ hòi dan lah: “Ơ hơh, Ơ Jehôwa Yàng Tom Trồ, Kơnràñ tơnroh jơh làng bol gam wơl Israel dê tòm tŭ Kơnràñ gơhào gơjrañ dờng gơwèt hơ Jerusalem ơ?”

⁹Kơnràñ đơs mơ añ lah: “Bơta tồi glài hìu Israel mơ Juda dê la dờng ngan ò git lơh; lơgar gơs bềng mhàm hòr mơ ƀòn dờng gơs bềng bơta ò song ring. Bol khai đơs lah: ‘Yàng Jehôwa neh sang lòi lơgar do; Yàng Jehôwa ò wèt sền ò.’

¹⁰Behơ̆, Añ rơp ò nđàc sơngit di bol khai hala pơlai bol khai ò; mơya Añ rơp tuh wơl hơđang bồ bol khai dê bơta bol khai neh lơh.”

¹¹Gen cau soh bài che dơmài mơ gơs ding ơn gai cih kơt di but, ai jơnau đơs wơl lah: “Añ neh lơh sir jat be jơnau Kơnràñ neh sồr.”