Read koho Daniel 5 Bible Online

Daniel 5 - koho bible

Daniel 5

¹Bơtau Belsassar yò sa dờng dô rbô nă cau kwang dờng khai in, mơ bơtau ñô tơrnòm bal mơ bol khai.

²Tòm tŭ cau bơtau ñô tơrnòm duh hơng tòm nùs gen khai sồr cèng ală phan ngui mơ màh mơ priă mơ bơtau Nebukatnessar bèp khai dê neh ai bơh hìu duh khoai Yàng Tom Trồ dê tòm Jerusalem, tồ khai bal mơ ală cau kwang dờng, ală bau ùr mơ ală bau cồng khai dê ngui nàng ñô tơrnòm.

³Gen cau cèng tus ală phan ngui mơ màh mơ priă neh ai bơh hìu duh khoai Yàng Tom Trồ dê tòm Jerusalem, mơ cau bơtau bal mơ ală cau kwang dờng, ală bau ùr mơ ală bau cồng bơtau dê ngui nàng ñô tơrnòm.

⁴Behơ̆, bol khai ñô tơrnòm mơ jòng ro ală yàng mơ màh, mơ priă, mơ kòng, mơ lòs, mơ chi, mơ lŭ.

⁵Tòm jơ hơ̆, nisơna gơs ală ràs tê mpàng tê kòn mơnus dê gơtơlik, cih di dơrñang mơ cùr gơlang bơtau dê, tòm toh di đap tiah ơn jơng ồs, mơ cau bơtau sền gŏ mpàng tê hơ̆ cih.

⁶Cau bơtau rngòt pàl jơh muh mat, rơm să ngan, bàr nơm gơltang gơtòmcik bal.

⁷Khai hòi driau dờng, sồr pơjum ală cau jak chài, ală cau gru bơjơu, mơ ală cau sền sơmañ, mơ đơs mơ ală cau hơ̆ lah: “Cau lơi rgơi sền ală jơnau cih do, mơ yal tơlik jơnau gơtha gơ dê añ in, gen cau hơ̆ rơp geh soh ào dà gur cau bơtau, geh wan che rơnjài màh di ngko, mơ geh pồ bơtào gơs kwang dơ̆ pe tòm gơnoar broă at bồ lơgar dê.”

⁸Jơh ală cau jak chài Babilôn dê mut tềng hơ̆, mơya bol khai ò rgơi sền ală jơnau cih hơ̆, mơ kung ò rgơi yal tơlik jơnau gơtha gơ dê cau bơtau in.

⁹Bơtau Belsassar rngòt rngơt oă ngan tòm nùs, muh mat khai sơlo pàl rlau tai, mơ ală cau kwang dờng khai dê ò suk ơm.

¹⁰Mè bơtau kơno jơnau hơ̆ gen mut tòm ơdŭ sa, mơ đơs mơ cau bơtau lah: “Ơ bơtau, dan bơtau in kis sùm! Dan bơtau bañ lơh nùs bơtau dê rngòt rngơt, mơ muh mat bơtau gơlik pàl tai.

¹¹Tòm lơgar bơtau dê gơs dô nă cau gơs hwềng ală yàng sàng goh dê ơm tòm khai. Tòm rài bèp bơtau dê, cau lơi kung gŏ tòm khai gơs bơta àng, bơta git loh, mơ bơta jak chài kung be bơta jak chài ală yàng dê. Tài behơ̆ tàng bơtau Nebukatnessar la bèp bơtau dê neh pồ bơtào khai gơs cau at bồ mpồl ală cau jak chài Babilôn dê.

¹²Daniel, mơ bèp bơtau di neh sơnđan la Beltesassar, la cau gơs bơta jak chài, git wă mơ àng loh, khai kung rgơi yal tơlik jơnau gơtha ală bơta mpau, yal loh ală bơta ndơp ndơr, mơ pơnring ală bơta kalke. Dan bơtau sồr hòi Daniel tus nàng khai yal tơlik ală jơnau gơtha do bơtau in.”

¹³Gen Daniel geh cèng tus di đap bơtau. Bơtau lùp lah: “Ngan mê la Daniel, dô nă tòm ală kòn sau cau Juda neh kòl kup gơs dĭ, mơ bơtau bèp añ neh cèng brê bơh lơgar Juda sơl?

¹⁴Añ neh kơno đơs bơh mê la gơs hwềng ală yàng di ơm tòm mê, mơ mê gơs bơta àng, bơta git wă mơ jak chài lin rlau.

¹⁵Añ neh hòi pơjum tềng do ală cau jak chài mơ ală cau gru bơjơu nàng sền ală jơnau do mơ yal tơlik jơnau gơtha gơ dê añ in, mơya bol khai ò rgơi yal tơlik jơnau gơtha gơ dê.

¹⁶Añ kơno đơs la mê rgơi yal tơlik ală bơta ndơp ndơr mơ lơh pơnring jơh ală bơta kalke. Daniel mê rgơi sền ală jơnau do mơ yal tơlik jơnau gơtha gơ dê añ in, gen mê rơp geh soh ào dà gur cau bơtau dê, rơp geh wan che rơnjài màh di ngko, mơ rơp gơs kwang dơ̆ pe tòm gơnoar broă at bồ lơgar dê.”

¹⁷Gen Daniel ho wơl mơ cau bơtau lah: “Bơtau prap lòi tĕ ală phan ƀàn hơ̆, mơ pồ bơtào ai gơnoar cau ndai in! Bulah behơ̆, añ rơp sền jơnau cih hơ̆ mơ yal tơlik jơnau gơtha ndơp ndơr gơ dê bơtau in.

¹⁸Ơ bơtau, Yàng Tom Trồ Hơđang Rlau Jơh neh ai sơbàn bơtau, gơnoar dờng, bơta jòng ro mơ bơta ryŭ ryơm bèp bơtau in la Nebukatnessar.

¹⁹Tài bơh Kơnràñ neh ai khai in gơnoar dờng gen jơh ală làng bol, ală lơgar, ală jơnau đơs rơm să rngòt di đap khai. Khai kòñ tơnchơt cau lơi gen tơnchơt, kòñ lòi cau lơi in kis gen lòi. Khai kòñ yò tơngguh cau lơi hala kòñ tơmù cau lơi jat nùs khai dê.

²⁰Mơya, tòm tŭ khai yò is să khai mơ nùs khai gơlik kră kơldang bơh bơta pơnhừ să, gen khai kòl tă tơlik bơh di sơbàn bơtau khai dê mơ roh jơh bơta gơklŏ.

²¹Khai kòl bơtrơh bơh digùl kòn mơnus, nùs khai gơlik gơs be nùs phan poan jơng, mơ khai ơm bal mơ ală alàng brê. Cau ai khai in sa ñhơt kung be kơnrồ, mơ să jan khai kong sùh mơ dà tŭ bơh đang trồ jơl tus di tŭ khai đal git lah Yàng Tom Trồ Hơđang Rlau Jơh at bồ tòm lơgar kòn mơnus, mơ Kơnràñ kòñ ai gơnoar at bồ cau lơi in jat nùs kòñ Kơnràñ dê.

²²Ơ bơtau Belsassar, kòn khai dê, bulah bơtau neh git jơh ală broă hơ̆, mơya nùs bơtau dê ò bài pơndêt să dô êt lơi;

²³Gơsơlơ̆u wơl, bơtau neh pơnhừ să tòmdră mơ Yàng hơđang trồ, mơ sồr cèng di đap bơtau ală phan ngui tòm hìu duh khoai Kơnràñ dê mơ ngui nàng ñô tơrnòm bal mơ ală cau kwang dờng, ală bau ùr mơ ală bau cồng bơtau dê. Bơtau kung neh jòng ro ală yàng mơ priă, mơ màh, mơ kòng, mơ lòs, mơ chi, mơ lŭ, la ală yàng ò gŏ, ò kơno, mơ ò git wă bơta lơi. Bơtau ò jòng ro Yàng Tom Trồ la Bơtau at tòm tê Kơnràñ dê nhơm tă mơ jơh ală gùng dà bơtau dê.

²⁴Behơ̆ tàng Kơnràñ neh sồr tơnggŏ dô pơnah mpàng tê mơ cih ală jơnau do.

²⁵Ală jơnau neh cih hơ̆ la: MENE, MENE, TEKEL, PARSIN.

²⁶Do la jơnau gơtha ală jơnau hơ̆ dê: Mene la kòp, Yàng Tom Trồ neh kòp ală ngai bơtau at bồ, mơ pơndut gơ rau.

²⁷Tekel la kơr, bơtau neh kòl kơr hơđang phan kơr, mơ gŏ la siơ̆u ò tơl.

²⁸Parsin la: cah is bàr pơnah, lơgar bơtau rơp gơkòl cah is mơ jào cau Medi mơ cau Persia in.”

²⁹Jat jơnau gơnoar sồr bơtau Belsassar dê, cau tơnsoh ào dà gur cau bơtau dê Daniel in, tơnwan di ngko khai dô nơm che rơnjài màh, mơ yal pơnro lah khai geh pồ bơtào gơs kwang dơ̆ pe tòm gơnoar broă at bồ lơgar dê.

³⁰Tòm mang hơ̆, bơtau Babilôn la Belsassar kòl tơnchơt.

³¹Mơ Darius la cau Medi dòp geh lơgar, tŭ hơ̆ khai gơs prau jơt bàr nam.