Read koho Daniel 4 Bible Online

Daniel 4 - koho bible

Daniel 4

¹Bơtau Nebukatnessar pơyoa jơnau jơh ală làng bol, ală lơgar, ală jơnau đơs in tòm làm jơh ù tiah: “Dan ală bol mê in geh bơta lơngap lơngai bềng lìu.

²Añ ai lơh niam nùs mơ yal bol mê in ală bơta krơi mơ tềl is crih crài mơ Yàng Tom Trồ Hơđang Rlau Jơh neh lơh añ in.

³Ală tềl is Kơnràñ dê la dờng ngan, Ală bơta krơi Kơnràñ lơh la pràn kơldang ò git nđò! Lơgar Kơnràñ dê la lơgar gam sùm sùm, Gơnoar at bồ Kơnràñ dê gam bơh rài do tus hơ rài ne!”

⁴Añ, Nebukatnessar, añ ơm lơngap lơngai mơ geh pas sơm bơtoah bơtoài tòm gơlang añ jê.

⁵Añ gŏ dô bơta mpau gơlơh añ in rngòt rngơt. Tòm tŭ añ bic hơđang cơnòng bic, ală bơta kơlôi sơnơng tòm bồ añ bal mơ ală bơta gơtơnggŏ hơ̆ gơlơh añ in dơrcul.

⁶Behơ̆, añ ai jơnau sồr cèng tus di đap añ jơh ală cau jak chài Babilôn dê, tồ bol khai yal tơlik jơnau gơtha bơta mpau hơ̆ añ in.

⁷Tòm tŭ ală cau jak chài Babilôn dê, ală cau gru bơjơu, ală cau sền sơmañ mơ ală cau sền dà lòt tus hơ añ, añ yal bơta mpau bol khai in, mơya bol khai ò rgơi yal tơlik jơnau gơtha gơ dê añ in.

⁸Lồi tơnơ̆ gen Daniel geh cèng tus hơ añ. Khai geh sơnđan la Beltesassar jat be sơnđan yàng añ jê, mơ geh hwềng ală yàng sàng goh dê ơm tòm khai. Añ yal bơta mpau khai in mơ đơs lah:

⁹“Ơ Beltesassar, cau at bồ ală cau jak chài Babilôn dê, añ git la hwềng ală yàng sàng goh dê ơm tòm mê, mơ ò gơs dô bơta ndơp ndơr lơi la kalke mê in. Do la bơta mpau añ neh gŏ, yal tơlik tĕ jơnau gơtha gơ dê añ in.

¹⁰Do la ală bơta gơtơnggŏ gơlik tòm bồ añ tòm tŭ añ bic hơđang cơnòng bic añ jê: Do, añ gŏ dô nơm tòm chi hòn digùl ù tiah; Dô nơm tòm chi jơnhoa dờng krơi is ngan.

¹¹Chi hơ̆ gơhòn dờng mơ pràn kơldang; cồng gơ ngŏ tus hơ trồ, làm jơh plai ù tiah lơi kung gŏ gơ lơm.

¹²Nha gơ hàng mơnĕ, plai gơ li la oă ngan, gơs tơl ală jơi in sa; ală jơi phan poan jơng tòm ƀlàng kìng crŭ tòm tiah mƀur gơ; ală sềm lơh rsòn di ntê gơ, jơh ală jơi gơs bơta kis kơnòm di gơ nàng geh ròng siam.

¹³Añ pơnjat sền ală bơta gơtơnggŏ tòm tŭ añ bic hơđang cơnòng, gen tềng hơ̆ gơs dô bơtau kơp gàr sàng goh, mù bơh đang trồ.

¹⁴Bơtau hơ̆ ai jơnau dờng mơ đơs lah: ‘Kơl tĕ chi do mơ koh tĕ ntê gơ, lơh jrùh tĕ ală nha gơ mơ rsìh tĕ plai gơ làm jơh, ală phan poan jơng ơm tòm tiah mƀur gơ, dô pleh tĕ, mơ ală sềm par dô bơh di ală ntê gơ dê!

¹⁵Mơya lòi tĕ tơnggu mơ ryas gơ dê tòm ù, kơt gơ mơ dô dang che sreng lòs mơ kòng digùl ñhơt tơlir tòm ƀlàng sre; lòi gơ in kong sùh mơ dà tŭ bơh trồ; mơ lòi pơnah khai dê sa ñhơt bal mơ ală phan poan jơng tòm ù.

¹⁶Tòmgơl tĕ nùs kòn mơnus bơh di khai, mơ ơn nùs phan poan jơng khai in mơ lòi poh tơngai rơp rlau hơđang khai.

¹⁷Hơ̆ la bơta lơh nền bơh ală bơtau kơp gàr, la jơnau sồr ală bơtau sàng goh neh yal tơlik tồ jơh ală jơi phan kis in git lah Bơtau Hơđang Rlau Jơh at bồ tòm ală lơgar kòn mơnus dê; Kơnràñ kòñ ai cau lơi in jat nùs kòñ Kơnràñ dê; mơ pồ bơtào cau dềt rhền rlau jơh tòm jơi kòn mơnus hơđang hơ̆.’

¹⁸Añ la bơtau Nebukatnessar neh gŏ bơta mpau hơ̆ mơ yal wơl ală cau jak chài Babilôn in, mơya bol khai ò rgơi yal tơlik jơnau gơtha gơ dê añ in. Behơ̆ tŭ do, ơ Beltesassar, yal tơlik tĕ jơnau gơtha gơ dê añ in, mê rgơi yal tơlik tài bơh hwềng ală yàng sàng goh dê ơm tòm mê.”

¹⁹Tŭ hơ̆ Daniel sơnđan la Beltesassar, ò rgơi đơs tòm dô êt jŏ, mơ ală bơta kơlôi sơnơng lơh khai in rngòt rngơt. Gen cau bơtau đơs mơ khai lah: “Ơ Beltesassar, bañ lòi bơta mpau mơ jơnau gơtha gơ dê lơh mê in rngòt rngơt.” Beltesassar ho lah: “Ơ bơtau, kơp kòñ bơta mpau do gơtơntus di ală cau sò tơm di bơtau, mơ jơnau gơtha gơ dê gơlik gơs di ngan di ală cau tòmdră mơ bơtau.

²⁰Tòm chi mơ bơtau neh gŏ, gơlik gơs dờng mơ pràn kơldang, cồng gơ ngŏ tus hơ trồ, làm jơh plai ù tiah lơi kung gŏ gơ lơm,

²¹nha gơ hàng mơnĕ, plai gơ oă ngan, gơs tơl ală jơi in sa, ală jơi phan poan jơng tòm ƀlàng kìng crŭ tòm tiah mƀur gơ, ală sềm lơh rsòn di ntê gơ.

²²Ơ bơtau, tòm chi hơ̆ la să tòm bơtau, bơtau neh gơlik dờng mơ pràn kơldang; bơta dờng ryŭ bơtau dê gơtơngguh tus hơ trồ, mơ gơnoar at bồ bơtau dê gơ lòt tus di lồi dut nhàr ù tiah dê.

²³Mơya tus di bơta bơtau gŏ dô Bơtau kơp gàr sàng goh mù bơh hơđang trồ mơ ai jơnau sồr kơl tĕ chi mơ tơnroh tĕ, mơya lòi tĕ tơnggu ryas gơ dê tòm ù, mơ kơt tĕ gơ mơ dô dang che sreng lòs mơ kòng digùl ñhơt tơlir tòm ƀlàng sre, lòi gơ kong sùh mơ dà tŭ bơh đang trồ, mơ lòi khai in kis bal mơ ală phan poan jơng tòm ƀlàng, jơl tus di poh tơngai neh rlau hơđang khai.

²⁴Ơ bơtau, do la jơnau gơtha, mơ do la bơta lơh nền mơ Bơtau Hơđang Rlau Jơh dê rơp lơh gơlik hơđang bơtau la cau tòm añ jê.

²⁵Làng bol bơtau dê rơp bơtrơh bơtau bơh di gơlang bơtau dê. Bơtau rơp ơm tòm ƀlàng kung be kơnrồ, mơ rơp kong sùh mơ dà tŭ bơh đang trồ. Tòm poh sơnam, bơtau pal kis behơ̆, jơl tus di tŭ bơtau đal git lah Bơtau Hơđang Rlau Jơh at bồ tòm ală lơgar kòn mơnus dê, mơ Kơnràñ kòñ ai gơnoar at bồ cau lơi in jat nùs kòñ Kơnràñ dê.

²⁶Ai be jơnau neh sồr lah lòi wơl tơnggu ryas tòm chi hơ̆ dê, hơ̆ la lơgar bơtau dê rơp geh jào wơl bơtau in at bồ tŭ lơi bơtau neh đal git gơnoar at bồ Bơtau Hơđang Rlau Jơh dê ơm hơđang trồ.

²⁷Behơ̆ tàng, Ơ bơtau, dan iat jơnau añ bơto tơngkah: Dan bơtau lơh jat tĕ bơta song ring nàng tơwài ală bơta tồi glài bơtau dê, nđàc sơngit tĕ di ală cau kong rồn bơklơn nàng tơwài ală bơta iơh bơsak bơtau dê. Behơ̆ digơlan bơta pas gơs lơngai lơngò bơtau dê gơ rơp gam gơs jŏ jòng rlau.”

²⁸Jơh ală bơta hơ̆ gơtơntus di bơtau Nebukatnessar.

²⁹Dô nam tơnơ̆, tòm tŭ bơtau lòt yơng hơđang rkàng ring hìu gơlang khai dê tòm Babilôn,

³⁰gen khai ai jơnau đơs lah: “Do ò di la Babilôn dờng mơ añ neh bơt bơtào bơh gơnoar pràn añ jê nàng lơh gơs ƀòn tòm bơtau dê, mơ ràng tơlik bơta gơklŏ ryŭ ryơm añ jê ơ?”

³¹Khai òhềt đơs sir ală jơnau hơ̆ gen gơs jơnau bơh đang trồ đơs lah: “Ơ bơtau Nebukatnessar, do la bơta neh lơh nền mê in, gơnoar at bồ lơgar mê dê neh tă bơh mê.

³²Mê rơp kong bơtrơh bơh digùl kòn mơnus, rơp ơm bal mơ phan poan jơng tòm ƀlàng; mê rơp pal sa ñhơt be kơnrồ, mơ kong lơh glài tòm poh tơngai, jơl tus di tŭ mê đal git lah Bơtau Hơđang Rlau Jơh at bồ tòm lơgar kòn mơnus, mơ Kơnràñ kòñ ai gơnoar at bồ cau lơi in jat nùs kòñ Kơnràñ dê.”

³³Tòm jơ hơ̆ mo, jơnau sồr hơ̆ neh lơh gơlik di ngan di bơtau Nebukatnessar, khai kong bơtrơh bơh digùl kòn mơnus, sa ñhơt be kơnrồ să jan khai dê pal kong sùh mơ dà tŭ bơh đang trồ jơl tus di sŏ khai dê gơhòn be sơnò klàng mơ nđias tê khai dê gơlik jòng kung be nđias sềm.

³⁴Tus di lồi dut ală ngai hơ̆, añ la Nebukatnessar, añ wèt mat tơnggòr sền hơđang trồ, gen dơngoh jak gơrê wơl hơ añ, mơ añ jòng ro Bơtau Hơđang Rlau Jơh. Añ jòng ro mơ lơh gơklŏ sơnđan Bơtau kis gam sùm sùm: Gơnoar at bồ Kơnràñ dê la gơnoar gam sùm sùm. Lơgar Kơnràñ dê gam bơh rài do tus hơ rài ne.

³⁵Jơh ală làng bol tòm ù kòl sền be ò gơs bơta lơi. Kơnràñ lơh jat nùs kòñ Kơnràñ dê digùl ală gơnoar hơđang trồ, mơ digùl ală làng bol tòm ù; Ò gơs cau lơi rgơi kơryan tê Kơnràñ Hala lùp Kơnràñ lah: “Ñchi bơh tài Kơnràñ neh lơh behơ̆ taih?”

³⁶Tòm tŭ hơ̆ mo, dơngoh jak gơrê wơl mơ añ. Añ dòp geh wơl gơnoar at bồ lơgar bal mơ bơta ryŭ ryơm àng gơklŏ cau bơtau dê; ală cau kwang dờng at bồ rê wơl duh broă añ. Añ geh bơtào wơl hơđang sơbàn lơgar, mơ gơnoar pràn añ jê gơbơtơl rlau mơ lài òr.

³⁷Tŭ do, añ la bơtau Nebukatnessar jòng ro, mơ yò tơngguh mơ lơh àng sơnđan Bơtau Hơđang Trồ; jơh ală broă Kơnràñ dê la song ngan: ală gùng dà Kơnràñ dê la song ring; mơ Kơnràñ rgơi tơmù liah cau lơi lòt tòm bơta pơnhừ să.