Read koho Daniel 8 Bible Online

Daniel 8 - koho bible

Daniel 8

¹Tòm nam dơ̆ pe rài bơtau Belsassar; añ, Daniel gơs dô bơta gơtơnggŏ tai, tơnơ̆ mơ bơta gơtơnggŏ lài mơ añ neh gơs.

²Tòm bơta gơtơnggŏ, añ gŏ añ ơm tòm Ƀòn Dờng Susa, kơnhwàl lơgar Elam, di gah hiòng Ulai.

³Añ tơnggòr sền mơ gŏ dô nơm belàt dam ntào di gah hiòng. Gơ gơs bàr nơm ngke jòng, ngke dơ̆ bàr hòn tơnơ̆ mơ jòng rlau mơ ngke ne.

⁴Añ gŏ belàt dam hơ̆ gơ gĕ hơ đah mattơngai mut, đah đang, mơ đah đơm, ò gơs phan poan jơng lơi rgơi tòmdră jai mơ gơ, mơ ò gơs cau lơi rgơi dong tă bơh dê tê gơ. Gơ kòñ lơh bơta lơi jat nùs kòñ gơ dê, mơ gơ sơlo gơlik pràn rlau tai.

⁵Tòm tŭ añ kơlôi sơnơng bơh bơta hơ̆, nisơna gơs dô nơm be dam tus bơh đah mattơngai mut, gơ gơs dô nơm ngke dờng hòn digùl bàr đah mat, gơ lòt làm hơđang ù mơ jơng gơ ò jă di ù.

⁶Gơ lòt hơ đah belàt dam gơs bàr nơm ngke mơ añ neh gŏ ntào di gah hiòng; gơ brồ mơ gơhào gơjrañ ngan tus hơ belàt dam hơ̆.

⁷Añ gŏ gơ brồ tơm dê belàt dam, lơh pă bàr nơm ngke, belàt dam ò jai tòmdră; be dam sơrglơm gơtòm ù, jă hơđang mơ ò gơs cau lơi rgơi dong tă belàt dam bơh di gơnoar pràn gơ dê.

⁸Be dam gơlik gơs dờng pràn ngan: mơya tòm tŭ gơ neh tus di tiah lồi bơta pràn gơ dê rau, gen ngke dờng gơ dê pă, lòi tiah poan nơm ngke ndai gơhòn lik wèt hơ poan đah càl hơđang trồ.

⁹Bơh di dô nơm tòm ală ngke hơ̆ gơhòn lik dô nơm ngke dềt, sơlo ngai sơlo gơlik pràn wèt hơ đah đơm, đah mattơngai lik, mơ wèt hơ lơgar hàng mơnĕ sơl.

¹⁰Gơ gơlik pràn jơl tus di gơtòmlơh mơ mpồl hơđang trồ, tơndùh tòm tiah dô pơnah tòm ală sơmañ hơđang trồ, mơ gơ jă hơđang.

¹¹Gơ pơnhừ să tian gơs kòñ tòmdră mơ Bơtau at bồ hơđang trồ; gơtă tơlik ală phan ơn duh khoai kòp ngai bơh di Kơnràñ, mơ lơh tơrlah tiah sàng goh Kơnràñ dê.

¹²Tài bơh bơta iơh bơsak gen tàng mpồl cau sàng goh bal mơ phan ơn duh khoai kòp ngai gơkòl jào phi gơ in; gơ geh bơtoah tòm ală bơta gơlơh, mơ jơnau song gơkòl sang sơrbì tòm ù.

¹³Gen añ kơno dô bơtau sàng goh đơs, mơ dô bơtau sàng goh ndai đơs mơ bơtau ơm đơs hơ̆ lah: “Gam nđò jŏ sồng gơlik di ngan bơta gơtơnggŏ bơh phan ơn duh khoai kòp ngai, bơh tồi glài tòmdră lơh gơlik gơs bơta tơnroh, mơ bơh bơta sang phi tiah sàng goh bal mơ mpồl hơđang trồ tồ gơkòl jă trơm hơđơm jơng taih?”

¹⁴Khai ho wơl añ in lah: “Bàr rbô pe rhiang trồ mho mơ trồ àng drim: tơnơ̆ mơ hơ̆ tiah sàng goh rơp geh lơh sàng goh wơl.”

¹⁵Tòm tŭ añ, la Daniel, sền bơta gơtơnggŏ hơ̆ mơ kơlôi sơnơng tồ git wă jơnau gơtha gơ dê, gen di đap añ gơs dô nă cau ntào gơs rùp să be dô nă cau klau.

¹⁶Mơ añ kơno jơnau dô nă cau klau bơh di hiòng Ulai hòi mơ đơs lah: “Ơ Gabriel, yal tĕ cau do in git jơnau gơtha bơta gơtơnggŏ hơ̆.”

¹⁷Gabriel tus rềp di tiah añ ntào; tòm tŭ khai neh tus rềp gen añ rngòt ngan mơ gơpừ cup blup mat tòm ù. Khai đơs mơ añ lah: “Ơ kòn mơnus, git wă tĕ; bơh bơta gơtơnggŏ hơ̆ gơ tơrgòm ală bơta gơwèt hơ tŭ tơngai lồi dut.”

¹⁸Tòm tŭ khai đơs mơ añ, añ bic lơhă blup mat tòm ù; mơya khai ƀư di añ, lơh añ in ntào wơl.

¹⁹Khai đơs mơ añ lah: “Do añ rơp yal mê in git bơta rơp tus tòm ngai tơnơ̆, tòm pah rài bơta gơjrañ dờng dê; tài bơh bơta gơtơnggŏ gơ tơrgòm ală bơta gơwèt hơ tŭ tơngai lơh nền bơta lồi dut dê.

²⁰Belàt dam gơs bàr nơm ngke mơ mê neh gŏ hơ̆ sơnio bơh ală bơtau lơgar Medi mơ Persia dê.

²¹Be dam hơ̆ la bơtau lơgar Grek; mơ ngke dờng ơm digùl bàr đah mat gơ, hơ̆ la bơtau sơnròp.

²²Bơh poan nơm ngke gơhòn lik di tiah ngke neh pă; hơ̆ la poan nơm lơgar hơ̆, mơya ò gơs gơnoar pràn ndròm bal.

²³Tòm tơngai lồi dut gơnoar at bồ bol khai dê, tòm tŭ ală cau tòmdră neh gơlik iơh bơsak ngan, gen bơtào tơngguh dô nă bơtau gơs muh mat jàñ bơsak, git jak ală kai gơrmơ̆i tòmlơh.

²⁴Khai rơp gơs gơnoar dờng ngan, mơya ò di kơnòm bơh pràn tòm khai dê. Khai rơp tơnggơs bơta tơnroh iơh rmơh ngan, mơ geh bơtoah bơtoài tòm ală broă lơh khai dê. Khai rơp tơnroh ală cau gơs gơnoar pràn mơ làng bol sàng goh.

²⁵Khai kơnòm dê bơta ma blac khai dê, khai geh bơtoah tòm ală bơta blac pơrlồm khai dê; bơtau hơ̆ yò tơngguh să tòm khai la jòng màng rlau jơh. Nisơna khai rơp tơnroh oă cau; khai khin guh tòmsò mơ Bơtau ală bơtau dê, mơya khai rơp gơkòl tơnroh, mơ ò di bơh tê kòn mơnus.

²⁶Bơta gơtơnggŏ bơh ală trồ mho mơ ală trồ àng drim neh yal mê in hơ̆ la ngan. Mơya til tĕ bơta gơtơnggŏ do tài bơh gơ tơrgòm ală bơta gam jŏ jòng sồng tus.”

²⁷Tŭ hơ̆, añ, Daniel, añ gơpừ chơt yơh mơ kòp jê tòm jŏ ngai. Gen añ guh mơ duh broă cau bơtau. Añ ai lơh krơi ngan bơh bơta gơtơnggŏ hơ̆; mơya ò gơs cau lơi git wă jơnau gơtha gơ dê.