Read koho Daniel 3 Bible Online

Daniel 3 - koho bible

Daniel 3

¹Bơtau Nebukatnessar bơt dô nơm rùp ràk mơ màh jơnhoa prau jơt tal mơ ơnàng prau tal, mơ bơtào tòm ƀlàng Dura kơnhwàl Babilôn dê.

²Gen bơtau sồr hòi jà ală cau kwang đơng lơgar, ală cau kwang at bồ kơnhwàl lơgar, ală cau kwang at bồ ling, ală cau kwang bơyai broă, ală cau kwang at bồ đam jàr, ală cau kwang at bồ cahrña, ală cau kwang cahrña, mơ ală cau kwang ndai at bồ tòm kơnhwàl lơgar, lòt tus nàng pơjum sa chò hòp ngai lơh sir rùp ràk mơ cau bơtau neh bơtào.

³Behơ̆, ală cau kwang đơng lơgar, ală cau kwang at bồ kơnhwàl lơgar, ală cau kwang at bồ ling, ală cau kwang bơyai broă, ală cau kwang at bồ cahrña, ală cau kwang cahrña mơ jơh ală cau kwang ndai at bồ tòm kơnhwàl lơgar pơjum bal nàng sa chò hòp ngai lơh sir rùp ràk mơ bơtau Nebukatnessar neh bơtào; tòm tŭ bol khai ntào di đap rùp ràk mơ bơtau Nebukatnessar neh bơtào.

⁴Gen cau kwang at bồ bơta pơjum sa ai jơnau dờng đơs lah: “Ơ ală làng bol, ală lơgar, ală jơnau đơs, do la jơnau sồr bol mê in:

⁵Tŭ lơi bol mê kơno ntas kơlwòk, rkèl, kơwào, kơñi pĕ, kơñi rơs, kơmboat mơ ală bơta kơñi ndai, gen bol mê tơmbic să tĕ nàng duh khoai rùp ràk mơ màh mơ bơtau Nebukatnessar neh bơt bơtào.

⁶Cau lơi ò tơmbic să nàng duh khoai gen rơp kong sơrbì mo tòm gùl bơnhă ồs hơng.”

⁷Behơ̆ gen, tòm tŭ ală làng bol kơno ntas kơlwòk, rkèl, kơwào, kơñi pĕ, kơñi rơs, kơmboat, mơ ală bơta kơñi ndai, gen ală làng bol, ală lơgar, ală jơnau đơs, tơmbic să jơh mơ duh khoai rùp ràk mơ màh mơ bơtau Nebukatnessar neh bơtào.

⁸Tŭ hơ̆ gơs bàr pe nă cau Kalde lòt tus rềp nàng yă ală cau Juda.

⁹Bol khai đơs mơ bơtau Nebukatnessar lah: “Ơ bơtau, dan bơtau in kis sùm sùm.

¹⁰Ơ bơtau, bơtau neh ai jơnau sồr jơh tơl nă cau tòm tŭ kơno ntas kơlwòk, rkèl, kơwào, kơñi pĕ, kơñi rơs, kơmboat mơ ală bơta kơñi ndai gen pal tơmbic să nàng duh khoai rùp ràk mơ màh.

¹¹Mơ cau lơi ò tơmbic să nàng duh khoai rùp ràk hơ̆ gen rơp kong sơrbì tòm gùl bơnhă ồs hơng.

¹²Mơ tai, ơ bơtau, tềng do gơs ală cau Juda ne mơ bơtau neh pồ bơtào tòm broă nàng at bồ kơnhwàl Babilôn, hơ̆ la Sadrak, Mesak, mơ Abetnegô, ală cau hơ̆ ò ki ngàm dê bơtau dô êt lơi. Bol khai ò duh khoai ală yàng bơtau dê, mơ ò duh broă rùp ràk mơ màh mơ bơtau neh bơt bơtào.”

¹³Tŭ hơ̆, bơtau Nebukatnessar gơjrañ ngan, sồr cèng Sadrak, Mesak, mơ Abetnegô tus, gen ală cau hơ̆ kòl cèng tus di đap cau bơtau.

¹⁴Bơtau Nebukatnessar đơs mơ bol khai lah: “Ơ Sadrak, Mesak, mơ Abetnegô, ngan sơl la bol mê gơs nùs lơh nền ò duh ală yàng añ mơ ò cùn khoai rùp ràk mơ màh mơ añ neh bơt bơtào?

¹⁵Behơ̆ tŭ do, tòm tŭ bol mê kơno ntas kơlwòk, rkèl, kơwào, kơñi pĕ, kơñi rơs, kơmboat, mơ ală bơta kơñi ndai, mơ bol mê pal rcang sir tơmbic să nàng duh khoai rùp ràk mơ añ neh lơh gơs, gen di; mơya dilah bol mê ò cùn khoai gen bol mê rơp kong sơrbì mo tòm gùl bơnhă ồs hơng gen gơs yàng lơi rgơi dong bol mê klàs bơh di tê añ taih?”

¹⁶Sadrak, Mesak, mơ Abetnegô ho wơl mơ bơtau lah: “Ơ bơtau Nebukatnessar, bơh bơta do bol hi ò càng tò să di đap bơtau.

¹⁷Dilah bơtau sơrbì bol hi tòm bơnhă ồs hơng, gen ơ bơtau; Yàng Tom Trồ la Bơtau bol hi duh broă geh gơnoar dong bol hi klàs bơh hơ̆ mơ bơh di tê bơtau.

¹⁸Dilah ò behơ̆, Ơ bơtau, dan bơtau git lah bol hi ò duh broă ală yàng bơtau dê, mơ kung ò duh khoai rùp ràk mơ bơtau neh bơt bơtào sơl.”

¹⁹Tŭ hơ̆, bơtau Nebukatnessar gơhào gơjrañ dum muh dum mat gơwèt mơ Sadrak, Mesak mơ Abetnegô, mơ ai jơnau sồr sing ồs duh hơng poh dơ̆ rlau mơ òs,

²⁰mơ sồr ală cau ling pràn kơldang tòm mpồl ling bơtau dê kup cap Sadrak, Mesak mơ Abetnegô, mơ sơrbì tòm bơnhă ồs hơng.

²¹Behơ̆, bol khai kong cap bal mơ ào jrùh, srồmpha, ồi gòm bồ, mơ ală ồi ào ndai, mơ cau sơrbì bol khai tòm gùl bơnhă ồs hơng.

²²Tài bơh jơnau sồr cau bơtau dê la jal ngan, mơ bơnhă ồs gen duh hơng ngan ò git lơh, gen tàng lơmpiat ồs sa chơt jơh ală cau sơrbì Sadrak, Mesak mơ Abetnegô.

²³Ai pe nă cau la Sadrak, Mesak mơ Abetnegô gam kòl kơt mơ dùh tòm gùl bơnhă ồs hơng.

²⁴Tŭ hơ̆, bơtau Nebukatnessar ai lơh crih crài, mơ ntào sơrbac sơrbang, ai jơnau đơs mơ ală cau kwang bơyai broă lah: “Ală cau kòl bol he cap mơ sơrbì tòm gùl bơnhă ồs la pe nă ngan sơl?” Bol khai ho mơ cau bơtau lah: “Ơ bơtau, ngan behơ̆.”

²⁵Bơtau đơs tai lah: “Do, añ gŏ poan nă cau ò kòl cap, cơnđòa lòt digùl ồs mơ ò jê sồt, mơ rùp să cau dơ̆ poan gơlơh be rùp să dô nă yàng dê.”

²⁶Gen bơtau Nebukatnessar tus rềp hơ mpồng bơnhă ồs, mơ ai jơnau hòi lah: “Ơ Sadrak, Mesak mơ Abetnegô la cau duh broă Yàng Tom Trồ Hơđang Rlau Jơh dê, lik tĕ mơ lòt tus hơ do!” Gen Sadrak, Mesak mơ Abetnegô lik bơh digùl bơnhă ồs.

²⁷Ală cau kwang đơng lơgar, ală cau kwang at bồ kơnhwàl lơgar, ală cau kwang at bồ ling, mơ ală kwang bơyai broă cau bơtau dê pơjum bal gùt dar, mơ gŏ ồs ò gơs gơnoar lơh iơh di să jan pe nă cau hơ̆, kung ò gơs dô dang che sŏ lơi hơđang bồ bol khai gơkòl ồs sa, ồi ào bol khai dê ò tơr ồ dô êt lơi, mơ kung ò ƀô ồs bơh bol khai sơl.

²⁸Bơtau Nebukatnessar ai jơnau đơs lah: “Pal jòng ro Yàng Tom Trồ Sadrak, Mesak mơ Abetnegô dê! Kơnràñ neh sồr cau gơnrơh Kơnràñ dê nàng dong tă ală cau duh broă Kơnràñ neh kơnòm di Kơnràñ, bol khai neh ò rngòt di jơnau sồr bơtau dê mơ phi să jan bol khai dê tồ ò duh broă mơ ò duh khoai yàng lơi ndai rlau mơ Yàng Tom Trồ bol khai dê.

²⁹Gen tàng añ ai jơnau sồr do: Bulah la làng bol lơi, lơgar lơi, jơnau đơs lơi, dilah gơs cau lơi đơs jơnau lơi tòmdră di Yàng Tom Trồ Sadrak, Mesak mơ Abetnegô dê, gen să jan khai rơp kong crè rpot rpet, hìu ơm khai dê rơp gơlik dô gơnru thul, tài bơh ò gơs yàng lơi ndai gơs gơnoar dong tă be do ò.”

³⁰Gen bơtau bơtào tơngguh gơnoar broă Sadrak, Mesak mơ Abetnegô in tòm kơnhwàl lơgar Babilôn.