Read koho Daniel 12 Bible Online

Daniel 12 - koho bible

Daniel 12

¹“Tòm tŭ tơngai hơ̆, Mikael la cau gơnrơh dờng, cau sền gàr làng bol mê dê rơp guh. Rơp gơs dô tŭ tơngai jê sồt bòl glar tian gơs bơh tŭ pa bơtào gơs ală lơgar tus di tŭ tơngai hơ̆ kung ò gơs tŭ lơi gơs behơ̆. Mơya tòm tŭ hơ̆, làng bol mê dê cau lơi geh cih sơnđan mat tòm sră gen rơp geh dong klàs.

²Oă cau bic tòm kơmbuh ù rơp guh wơl, cau ƀà nàng geh bơta kis gam sùm sùm, cau ƀà nàng kong bơta ƀàssìl gam sùm sùm.

³Ală cau jak chài rơp gơcrà kung be bơta àng ală tap trồ dê; mơ ală cau tề lam oă cau tus hơ bơta song ring rơp gơcrà be ală sơmañ gam sùm sùm ò lồi.

⁴Ai mê, Ơ Daniel, prap gàr tĕ bơta ndơp ndơr mơ tap ƀang kì ală jơnau tòm sră do jơl tus di tŭ tơngai lồi dut. Oă cau rơp lòt tềng do tềng dă mơ bơta git wă rơp gơbơtơl tai.”

⁵Gen, añ, Daniel, añ tơnggòr sền mơ gŏ bàr nă cau ndai, dô nă ntào đah do hiòng, mơ dô nă ntào đah ne hiòng.

⁶Dô nă đơs mơ cau soh bài che dơmài ơm ntào hơđang dà hiòng mơ lah: “Gam nđò jŏ tai sồng ală bơta crih crài do rơp tus di tŭ lồi dut taih?”

⁷Cau klau soh bài che dơmài ntào hơđang dà hiòng pò tê ma mơ tê kiau hơđang trồ, mơ añ kơno khai ai sơnđan Bơtau gam kis sùm sùm dê mơ srat să lah: “Rơp rlau dô tơngai, ală tơngai, mơ nggùl tơngai; tŭ lơi gơnoar pràn làng bol sàng goh dê neh gơkòl roh gơprah jơh, gen tŭ hơ̆ ală bơta do rơp geh sir wil tơl.”

⁸Añ kơno ală jơnau hơ̆ mơya añ ò git wă gen añ lùp lah: “Ơ yàng añ jê, ală bơta do rơp gơlik mbe lơi taih?”

⁹Khai ho lah: “Ơ Daniel, lơh tĕ broă tòm mê dê; tài bơh ală jơnau do neh prap lòi mơ tap ƀang kì rau jơl tus di tŭ tơngai lồi dut.

¹⁰Oă cau rơp geh lơh gơs sàng goh, geh lơh gơs wil tơl ò tềl ƀơ̆, mơ geh lòng tiar, mơya ală cau iơh rơp kư̆ lơh iơh. Ò gơs cau iơh lơi rơp git wă mơya ală cau jak chài rơp git wă.

¹¹Bơh tŭ tơngai pơndut phan ơn chu kòp ngai mơ bơtào gơs bơta ngkòr ngkàc lơh gơlik gơs bơta tơnroh gơprah gen rơp gơs dô rbô bàr rhiang sin jơt ngai.

¹²Lơngai cau lơi in kơp gơn tus di lồi dut dô rbô pe rhiang pe jơt pram ngai.

¹³Mơya mê, lòt tĕ tòm gùng mê dê jơl tus di lồi dut. Mê rơp rlô bòl, mơ tus di lồi dut ală ngai, mê rơp guh mơ dòp geh phan ƀàn mê dê.”