Read koho Daniel 9 Bible Online

Daniel 9 - koho bible

Daniel 9

¹Tòm nam sơnròp bơtau Darius dê la kòn klau Ahasuerus, jơi bơtiàn cau Medi, neh geh pồ bơtào at bồ lơgar cau Kalde;

²tòm nam sơnròp at bồ khai dê, añ, Daniel, añ kơnòm di Sră Goh, mơ git lài khà ală sơnam, jat jơnau Yàng Jehôwa neh đơs lài mơ cau gơnoar hwơr Jeremi, pal gơlik gơs di ngan bơh ƀòn dờng Jerusalem pal kong sang lòi ngềt ngơt tòm poh jơt sơnam.

³Behơ̆, añ wèt mat hơ Yàng la Yàng Tom Trồ, jòi jat Kơnràñ bơh bơta hòi dan, rac ròc bal mơ bơta ơt sa, soh ồi ào bài sơnò kiat mơ nggui tòm bùh.

⁴Behơ̆, añ hòi dan mơ Jehôwa Yàng Tom Trồ añ jê, yal glài mơ đơs lah: “Ơ Yàng la Yàng Tom Trồ dờng rlau jơh mơ pal rơm să rngòt, Kơnràñ prap gàr jơnau ho bal tòm bơta kòñ gơboh kơ̆ dơn gơwèt hơ ală cau kòñ gơboh dê Kơnràñ mơ lơh jat ală bơta sồr lam Kơnràñ dê.

⁵Bol hi la cau tồi glài mơ lơh tìs, bol hi la iơh bơsak mơ tòmdră mơ Yàng, bol hi neh pơrlơ̆ sang ală bơta sồr lam mơ ală bơta boh lam Yàng dê.

⁶Bol hi neh ò iat jơnau ală cau duh broă Kơnràñ dê la ală cau gơnoar hwơr neh ai sơnđan Kơnràñ mơ đơs mơ ală cau bơtau, ală cau kwang at bồ, ală ồng pàng bol hi dê, bal mơ jơh làng bol tòm lơgar.

⁷Ơ Yàng, Kơnràñ la song ring, ai bol hi pal kong bơta ƀàssìl kung be tòm ngai do; bol hi la cau Juda, làng bol Jerusalem mơ jơh ală cau Israel ơm rềp ơm ngài, bal mơ jơh ală cau gơkòl nrah nring tòm jơh ală lơgar pal kong bơta hơ̆ tài bơh bol hi ò dòn song mơ Kơnràñ.

⁸Ơ Yàng, bol hi bal mơ ală cau bơtau, ală cau kwang at bồ, ală ồng pàng bol hi dê pal kong bơta ƀàssìl ƀàsso tài bơh bol hi neh tìs glài tòmdră mơ Kơnràñ.

⁹Jehôwa la Yàng Tom Trồ bol hi dê la Bơtau gơs bơta kòñ nđàc mơ jak toh glài bulah bol hi neh tòmdră mơ Kơnràñ.

¹⁰Bol hi neh ò lơh jat jơnau Jehôwa Yàng Tom Trồ bol hi dê, kung ò prap gàr ală bơta boh lam Kơnràñ dê, mơ Kơnràñ neh ơn di đap bol hi kơnòm di cau duh broă Kơnràñ dê la ală cau gơnoar hwơr.

¹¹Jơh tơl nă cau Israel neh lơh tìs mơ bơta boh lam Kơnràñ dê mơ dô pleh, nàng ò dòn bơr Kơnràñ. Behơ̆, bơta srat sơntơm, mơ bơta lơh glài neh cih tòm bơta boh lam Môise la cau duh broă Yàng Tom Trồ dê, neh tuh hơđang bol hi, tài bơh bol hi neh tìs glài tòmdră mơ Kơnràñ.

¹²Kơnràñ neh lơh gơlik gơs ală jơnau neh đơs tòmdră mơ bol hi mơ ală cau kwang at bồ bol hi dê, mơ đùh bơta rung rài dờng hơđang bol hi. Làm jơh tòm tiah trồ do, ò gơs bơta neh gơlik gơs ndròm be bơta neh gơlik gơs hơđang Jerusalem.

¹³Jơh ală bơta rung rài do neh tuh hơđang bol hi tòm toh be neh cih tòm bơta boh lam Môise dê. Bulah behơ̆ bol hi kung ò rac dan bơta nđàc Jehôwa Yàng Tom Trồ bol hi dê, pơrlac sang bơh bơta iơh bơsak bol hi dê, mơ ơn nùs kơlôi dê bơta dòn song Kơnràñ dê.

¹⁴Tài bơh hơ̆, Yàng Jehôwa neh rcang mơ đùh bơta rung rài hơđang bol hi. Ngan, Jehôwa Yàng Tom Trồ bol hi dê la song ring tòm jơh ală broă Kơnràñ lơh; bơh bol hi ò dòn bơr Kơnràñ.

¹⁵Mơ tŭ do, ơ Yàng la Yàng Tom Trồ bol hi dê, la Bơtau neh ai tê gơnoar pràn nàng cèng làng bol Kơnràñ dê lik bơh lơgar Ejiptơ mơ neh lơh pơnro sơnđan Kơnràñ dê jơl tus di ngai do; ai bol hi neh tìs glài, neh lơh bơta iơh bơsak.

¹⁶Ơ Yàng, añ hòi dan mơ Yàng jat jơh ală bơta sồr lam song ring Kơnràñ dê, dan Yàng pơrlac sang bơta gơjrañ dờng Kơnràñ dê bơh dê Jerusalem la ƀòn dờng mơ la mơnơm sàng goh Kơnràñ dê. Tài bơh tồi glài bol hi dê mơ bơta iơh bơsak ồng pàng bol hi dê tàng Jerusalem mơ làng bol Kơnràñ dê pal kong bơta bơtat bơtròh bơh dê ală làng bol ơm gùt dar bol hi.

¹⁷Gen tàng tŭ do, ơ Yàng Tom Trồ bol hi dê, dan iat jơnau hòi dan rac ròc cau duh broă Kơnràñ dê. Tài bơh să tòm Yàng, dan nđàc sơngit wèt sền tiah sàng goh Kơnràñ dê neh kòl sang lòi ngềt ngơt.

¹⁸Ơ Yàng Tom Trồ añ jê, dan wèt tồr mơ iat, dan pò mat mơ sền bơta tơnroh gơprah ƀòn dờng neh geh tơmoh mơ sơnđan Kơnràñ dê! Bol hi rac dan mơ Kơnràñ ò di tài bơh bol hi la song ring, mơya la kơnòm di bơta nđàc sơngit dờng ơnàng Kơnràñ dê.

¹⁹Ơ Yàng, dan iat! Ơ Yàng, dan toh glài! Ơ Yàng, dan ơn nùs mơ lơh gơs! Ơ Yàng Tom Trồ añ jê, dan bañ lơh òbat tài bơh ƀòn dờng Kơnràñ dê mơ làng bol Kơnràñ dê neh geh tơmoh mơ sơnđan Kơnràñ.”

²⁰Tòm tŭ añ gam đơs mơ hòi dan, yal glài añ jê mơ glài làng bol Israel añ jê, jơh nùs rac dan mơ Jehôwa Yàng Tom Trồ añ jê, tài bơh mơnơm sàng goh Yàng Tom Trồ añ jê

²¹Tòm tŭ añ gam hòi dan; gen Gabriel, cau mơ añ neh gŏ tòm bơta gơtơnggŏ lài, geh sồr par mhar tus hơ añ pơgap di tŭ ơn phan duh khoai trồ mho.

²²Khai tus mơ yal loh añ in lah: “Ơ Daniel, tŭ do añ tus nàng ai mê in bơta àng loh mơ git wă.

²³Bơh di tŭ mê rơp sơntòm hòi dan gen jơnau ho wơl neh gơs mơ añ tus nàng yal jơnau hơ̆ mê in, tài bơh mê neh geh kòñ gơboh ngan. Behơ̆, kơlôi sơnơng tĕ jơnau do mơ git wă tĕ bơta gơtơnggŏ.

²⁴Poh jơt nơm poh neh gơs lơh nền hơđang làng bol mê dê mơ ƀòn dờng sàng goh mê dê: nàng pơndut bơta tìs glài, tơnlồi bơta tồi glài, mơ tơwài bơta iơh bơsak, mơ cèng tus bơta song ring gam sùm sùm, nàng lơh gơlik di ngan bơta gơtơnggŏ mơ jơnau gơnoar hwơr, mơ bong mơñà Tiah Sàng Goh Ngan in.

²⁵Mê git tĕ mơ wă loh bơh di tŭ tơlik jơnau gơnoar sồr rcang wơl mơ bơt wơl Jerusalem jơl tus di tŭ tus Bơtau geh bong mơñà, hơ̆ la bơtau at bồ, gen geh poh poh, mơ prau jơt bàr nơm poh. Ƀòn dờng hơ̆ rơp geh bơt wơl tòm tŭ tơngai bòl glar kalke, gơs gùng dờng mơ rbòng dà lơh gơs pơnggàr gùt dar.

²⁶Tơnơ̆ mơ prau jơt bàr nơm poh hơ̆, Bơtau geh bong mơñà rơp kòl tơnroh, mơ ò gam bơta lơi tai. Mpồl ling Bơtau rơp tus dê rơp tơnroh ƀòn dờng mơ tiah sàng goh. Bơta lồi dut rơp tus kung be dà kŏ: bơta tòmlơh gơpơnjat jơl tus lồi dut, mơ ală bơta tơnroh gơprah neh lơh nền.

²⁷Khai rơp lơh kơ̆ nền dô bơta ho bal mơ oă cau tòm dô poh, mơya tus di nggùl poh, khai rơp pơndut jơh phan ơn duh khoai mơ phan ơn; mơ tòm tiah bol khai dê rơp gơlik bơta ngkòr ngkàc, bơta hơ̆ tơnggơs bơta tơnroh gơprah, jơl tus di bơta lồi dut neh lơh nền tuh hơđang cau lơh tơrlah tơrling.”