Read koho Daniel 1 Bible Online

Daniel 1 - koho bible

Daniel 1

¹Tòm nam dơ̆ pe rài Jehôyakim bơtau Juda dê, Nebukatnessar, bơtau Babilôn lòt tus gơrwàng Jerusalem.

²Yàng Jehôwa jào Jehôyakim bơtau Juda tòm tê Nebukatnessar bal mơ dô pơnah ală phan ngui tòm hìu duh khoai Yàng Tom Trồ dê. Bơtau Babilôn sồr cèng ală phan ngui hơ̆ tus tòm tiah Sinar, mơ prap tòm đam jàr hìu duh khoai ală yàng khai dê.

³Gen cau bơtau sồr Aspenas, la cau kwang at bồ gơlang bơtau dê, cèng ală kòn sau Israel, ală hìu nhă cau bơtau mơ jơi bơtiàn ală cau màng ryŭ dê tus,

⁴ală cau pơnu gơs să jan ò sồt rmàñ, muh mat hàng mơnĕ gơs tơl ală bơta jak chài, àng loh, git wă, chài rgơi duh broă tòm gơlang bơtau, mơ bơto bol khai in cih mơ đơs jơnau Kalde dê.

⁵Cau bơtau lơh nền pơnah phan sa phan ñô bơtau dê ai bol khai in kòp ngai. Tơnơ̆ mơ pe nam bol khai bơtê, gen rơp geh ntào duh broă tòm gơlang bơtau dê.

⁶Tòm mpồl bol khai gơs Daniel, Hanania, Misael mơ Ajaria.

⁷Cau kwang at bồ gơlang bơtau tơmoh sơnđan ndai bol khai in: Daniel khai sơnđan la Beltesassar, Hanania la Sadrak, Misael la Mesak, mơ Ajaria la Abetnegô.

⁸Mơya Daniel neh lơh nền tòm nùs ò bài lòi ală phan sa phan ñô bơkah cau bơtau dê lơh khai in gơlik ƀơ̆ ƀơl, gen khai dan mơ cau kwang at bồ tòm gơlang bơtau ai gơnoar khai in ò lơh să tòm khai gơlik ƀơ̆ ƀơl.

⁹Yàng Tom Trồ lơh cau kwang at bồ gơlang bơtau, gơs nùs kòñ gơboh mơ nđàc di Daniel.

¹⁰Cau kwang at bồ gơlang bơtau đơs mơ Daniel lah: “Añ mìng rngòt di cau bơtau la cau tòm añ jê, bơh khai neh lơh nền phan sa phan ñô bol mê in. Dilah cau bơtau gŏ muh mat bol mê rgai rgong rlau mơ ală cau pơnu dô rơh bal mơ bol mê gen cau bơtau rơp koh bồ añ.”

¹¹Gen Daniel đơs mơ cau sền gàr la cau neh geh cau kwang at bồ gơlang bơtau sồr sền gàr Daniel, Hanania, Misael, mơ Ajaria, mơ lah:

¹²“Dan ồng lòng tĕ ală cau duh broă ồng dê tòm jơt ngai, ai bol hi in sa mìng biap mơ hùc mìng dà lơm.

¹³Tơnơ̆ mơ hơ̆, ồng rơp pơndròm muh mat bol hi bal mơ muh mat ală cau pơnu ndai ñô sa phan sa cau bơtau dê, gen ồng rơp lơh nền bơh phan sa phan ñô bol hi in jat be bơta ồng neh gŏ.”

¹⁴Gen cau sền gàr dòp jơnau bol khai dan, mơ lòng bol khai tòm jơt ngai.

¹⁵Jơt ngai hơ̆ neh rlau rau, gŏ muh mat bol khai mơnĕ mơnài mơ lơmă rlau mơ jơh ală cau pơnu ndai neh ñô sa phan cau bơtau dê.

¹⁶Behơ̆, cau sền gàr tă pơnah phan sa bơtau mơ tơrnòm bơh di bol khai mơ ai bol khai in sa biap lơm.

¹⁷Yàng Tom Trồ ai poan nă cau pơnu hơ̆ gơs bơta jak chài, git wă jơh ală sră pơàr, ală bơta bơtê. Daniel kung git wă ală bơta gơtơnggŏ mơ bơta mpau tai sơl.

¹⁸Tus di tŭ bơtau lơh nền nàng cèng bol khai tus, gen cau kwang at bồ tòm gơlang bơtau lam bol khai tus di đap bơtau Nebukatnessar.

¹⁹Bơtau tòmbơhbơr mơ bol khai mơ jơh ală cau pơnu hơ̆, ò gơs cau lơi ndròm bal mơ Daniel, Hanania, Misael mơ Ajaria, behơ̆ bol khai geh duh broă di đap cau bơtau.

²⁰Mơ tai, tòm tŭ cau bơtau lùp bol khai ală sèng lùp bơh ală bơta jak chài mơ bơta git wă, gen gŏ bol khai lin jơt dơ̆ rlau mơ jơh ală cau gru mơ cau tơlhơu tòm làm lơgar cau bơtau dê.

²¹Behơ̆, Daniel kư̆ ơm tềng hơ̆ jơl tus di nam sơnròp rài bơtau Sirus dê.